რამდენიმე საათის წინ იტალიის სერია ა-ს მეორე ტურის ეგიდით გამართული მორიგი მატჩი ნაპოლისა და მონცას შორის დასრულდა, სადაც მასპინძლებმა 4:0 იმარჯვეს. აქედან კი ორი ეფექტური გოლი 21 წლის ქართველი შემტევის, ხვიჩა კვარაცხელიას ანგარიშზეა. ამჟამად მას სერია ა-ში სამი გოლი და ერთი საგოლე გადაცემა უფიქსირდება. "კვარას" ბრწყინვალე თამაშს უცხოურ მედიაში დიდი გამოხმაურება მოჰყვა და არც ნაპოლის ოფიციალურმა საიტმა დააყოვნა.

ვარსკვლავი დაიბადა! "სტადიო მარადონაზე" სეზონის სადებიუტო შეხვედრაში ის ცისფერ ცაზე კაშკაშებდა. ხვიჩას აქვს რთული სახელი, მაგრამ უსაზღვროდ დიდი ნიჭი. სწორედ ამიტომ, შეგიძლიათ უბრალოდ "კვარა" დაუძახოთ.

ქართველი ფეხბურთელი თამაშის დაწყებიდან ზუსტად ნახევარ საათში უკვე ნეაპოელების გულებში აღწევს. ჩვენ 4:0 მოვიგეთ და ორ ტურში ცხრა გოლი გავიტანეთ. აქედან კი სამი "კვარას" ანგარიშზეა.

მას უწოდეთ ქართველი ან უბრალოდ ფენომენი. ეს "სტადიო მარადონაზე" ხვიჩა კვარაცხელიას დიდების პირველი საღამო იყო. ცისფერ ცაზე ვარსკვლავი დაიბადა და ისტორია უკვე დაწერილია!

ხვიჩას შექება არც ნაპოლის მთავარ მწვრთნელ, ლუჩიანო სპალეტის დავიწყებია.

ეს ძალიან კარგი თამაში იყო. ჩვენ გამოვავლინეთ არა მხოლოდ ძალა, არამედ კარგი ბალანსიც. ჩვენ თითქმის სრულად ვაკონტროლებდით მატჩს, მაგრამ რამდენიმე კარგი მომენტი ვერ გამოვიყენეთ. ბურთის შენარჩუნებას ვახერხებთ, თუმცა ზოგიერთ მომენტში უფრო მეტს უნდა მივაღწიოთ.

"კვარა" არის ტალანტი, რომელსაც შეუძლია, რომ თავისი შესაძლებლობები კიდევ უფრო მეტად გააუმჯობესოს. ეს მისი მაქსიმუმი არ არის. მას შესწევს უნარი, რომ საკუთარი თავი უფრო მაღალ დონეზე აიყვანოს.

ის კარგად გრძნობს თამაშს და ხშირად საჭირო ზეწოლასაც ახდენს. მნიშვნელოვანია, რომ ხვიჩა არის საკმაოდ ძლიერი მოთამაშე, რომელსაც ასევე აქვს შესანიშნავი სტატისტიკა, რომელიც ციფრებშიც გამოიხატება.

ნაპოლის საიტი კვარაცხელიაზე: "ვარსკვლავი დაიბადა"

ხვიჩას ბრწყინვალე მატჩს დიდი გამოხმაურება მოჰყვა

უახლესი ამბები