თბილისის დროით 00:00 საათზე ჩემპიონთა ლიგის მიმდინარე სეზონის გათამაშება მერვედფინალური ეტაპის მატჩებით განახლდება. დღეს ორი შეხვედრა გაიმართება. პსჟ მადრიდის რეალს უმასპინძლებს და რა თქმა უნდა, ეს დღის ცენტრალური დაპირისპირება იქნება, ხოლო პარალელურად სპორტინგი მანჩესტერ სიტის საკუთარ მოედანზე მიიღებს.

ცხადია, ჩემპიონთა ლიგის 13–გზის გამარჯვებულისა და ლიგა 1–ის ლიდერის შეხვედრა განსაკუთრებულ ინტერესს იწვევს. ოფიციალურ დონეზე ამ გუნდების დაპირისპირება არაერთხელ გამართულა. სულ ისინი ერთმანეთს რვაჯერ შეხვდნენ, საიდანაც ფრანგულმა კლუბმა მეტოქის დამარცხება მხოლოდ ორჯერ შეძლო, ორი შეხვედრა ფრედ დასრულდა, დანარჩენ ოთხში კი მადრიდელებმა იმარჯვეს.

ჩემპიონთა ლიგის მერვედფინალში პსჟ და რეალი ერთმანეთს 2017/18 წლების სეზონში შეხვდნენ და მაშინ, ორი მატჩის ჯამში "სამეფო კლუბმა“ გაიმარჯვა. მეტიც, ესპანელებმა მეტოქეს ორივე მატჩი მოუგეს და საერთო ანგარიშით 5-2 სძლიეს (შინ 3-1, სტუმრად 2-1).

საინტერესოა, რომ რამდენიმე დღის წინ ორივე გუნდი საკუთარი ქვეყნის სათასო გათამაშებიდან გამოვარდა. მადრიდის რეალი ბილბაოს ატლეტიკმა მეოთხედფინალიდან გამოთიშა. ხოლო, პარიზელები საფრანგეთის თასის მერვედფინალში ნიცასთან, პენალტების სერიაში დამარცხდნენ.

მოგახსენებთ, რომ პსჟ A ჯგუფში გამოდიოდა, სადაც მეტოქედ მანჩესტერ სიტი, ლაიპციგი და ბრიუგე ჰყავდა. ფრანგებმა მეორე ადგილი დაიკავეს, ხოლო პირველობა "ქალაქელებმა" არავის დაუთმოს. "სამეფო კლუბი" კი D ჯგუფის გამარჯვებული გახდა. მას კონკურენციას ინტერი, შერიფი და შახტარი უწევდნენ.

წინასამატჩო პრესკონფერენციები უკვე გაიმართა. მთავარი მწვრთნელები ოპტიმისტურ განწყობაზე არიან. მათ საკუთარი ფეხბურთელების სჯერათ და გამარჯვების მოლოდინი აქვთ.

კარლო ანჩელოტი: "ერთადერთი ზეწოლა, რომელსაც ახლა განვიცდით, არის ის ფაქტი, რომ ვთამაშობთ ისეთი დიდი და ძლიერი გუნდის წინააღმდეგ, როგორიცაა პსჟ. შეიძლება ითქვას, რომ ჩვენ ეს მოტივაციად ვაქციეთ და რეალურად ამას ისე არ აღვიქვამთ, როგორც ზეწოლა. მოსამზადებლად რთული ეტაპი არ გაგვივლია, რადგან ყველა ფეხბურთელი ამ თამაშს ისედაც დიდი შემართებით ხვდება. ორივე გუნდი ეცდება, რომ ბურთზე კონტროლი დაამყაროს. ეს რეალსაც უყვარს და პსჟ–საც. ჩვენი ფეხბურთი ერთმანეთს ჰგავს. ასეთი დაპირისპირება, ჩემპიონთა ლიგის მერვედფინალური ეტაპისთვის საკმარისად კარგია. ჩვენ მზად ვართ, რომ მიზნის მისაღწევად, მსოფლიოს ერთ–ერთი საუკეთესო გუნდი დავამარცხოთ".

კარიმ ბენზემა: "მბაპეს წინააღმდეგ თამაში ჩემთვის საინტერესო იქნება. მესი? ის არაჩვეულებრივი ფეხბურთელია. ხალხი მისგან ბევრ გოლს ელის, მაგრამ მე დავინახე, რომ მას გაცილებით მეტის გაკეთება შეუძლია. მის წინააღმდეგ ბევრჯერ მითამაშია და ხვალ ამ ისტორიას მორიგი თავი შეემატება. რაც შეეხება ნეიმარს, ჩემთვის უცნობია, არის თუ არა ის სრულად მზად, მაგრამ მათთვის კარგი ამბავია, რომ გუნდს უკვე დაუბრუნდა".

🔄 #UCL 🔄 pic.twitter.com/o64sN5eVQg
— Real Madrid C.F. (@realmadrid) February 14, 2022

მარკინიოსი: "ეს თამაში ძალიან მნიშვნელოვანია. ჩვენ საკუთარ მოედანზე ვთამაშობთ და ყველაფერს გავაკეთებთ, რომ გავიტანოთ ბევრი გოლი და გამარჯვება ვიზეიმოთ. ეს მერვედფინალური ეტაპის პირველი დაპირისპირებაა და კარგი დასაწყისი, ყოველთვის წარმატების საწინდარია".

მაურისიო პოჩეტინო: "პარიზში ჩვენ მხოლოდ გამარჯვებისკენ ვისწრაფვით. მართალია, ამ ეტაპზე ჩვენ არ გვაქვს ისეთი გამოცდილება და ისტორია, როგორც რეალს ჩემპიონთა ლიგაზე, მაგრამ არც აუტსაიდერის როლში ყოფნას ვაპირებთ. მე მჯერა ჩემი გუნდის შესაძლებლობების. პატივს ვცემ მადრიდის რეალს. ის მსოფლიოს ერთ–ერთი უდიდესი კლუბია, რომელმაც ყველაფერი არაერთხელ მოიგო, თუმცა ჩემი აზრით, დღეს ფავორიტი არ არსებობს. იმის გათვალისწინებით თუ რა დონის ფეხბურთელები თამაშობენ ორივე გუნდის რიგებში, შესაძლოა ეს მატჩი ფინალის ტოლფასი იყოს".

David Beckham : « Je n'ai gardé que des bons souvenirs » 🗣️

L'ancien parisien est revenu sur son passage dans la capitale et évoque le choc des 8️⃣es de finale de @ChampionsLeague. 🏆#PSGRM pic.twitter.com/4tpnnUyyev
— Paris Saint-Germain (@PSG_inside) February 14, 2022

როგორც ცნობილია, მადრიდის რეალის ყოფილი კაპიტანი, სერხიო რამოსი, რომელიც ამჟამად პსჟ–ს ღირსებას იცავს, ამ დაპირისპირებას ტრავმის გამო გამოტოვებს. ის ბოლომდე მზად არ არის. რაც შეეხება ნეიმარს, დიდი ალბათობით ის მოედანზე 90 წუთის გასატარებლად მზად არ იქნება, თუმცა შესაძლოა გარვეული დრო მასაც მიეცეს. საყურადღებოა, რომ იმ შემთხვევაში თუ აღნიშნულ დაპირისპირებაში მსაჯი კაზემიროს ან მენდის ყვითელი ბარათებით გააფრთხილებს, ისინი საპასუხო შეხვედრას გამოტოვებენ.

სავარაუდო შემადგენლობები

პსჟ: ნავასი, ჰაკიმი, მარკინიოსი, კიმპემბე, ნუნო მენდესი, დანილო, პარედესი, ვერატი, დი მარია, მესი, მბაპე.

რეალი: კურტუა, კარვახალი, მილიტაო, ალაბა, მენდი, კროოსი, კაზემირო, მოდრიჩი, ასენსიო, ბენზემა, ვინისიუსი.

პრევიუ | პსჟ VS რეალი

00:00 საათზე ჩემპიონთა ლიგა მერვედფინალური ეტაპით განახლდება

პსჟ რეალს უმასპინძლებს

უახლესი ამბები