რამდენიმე წლიანი პაუზის შემდეგ, ვალტერ მაცარი ნაპოლის მთავარი მწვრთნელის რანგში დაბრუნდა და პირველი შეხვედრა 25 ნოემბერს, სერია ა-ს მე-13 ტურის ეგიდით სტუმრად ატალანტასთან გამართა. იტალიის ჩემპიონმა 1:2 იმარჯვა. ნეაპოლური კლუბის რიგებიდან გატანილი გოლებით თავი კვარაცხელიამ და ელმასმა გამოიჩინეს.

ვალტერ მაცარიმ მოგებული შეხვედრა შეაფასა:

კვარაცხელია ჩვენთან მხოლოდ რამდენიმე დღე იყო. ამიერიდან, უფრო მეტი დრო მექნება მასთან სამუშაოდ. პირველ ტაიმში მინდორზე ვდომინირებდით. უკმაყოფილო იმით ვიყავი, რომ მეორე გოლის გასატანად საკმარისი შანსი არ გვეძლეოდა.

მეგონა, რომ მეორე ნახევარში უფრო მძლავრად დავიწყებდით, თუმცა ატალანტამ რიგ ეპიზოდებში გვაჯობა და საკმაოდ ეფექტურად გამოიყურებოდა. რაღაც დავთმეთ და საჭირო ტემპს ვერ ვაკონტროლებდით. ამ თვალსაზრისით, რაღაცის გადახედვა მომიწევს. საწყისი 15 წუთის ჩანაწერს ხელახლა უნდა ვუყურო და გარკვეული მომენტები გავაანალიზო.

ატალანტა ძლიერი გუნდია და მისი სტუმრად დამარცხება ყოველთვის რთულია. ჩემი ბიჭების თამაშით საბოლოო ჯამში კმაყოფილი ვარ. ისინი ბოლომდე იბრძოდნენ და აჩვენეს, რომ მოედანზე მხოლოდ მოსაგებად იყვნენ გამოსულები. ვფიქრობ, კონტროლი არ დაგვიკარგავს.

ბოლო დღეების განმავლობაში, კარგი განცდები დამეუფლა. ჯერ დასკვნების გაკეთება ნაადრევია, მაგრამ ვფიქრობ, რომ ფეხბურთელებთან ისეთი დამოკიდებულება, როგორც დღეს მოედანზე იყო, საბოლოოდ კარგ ურთიერთობას ჩამოაყალიბებს.

ჩვენ უნდა გავაგრძელოთ საკუთარ თავზე მუშაობა. ნაპოლი იტალიის ჩემპიონია და ჩვენგან ბევრს ელიან. ახლა დეტალებს მაქსიმალური ყურადღება უნდა მივაქციოთ. წინ დიდი გამოწვევა გველოდება. საკმაოდ რთული და საინტერესო შეხვედრები უნდა ჩავატაროთ. რაც შეეხება ოსიმენს, არ არის საჭირო იყო ნაპოლის მწვრთნელი, რათა გესმოდეს თუ რამდენად საჭირო და მნიშვნელოვანი ფიგურაა ის გუნდისთვის. ამჟამად მას შეზღუდული სათამაშო დრო აქვს, მაგრამ როცა მოედანზე გამოვიდა, თავი შესანიშნავად წარმოაჩინა. მან კარგად იცის, რომ ჩვენ ის გვჭირდება.

მაცარი: "ჩემი ბიჭების თამაშით კმაყოფილი ვარ - კვარაცხელიასთან სამუშაოდ მეტი დრო მექნება"

მაცარი ნაპოლიში გამარჯვებით დაბრუნდა

უახლესი ამბები