ყველა ფეხბურთელი არ აღიარებს, მაგრამ ბევრია ისეთი, რომელსაც გარკვეული რიტუალები თუ ცრურწმენები ახასიათებს, რაც მათი კარიერის თანმდევია. როგორც წესი, მათ ამის აღიარება უჭირთ, მაგრამ გულის სიღრმეში სჯერათ, რომ მათ თამაშზე და შესაძლოა, მატჩის საბოლოო შედეგზეც კი, ეს გავლენას ახდენს:

კრიშტიანუ რონალდუ

გარდა იმისა, რომ პორტუგალიელი სუპერვარსკვლავი, ყოველ თამაშს ახალ-ახალ ვარცხნილობას უხამებდა, 2014 წლის მუნდიალის დროს, რონალდუს მთავარ რიტუალს მოედანზე პირველი შესვლა წარმოადგენდა. მართალია, როგორც წესი გუნდი მოედანზე კაპიტანს გაჰყავს, მაგრამ კრიშტიანუს თავისი გუნდიდან პირველი გასვლა, მხოლოდ მატჩის დაწყების წინ არ სურდა.

კოლო ტურე

არსენალის, მანჩესტერ სიტისა და ლივერპულის ყოფილ ფეხბურთელს, კოლო ტურეს ჩვევად ჰქონდა, რომ როდესაც გუნდები მოედანზე გამოდიოდნენ, თავისი გუნდის რიგში ბოლო უნდა მდგარიყო. 2009 წელს, ჩემპიონთა ლიგის მერვედფინალში არსენალი შინ რომას ეთამაშებოდა. ფეხბურთელის მაშინდელმა თანაგუნდელმა, უილიამ გალასმა პირველი ტაიმის მიწურულს მცირე დაზიანება მიიღო. ექიმები მაქსიმალურად ცდილობდნენ, რომ ფრანგი ფეხზე დაეყენებინათ და მეორე ტაიმში თამაში გაეგრძელებინა. შესაბამისად, გალასი გუნდთან ერთად ვერ გავიდა, რაც კოლოს რიტუალისთვის ხელისშემშლელი ფაქტორი იყო. აღსანიშნავია, რომ ტურემ მოედანზე დაგვიანებით გამოსვლის გამო, ყვითელი ბარათიც კი მიიღო.

ფილ ჯონსი

მანჩესტერ იუნაიტედის ინგლისელმა მცველმა, ფილ ჯონსმა თავად აღიარა, რომ მოედანზე ფეხს იმის მიხედვით დგამს, თუ სად თამაშობს მისი გუნდი. იმ შემთხვევაში თუ, მანჩესტერ იუნაიტედი მეტოქეს "ოლდ ტრაფორდზე" მასპინძლობს, ჯონსი პირველად მარცხენა ფეხს დგამს, ხოლო თუ სტუმრად თამაშობენ, მარჯვენას.

საფრანგეთის ნაკრები

1998 წლის საფრანგეთის ნაკრები და ბლანი-ბარტეზის რიტუალი ყველასათვის კარგად ცნობილია. ლორან ბლანი ფაბიენ ბარტეზს მატჩის დაწყებამდე თავზე კოცნიდა.

2018 წელს კი იღბლის მომტან რიტუალად, არც მეტი, არც ნაკლები, ადილ რამის წვერსა თუ ულვაშზე თითის შეხება და მისი აპრეხა იქცა, რასაც როგორც წესი, უმეტესად გრიზმანი ასრულებდა.

მარიო გომესი

ყველას გემახსოვრებათ მიუნხენის ბაიერნის, შტუტგარტისა და გერმანიის ნაკრების ყოფილი თავდამსხმელი, მარიო გომესი. მისი უცნაური ჩვევა კი იმაში მდგომარეობდა, რომ გასახდელში ის ყველაზე მარცხნივ მდგომ ტუალეტს ირჩევდა და შესაბამისად, სწორედ იმით სარგებლობდა. ერთ დროს ბაიერნის "სუპერ მარიომ" აღნიშნულ თემაზე საუბრისას განაცხადა, რომ ეს ცრურწმენა არ იყო და ამას ის გაუაზრებლად აკეთებდა. ვინ იცის, იქნებ მარიოს მსგავსი ჩვევის რიტუალად აღიარების მოერიდა.

გარი ლინეკერი

ლეგენდარული ინგლისელი თავდამსხმელი და ამჟამად სპორტული მიმომხილველი, გარი ლინეკერი, წინასამატჩო გახურებისას კარში დარტყმასა და გოლების გატანას ერიდებოდა. გარი თვლიდა, რომ ამით ის თავის გოლებს ფლანგავდა და სჯობდა, თავი თამაშზე გამოეჩინა და არა ვარჯიშზე.

ზლატან იბრაჰიმოვიჩი

ზლატან იბრაჰიმოვიჩის რიტუალი თუ ცრურწმენა, რაც არ უნდა გასაკვირი იყოს, სექსზე უარის თქმაა. შვედი ვარსკვლავი მატჩის წინ, სექსით დაკავების წინააღმდეგია. იბრა თვლის, რომ ასეთ დროს, სრული კონცენტრაცია და ენერგია სწორედ საფეხბურთო მატჩისკენ უნდა მიმართო, ხოლო სექსი კი მოიცდის.

ფეხბურთი და ცრურწმენა

უახლესი ამბები