ახალგაზრდა ქართველი შემტევი, ხვიჩა კვარაცხელია ნაპოლისთან ერთად ახალ სეზონს ბრწყინვალედ იწყებს. "კვარადონამ" სერია ა-ს ორ მატჩში სამი გოლის გატანა მოახერხა და აქტივში საგოლე გადაცემაც ჩაიწერა. მასზე უცხოური გამოცემები აქტიურად საუბრობენ და დამსახურებულად აქებენ. The Athletic-მა 21 წლის ქართველს საინტერესო სტატია მიუძღვნა.

ქობულეთში, შავი ზღვის სანაპიროზე არსებობს კლუბი შუქურა, რომელიც საქართველოს მეორე დივიზიონში გამოდის. ეს გუნდი "ჩელე არენაზე" თამაშობს. ამ სტადიონს ეს სახელი რევაზ ჩელებაძის პატივსაცემად ჰქვია. ის ამ ქალაქის ცნობილი შვილია და 1978 წელს, თბილისის დინამოსთან ერთად საბჭოთა კავშირის ჩემპიონობა იზეიმა. მეტსახელი "ჩელე" პელეს მსგავსი მეტსახელი გახლავთ. ჩელებაძე სწორედ ამით იყო ცნობილი.

"ნუ დავივიწყებთ იმ ფაქტს, რომ ქართველი ფეხბურთელები მაღალი დონის ტექნიკით მუდამ გამოირჩეოდნენ. საბჭოთა კავშირში მათ ბრაზილიელებსაც უწოდებდნენ", - ამბობს იური სიომინი რომელიც ძველი რუსული სამწვრთნელო სკოლის წარმომადგენელია და მას ეროვნული ლიგის მიმართ ინტერესი ყოველთვის ჰქონდა. მან მოსკოვის ლოკომოტივში ყოფნის დროს, შეამჩნია ახალგაზრდა ტალანტი, რომელიც რუსთავში თამაშობდა. მის გვარში გვხვდება სიტყვა "ცხელია" და ყველამ, ვინც მისი თამაში ნახა ნამდვილად გაიგო თუ რას ნიშნავს ეს. ის მართლაც იმდენად ცხელია, რომ მასთან შეხებას მეტოქეები ვერ ახერხებენ.

ეს ბიჭი ერთ მატშჩი საშუალოდ ათზე მეტ დრიბლინგს ანხორციელებდა და სტატისტიკურ ვებ-გვერდებს, რომლებიც სწორედ სტატისტიკას აღრიცხავენ ეგონათ, რომ დრიბლინგების დამთვლელი ხელსაწყო გაუფუჭდათ.

რჩება შთაბეჭდილება, რომ თბილისის დინამომ "კვარინჩა" აღმოაჩინა. სიომინმა კვარაცხელია მოსკოვში წაიყვანა. რუსი სპეციალისტი ამბობს, რომ ხვიჩას თვალს 15 წლიდან ადევნებს და ფეხბურთელი მის გაოცებას დღემდე ახერხებს.

კვარაცხელია ნაპოლიში 77-ნომრიან მაისურს დასჯერდა. მას კი "კვარადონა" შეარქვეს, თუმცა ეს მანამდე მოხდა, სანამ ის ნაპოლის ფეხბურთელი გახდებოდა. ეს კი იმიტომ, რომ ხვიჩამ შეასრულა სიმღერა Live is Life, რომლის ფონზეც წლების წინ დიეგო მარადონა ხურდებოდა. ნეაპოელებმა კი სავარაუდოდ კვარაცხელიას გვარის წარმოთქმას თავი აარიდეს, რადგან ის ენის გასატეხს ჰგავს.

ხვიჩამ პრესკონფერენციაზე აღნიშნა, რომ კარგად იცის თუ რას ნიშნავს მარადონა ნეაპოელთათვის და მისთვის დიდი პასუხისმგებლობაა ის ფაქტი, რომ კვარაცხელიას მარადონასთან ერთად ახსენებენ. თავისუფლად შეიძლებოდა, რომ ხვიჩასთვის ეს ყველაფერი ტვირთი გამხდარიყო, რომელსაც ვერ გაუმკლავდებოდა. როცა 21 წლის ასაკში შენზე უდიდეს იმედებს ამყარებენ, ეს მარტივი ფსიქოლოგიური თვალსაზრისითაც კი არ არის, რადგან იცი, რომ შეცდომის დაშვების უფლება არ გაქვს.

თითქოს ეს ყველაფერი საკმარისი არ იყო, ამას ის საუბრებიც დაემატა, რომ კვარაცხელია ნაპოლიმ ინსინიეს შემცვლელად იყიდა, რომელიც კლუბის კაპიტანი გახლდათ, ხოლო ყველა დროის საუკეთესო ბომბარდირთა სიაში კი მეორე ადგილზეა. ცხადია, ეს დიდ წნეხს ნიშნავს.

სპალეტი ამბობდა, რომ მატჩის დაწყებამდე ხვიჩა ძალიან დაძაბული იყო და როცა მას ეს დაძაბულობა მოეხსნება, სწორედ მას შემდეგ ვნახავდით თუ რა ფეხბურთელი იყო ის რეალურად, მაგრამ თუ დაძაბული ხვიჩა ასე ექცევა მცველებს, რთული წარმოსადგენია რას გააკეთებს ის, როცა წნეხისგან სრულად გათავისუფლდება.

კვარაცხელიას თამაშის წაკითხვა ზუსტად ისეთვე რთულია, როგორც ასომთავრული, ნუსხური და მხედრული დამწერლობის გამოყენებით მისი სახელისა და გვარის დაწერა. ხვიჩასთვის პრობლემა არაა, რომ მეტოქეებს სისწრაფის ხარჯზე აჯობოს. სწორედ ამიტომ, არაა გამორიცხული, რომ რუიმ მისი მისამართით გრძელი პასები ხშირად შეასრულოს.

ხვიჩა რომ ჩახვეულ დარტყმებს ბრწყინვალედ ასრულებს და მოედნის ცენტრისკენ შეჭრაც კარგად გამოსდის, ამის ნათელი მაგალითი მონცასთან მატჩში სულ რამდენიმე დღის წინ ვიხილეთ.

ნაპოლის ორი ტურის შემდეგ ექვსი ქულა უგროვდება და სატურნირო ცხრილს სათავეში უდგას. სპალეტის შეგირდები 28 აგვისტოს სტუმრად ფიორენტინას დამარცხებას ეცდებიან, ხოლო "კვარადონა" ამჟამად სამი გოლით ბომბარდირთა დავას ლიდერობს.

"კვარაცხელია - ნაპოლის ქართველი მარადონა, რომელიც მეტისმეტად ცხელია რომ გაუმკლავდე"

The Athletic-მა კვარაცხელიას სტატია მიუძღვნა

უახლესი ამბები