დღეს ევროპის ჩემპიონატის B ჯგუფის შეხვედრა გაიმართა, სადაც ერთმანეთს დანიისა და ფინეთის ეროვნული ნაკრებები დაუპირისპირდნენ. ეს მატჩი ფეხბურთის ისტორიას საკმაოდ არასასიამოვნო ფაქტის გამო, სამუდამოდ დარჩება.

როგორც უკვე არაერთხელ მოგახსენეთ, პირველ ტაიმში, რომელშიც უგოლო ფრე დაფიქსირდა, დანიელთა ლიდერი, კრისტიან ერიქსენი მინდორზე უგონოდ დაეცა. მის წინააღმდეგ არც ვარდნა განხორციელებულა და არც შეჯახება ყოფილა. მედიკოსებმა მას პირველადი დახმარება აღმოუჩინეს. ეს პროცესი რამდენიმე წუთს გაგრძელდა. ამ დროს, ფინელი და დანიელი გულშემატკივრები, ერიქსენს ერთად ამხნევებდნენ. შემდეგ ის საკაცით გაიყვანეს და მატჩი დროებით შეჩერდა.

მოგვიანებით გაირკვა, რომ ფეხბურთელი საავადმყოფოში იმყოფებოდა, სადაც მას გამოკვლევები უტარდება. მისი ჯანმრთელობის მდგომარეობა სტაბილურია და სიცოცხლეს საფრთხე აღარ ემუქრება. ის გონზეა და კონტაქტურიც გახლავთ. მატჩი მოგვიანებით განახლდა. მეორე ტაიმში, ფინელებმა ანგარიში მე–60 წუთზე გახსნეს. დანიელებს კი ანგარიშის გათანაბრების შანსი 74–ე წუთზე მიეცათ. მათ თერთმეტმეტრიანის დარტყმის უფლება მოიპოვეს, თუმცა ჰოიბერგმა პენალტი ძალიან ცუდად შეასრულა. მეკარემ ბურთი მოიგერია და ტაბლოზე კვლავ 1:0 ფიქსირდებოდა. ამის შემდეგ, ანგარიში აღარ შეცვლილა.

ფინეთი, რომელიც ამ ჯგუფში ყველაზე სუსტ გუნდად მიიჩნეოდა და ევროპის ჩემპიონატის დებიუტანტია, ისტორიული, პირველი გამარჯვება მოიპოვა. მათ აქტივში სამი ქულა ჩაიწერეს. დანიამ კი საკუთარ მოედანზე მარცხი იგემა. ბუნებრივია, მათთვის დღევანდელი დღე განვითარებული მოვლენებიდან გამომდინარე, ძალიან მძიმე იყო.

ფინეთმა ისტორიული გამარჯვება მოიპოვა

დანია 0–1 ფინეთი

B ჯგუფის შეხვედრა

ასევე იხილეთ

უახლესი ამბები