მიმდინარე სეზონში გარეთ ბეილი და ედენ აზარი მადრიდის რეალში საკმაოდ მცირე სათამაშო დროს იღებენ. ბელგიელმა შემტევმა ამ სეზონში მონაწილეობა 16 მატჩში მიიღო და ორი საგოლე გადაცემა შეასრულა. მან მინდორზე სულ 722 წუთი გაატარა, ხოლო უელსელმა მხოლოდ სამ თამაშში იასპარეზა. მოედანზე 193 წუთი გაატარა და ამ დროში ერთი გოლის გატანა მოასწრო.

Marca "სამეფო კლუბის" თავკაცის, კარლო ანჩელოტის განცხადებას ავრცელებს, სადაც ის ამბობს, რომ ფეხბურთელებთან კონფლიქტი არ აქვს და რაც მათ გარშემო ხდება, უცნაური არ არის.

არცერთ ფეხბურთელთან პირადი უთანხმოება არ მაქვს. ბეილთან და აზართან მიმართებაში, უცნაური არაფერი მომხდარა. საქმე იმაშია, რომ გუნდში ძალიან მაღალი კონკურენციაა. მე კი თითოეული მატჩისთვის უნდა ავირჩიო ფეხბურთელი, რომელიც კონკრეტულ მომენტში უკეთეს ფორმაშია.

აზარი ჩვეულებრივ რეჟიმში ვარჯიშობს. ბეილს კი ტრავმის გამო დიდი დრო გაუცდა. ამჟამად ისინი რეალის ფეხბურთელები არიან. გავნმეორდები და ვიტყვი, რომ მათთან უცნაური ან საგანგაშო არაფერი ხდება. მე ვარ მწვრთნელი, რომელიც ცდილობს მიიღოს გადაწყვეტილება, რომელიც კლუბისთვის სასიკეთო იქნება. ეს კი საუკეთესო მოთამაშეების შერჩევასაც გულისხმობს.

შეგახსენებთ, რომ რეალი ლა ლიგის მიმდიანრე გათამაშებას 21 ტურის შემდეგ 49 ქულით ლიდერობს. ანჩელოტის შეგირდებმა ესპანეთის სუპერთასიც მოიგეს. ნახევარფინალში მათ ბარსელონას აჯობეს, ხოლო ფინალში ბილბაოს ატლეტიკს სძლიეს. კარლო ანჩელოტი კი გახდა პირველი იტალიელი მწვრთნელი, რომელიც ამ ტიტულს დაეუფლა.

ანჩელოტი: "ბეილთან და აზართან მიმართებაში, უცნაური არაფერი მომხდარა"

ანჩელოტის აზართან და ბეილთან კონფლიქტი არ აქვს

უახლესი ამბები