ნიდერლანდების ეროვნული ნაკრების, მილანის, ინტერისა და იუვენტუსის ყოფილი ნახევარმცველი, ედგარ დავიდსი პორტუგალიური კლუბის, ოლანენსეს მთავარ მწვრთნელად დაინიშნა.

47 წლის სპეიალისტი ბოლო რამდენიმე თვის განმავლობაში ერსტე დივიზიის ბინადარი ტელსტარის მთავარი მწვრთნელის, ანდრეის იონკერის თანაშემწედ მუშაობდა. დღეიდან კი ის დამოუკიდებელ სამწვრთნელო კარიერას დაიწყებს.

ოლანენსეში დანიშვნის შესახებ ინფორმაცია ყოფილმა ფეხბურთელმა სოციალურ ქსელში თავად დაადასტურა.

ოლანენსე ამჟამად პორტუგალიის ჩემპიონატის რანგით მესამე დივიზიონში ასპარეზობს და H ჯგუფში 13 ქულით მეოთხე ადგილს იკავებს და ლიდერ ვიტორია სეტუბალს ათი ქულით ჩამორჩება.

ედგარ დავიდსმა პროფესიონალური საფეხბურთო კარიერა აიაქსში, 1991 წელს დაიწყო და ამსტერდამული კლუბის ღირსებას ოთხი სეზონის განმავლობაში იცავდა, რა პერიოდშიც ის სამჯერ გახდა ნიდერლანდების ჩემპიონი და ერთხელ უეფას ჩემპიონთა ლიგის გამარჯვებული.

ასევე, ნიდერლანდელმა კარიერის სხვადასხვა პერიოდში მილანში, იუვენტუსში, ინტერში, ბარსელონაში, ტოტენჰემსა და კრისტალ პალასში ითამაშა. კარიერა კი ბარნეტში დაასრულა, სადაც 2012-14 წლებში ირიცხებოდა და ასევე, მოთამაშე-მწვრთნელის სტატუსს ირგებდა.

ედგარ დავიდსმა პორტუგალიური კლუბი ჩაიბარა

ედგარ დავიდსი ოლანენსეს მთავარ მწვრთნელად დაინიშნა

უახლესი ამბები