ბორის პაიჭაძის სახელობის "დინამო არენაზე" სლავა მეტრეველის სახელობის, 2023 წლის საქართველოს სუპერთასის ფინალური დაპირისპირება გაიმართა, რომელიც დინამო თბილისის გამარჯვებით დასრულდა და თბილისურმა კლუბმა ტიტული ისტორიაში მეცხრედ მოიგო.

შეხვედრის პირველი ნახევარი დინამო ბათუმის უპირატესობით წარიმართა. მიუხედავად იმისა, რომ ბურთის ფლობის პროცენტული მაჩვენებელი თანაბარი გახლდათ, მეტოქის კარს უფრო სახიფათოდ ბათუმელები უტევდნენ, რამაც შედეგი 25-ე წუთზე გამოიღო. გია გეგუჩაძის შეგირდებმა თბილისელთა საჯარიმოსთან მრავალსვლიანი კომბინაცია გაითამაშეს, რომელიც ჯოვინო ფლამარიონის ზუსტი დარტყმით დასრულდა. საგოლე პასი კი აქტივში ივან ლიტვინენკომ მიითვალა.

მეორე ტაიმი დინამო თბილისმა ორმაგი ცვლილებით დაიწყო. გიორგი ჭიაბრიშვილი ფლანგის მცველები, ნიკა მალი და დავით კობოური მოხსნა. მათ ნაცვლად კი თამაშში ლუკა ლაკვეხელიანი და გიორგი მაისურაძე ჩართო. შედეგად, დედაქალაქელებმა შეტევაში აქტიურობას უმატეს. ბათუმელებმა კი აქცენტი კარის დაცვაზე გააკეთეს. პირველი სახიფათო იერიში კი ბათუმელებმა 61-ე წუთზე განახორციელეს. მარცხენა ფლანგიდან ლიტვინენკო ჩაწოდებას ცდილობდა, მაგრამ ბურთი კარისკენ აიჭრა, რომელიც გიორგი ლორიამ მოიგერია. დაახლოებით ორ წუთში კი თბილისელებმა საპასუხო იერიში განახორციელეს, რომელიც იმრანის დარტყმით დასრულდა, თუმცა ჩიჩკანმა ბურთის დაუფლება მარტივად მოახერხა.

77-ე წუთისთვის დინამო თბილისის ფეხბურთელებმა კუთხურის მოწოდების უფლება მოიპოვეს. ჩაწოდებულ ბურთზე კი ყველას გაბრიელ სიგუამ დაასწრო, რომელიც მოედანზე 63-ე წუთზე ულად ომარის ნაცვლად შემოვიდა და მეტოქის კარი თავური დარტყმით აიღო.

საბოლოოდ კი საქმე პენალტების სერიამდე მივიდა, რომელიც უკეთ თბილისელებმა შეასრულეს და 4-3 იმარჯვეს.

შეგახსენებთ, რომ 2023 წლის სუპერთასი განახლებული ფორმატით პირველად გაიმართა. ოთხთა ტურნირის ფარგლებში ორივე დინამომ ფინალის საგზური პენალტების სერიაში გამარჯვებით მოიპოვა. თბილისელებმა გორის დილას, ხოლო ბათუმელებმა ქუთაისი ტორპედოს დამარცხება შეძლეს.

აქვე დავძენთ, რომ მატჩი მესამე ადგილისთვის, რომელიც გორის დილასა და ქუთაისის ტორპედოს შორის გაიმართა და ძირითადი ფრედ, 0-0 დასრულდა, ქუთაისელებმა პენალტების სერიაში 5-4 გაიმარჯვეს და ტურნირზე მესამე ადგილი დაიკავეს.

დინამო ბათუმის სპონსორია კროკო!

დინამო თბილისი საქართველოს სუპერთასის გამარჯვებულია

დინამო თბილისმა პენალტების სერიაში იმარჯვა

უახლესი ამბები