იტალიის ფეხბურთის ფედერაციის (FIGC) პრეზიდენტის, გაბრიელე გრავინას განცხადებით თუ სალერნიტანა 31 დეკემბრამდე ახალ მყიდველს ვერ იპოვნის, კლუბს სერია ა-დან მოკვეთენ.

თუ მომდევნო 10 დღის განმავლობაში სალერნიტანა ახალ მყიდველს ვერ მოიძიებს, 2022 წლის პირველი იანვრიდან კლუბი სერია ა-დან მოიკვეთება. ვიმედოვნებ, რომ ასე არ მოხდება და კვლავაც მჯერა, რომ კლუბი გამოსავალს იპოვნის. ჩემი პატივისცემა ქალაქ სალერნოსა და გუნდის გულშემატკივრების მიმართ უპირობო რჩება და ეს ნათლად გამოვხატე, როდესაც ამ თემას პირველად მაისში შევეხეთ. შემიძლია ქალაქს მივცე იმედი, მაგრამ ვერავითარ დაპირებას ვერ ვიძლევი. მე უბრალოდ იმ გზას ვინარჩუნებ, რომლითაც აქამდე მოვედით, - განაცხადა გრავინამ.

საგულისხმოა ის ფაქტი, რომ სერია ა-დან მოკვეთის შემთხვევაში, სალერნიტანას ყველა შედეგი გაუქმდება, რაც იმას ნიშნავს, რომ მიმდინარე სეზონში, სხვა კლუბებს სალერნოს გუნდთან მოპოვებული ქულები ჩამოეჭრებათ.

შეგახსენებთ, რომ გუშინ, 21 დეკემბერს, მე-19 ტურის ეგიდით გასამართ შეხვედრაზე, რომელიც სალერნიტანას უდინეზეს წინააღმდეგ უნდა გაემართა, გუნდში გამოვლენილი კორონავირუსის შემთხვევების გამო, კლუბი მატჩზე არ გამოცხადდა, რის გამოც სალერნოელებს ტექნიკური წაგება, 0-3 ჩაეთვლებათ.

19 ტურის შემდეგ, სალერნიტანა სერია ა-ს სატურნირო ცხრილში რვა ქულით ბოლო, მე-20 ადგილს იკავებს.

აქვე იმასაც გეტყვით, რომ სალერნიტანას ღირსებას მიუნხენის ბაიერნისა და საფრანგეთის ეროვნული ნაკრების ყოფილი ნახევარმცველი, ფრენკ რიბერი იცავს. მიმდინარე სეზონში 38 წლის ფეხბურთელმა 12 შეხვედრაში მიიღო მონაწილეობა და ორი საგოლე პასით გამოირჩა.

სალერნიტანას სერია ა-დან მოკვეთა ემუქრება

სალერნიტანას ვადა პირველ იანვრამდე აქვს

სალერნოს კლუბმა სპონსორი უნდა მოიძიოს

უახლესი ამბები