კორონავირუსის პანდემიის პიკის დასრულების შემდეგ, საფეხბურთო სამყაროს ჩემპიონთა ლიგა უბრუნდება. დღეს 2 მატჩი გაიმართება, სადაც მეოთხედფინალისტების ვინაობა გახდება ცნობილი.

უჩვეულოა, თუმცა აგვისტოში ლიგის მატჩები უმაყურებლოდ გაიმართება. მეოთხედფინალში გასული 4 გუნდი: ატალანტა, პსჟ, ლაიპციგი, ატლეტიკო.

მთავარი დაპირისპირება ქომაგებს “ეტიჰადზე“ ელოდებათ, სადაც მანჩესტერ სიტი მადრიდის რეალს დაუხდვდება. პირველი ჯახი, რომელიც ესპანეთში ჩატარდა, პეპ გუარდიოლას გუნდის გამარჯვებით დასრულდა - 2:1.

აღნიშნული შედეგი ბრიტანელების წისქვილზე ასხამს წყალს, მაგრამ ლა ლიგის ჩემპიონს სულ სხვა ამბიციები აქვს და, რა თქმა უნდა, დანებებას არ აპირებს.

“სამეფო კლუბმა“ პანდემიის შემდეგ, დიდებული ფეხბურთი ითამაშა, რასაც ტიტული მოჰყვა, ხოლო სიტიმ პრემიერ ლიგაში მეორე ადგილი დაიკავა.

“ბლანკოსი“ რთული ამოცანის წინაშეა. ზიზუს ბიჭებს 2 გოლი სჭირდებათ, რათა შემდეგ ეტაპზე გავიდნენ. სიტუაციას ის ართულებს, რომ სერხიო რამოსი დისკვალიფიცირებულია. არ ითამაშებს გარეთ ბეილიც, ჯანმრთელადაა, მაგრამ განაცხადში ზიდანმა უელსელი მისსავე სურვილით არ შეიყვანა.

“ბევრი რამ თქვეს, მაგრამ ეს ჩვენს შორის პირადი საკითხია. მხოლოდ ის შემიძლია ვთქვა, რომ მან ამჯობინა არ ეთამაშა. დანარჩენი მასსა და ჩემ შორის რჩება.

ყოველ ორ-სამ დღეში თამაში მისთვის რთული იყო, მაგრამ ახლა კარგადაა. ლა ლიგის სეზონის ბოლოს პრობლემები ჰქონდა, თუმცა ამჟამად ვარჯიშობს და ბევრად უკეთაა“, - თქვა ზიდანმა.

დანაკლის აქვს სიტისაც, რომელსაც სერხიო აგუერო და მენდი ვერ დაეხმარება.

“დიდი დრო გავიდა მას შემდეგ, რაც პირველი თამაში ჩავატარეთ. პირველივე თამაშის შემდეგ ვიცოდით, რომ სახლში განსხვავებული მატჩი გველოდა. გულშემატკივრების გარეშე ვიქნებით, მაგრამ ვეცდებით კარგად ვითამაშოთ.

ნამდვილად გვინდა ამ ტურნირის მოგება და ამისთვის რეალის მსგავსი გუნდების დამარცხება საჭიროა. პირველი თამაშის შემდეგ უპირატესობა გვაქვს, მაგრამ ფეხბურთელები თუ ამაზე ფიქრს დაიწყებენ, დავმარცხდებით“, - თქვა გუარდიოლამ.

სავარაუდო შემადგენლობა:

მანჩესტერ სიტი (4-3-3): ედერსონი, უოლკერი, ფერნანდინიო, ლაპორტი, ჟოაო კანსელო, დე ბრუინი, როდრი, გუნდოგანი, მაჰრეზი, გაბრიელ ჟესუსი, სტერლინგი

რეალი (4-3-3): კურტუა, კარვახალი, ვარანი, ედერ მილიტაო, მენდი, კაზემირო, კროოსი, მოდრიჩი, აზარი, ბენზემა, ვინისიუსი

მსაჯი: ფელიქს ბრიხი (გერმანია)

რა გველის იტალიაში? - იუვენტუსი პირველ შეხვედრაში გამარჯვებულ ლიონს ხვდება. ფრანგულმა კლუბმა სამშობლოში ტურინელები 1:0 დაამარცხა. მატჩამდე იმედიანად გამოიყურება მთავარი მწვრთნელი, რუდი გარსია, რომელსაც სჯერა, რომ შემდეგ ეტაპზე გავა.

“იუვენტუსი შესანიშნავი გუნდია, დიდი ფეხბურთელები ჰყავს, მაგალითად რონალდუ და დიბალა.

მეტოქემ ბოლო პერიოდში 14 თამაში ჩაატარა და უკეთეს რიტმშია, მაგრამ ამან შეიძლება დაღლილობაც გამოიწვიოს. ჩვენ კი პირიქით, რიტმი გვაკლია, სამაგიეროდ დასვნებულები ვართ.

ყველაფერი ჩვენს ხელთაა და ჩვენზეა დამოკიდებული გავალთ თუ არა შემდეგ ეტაპზე“, - თქვა მან.

რუდის გაგება მარტივია, რადგან “ბიანკონერი“ ძველებურად მრისხანე არაა და მიუხედავად იმისა, რომ ზედიზედ მე-9 სკუდეტო მოიგო, დაუძლეველ ბარიერს არ წარმოადგენს. სისუსტე კი, ბევრის აზრით, მაურისიო სარის ბრალია, რომელიც ვერ ყოჩაღობს.

ლიგა 1-ის ბინადრები დანაკლისის გარეშე არიან. ამ კუთხით კი, აპენინელთა რიგებში ეს სიტუაციაა - ჯორჯო კიელინიმ და მერიჰ დემირალმა ახლახან მოიშუშეს მძიმე ტრავმები და ჯერ იდეალურ კონდიციაში არ არიან. სამი ხედირა ლიგის განაცხადში საერთოდ არაა, მატია დე შილიო და დუგლას კოშტა მოედანზე ტრავმების გამო ვერ გავლენ. საეჭვოა პაულო დიბალას საკითხიც, მასაც ტრავმა აქვს.

სავარაუდო შემადგენლობა:

იუვენტუსი (4-3-3): შჩესნი, კუადრადო, დე ლიხტი, ბონუჩი, ალექს სანდრო, ბენტანკური, პიანიჩი, რაბიო, ბერნარდესკი, იგუაინი, რონალდუ

ლიონი (3-5-2): ლოპეში, დენაიერი, მარსელო, მარსალი, დუბუა, კაკერე, გიმარაეში, აუარი, კორნე, დეპაი, დემბელე

მსაჯი: ფელიქს ცვაიერი (გერმანია)

უკაპიტნო რეალი და ლაზარეთად ქცეული იუვენტუსი

იუვეტუსი - ლიონი

მანჩესტერ სიტი - რეალი

ასევე იხილეთ

უახლესი ამბები