26 ივნისს, გერმანიაში მიმდინარე ევროპის ჩემპიონატზე, F ჯგუფში დასკვნითი ტურის შეხვედრები გაიმართება - ჰამბურგის "ფოლკსპარკშტადიონზე" ჩეხეთის ნაკრები თურქეთს დაუპირისპირდება, ხოლო გელზენკირხენის "არენა აუფშალკეზე" საქართველოსა და პორტუგალიის მატჩი შედგება. ორივე შეხვედრა სტარტს 23:00 საათიდან აიღებს.

განვლილი ორი ტურის შემდეგ, ჯგუფს პორტუგალიის ნაკრები ექვსი ქულით ლიდერობს და პლეი ოფში თამაში პირველი ადგილით აქვს გარანტირებული. მეორე პოზიციაზეა თურქეთი, რომელსაც სამი ქულა აქვს და მესამე ტურში, ჩეხეთთან ფრეც ჰყოფნის, რომ მერვედფინალში მეორე ადგილით გავიდეს. თავის მხრივ კი ჩეხებს ერთი ქულა აქვთ და საქართველოსთან ერთად, მესამე - მეოთხე ადგილებს იყოფს. ასევე, უნდა აღინიშნოს, ჩეხეთსაც და საქართველოსაც პლეი ოფში გასვლის შანსი აქვთ და თეორიულად ისიც შესაძლებელია, რომ ერთ-ერთი მათგანი მომდევნო ეტაპზე ორი ქულითაც გადავიდეს.

მიმდინარე ევრო 2024-ზე გამოსვლა ჩეხეთის ეროვნულმა გუნდმა ტურნირის ერთ-ერთ ფავორიტთან, პორტუგალიასთან მძიმე ბრძოლაში მარცხით დაიწყო. მეორე ტურში კი ივან ჰაშეკის გუნდმა საქართველოსთან ფრედ, 1-1 ითამაშა და რომ არა ბოლო წამებზე საბა ლობჟანიძის მიერ აცილებული ბურთი, ჩეხები ახლა საერთოდ უქულოდ იქნებოდნენ. რაც შეეხება თურქეთის ნაკრებს, მათ ევრო 2024-ზე საშინელი სტარტი აიღეს და პორტუგალიასთან 0-3 განადგურდნენ. თუმცა შემდეგ, ხასიათი საქართველოსთან მატჩში გამოისწორეს და ჩვენი გუნდი 3-1 დაამარცხეს. მაგრამ, ისიც უნდა ითქვას, რომ თურქებს "ჯვაროსნების" დასამარცხებლად დიდი ძალისხმევის გაღება დასჭირდათ.

ჩეხეთისა და თურქეთის ეროვნულ გუნდებს ერთმანეთის წინააღმდეგ აქამდე 11-ჯერ უთამაშიათ, მაგრამ ხშირ შემთხვევებში მათი დაპირისპირება ამხანაგური ხასიათის იყო. ასეთი კი შვიდი შეხვედრაა, საიდანაც ოთხი ჩეხეთის ნაკრებმა მოიგო, ერთი მატჩი ფრედ დასრულდა და ორჯერ თურქებმა გაიმარჯვეს.

დიდ ტირნირებზე თურქეთისა და ჩეხეთის ნაკრებების გზა პირველად 2008 წლის ევროპის ჩემპიონატზე გადაიკვეთა და მაშინაც, ისინი ერთამნეთს ჯგუფური ეტაპის მესამე ტურში შეხვდნენ, ის მატჩი თურქებმა 3-2 მოიგეს და პლეი ოფში მეორე ადგილით გავიდნენ. საინტერესოა ის ფაქტიც, რომ ევრო 2008-ზე თურქებსა და ჩეხებს ჯგუფში ამჟამინდელეივით პორტუგალიის ნაკრებიც ჰყავდათ. ხოლო, მეოთხე გუნდი შვეიცარია იყო, რომელმაც ტურნირზე გამოსვლა ბოლო ადგილზე დაასრულა და ჩეხებთან ერთად ჯგუფში ჩარჩა.

2016 წლის ევროპის ჩემპიონატის საკვალიფიკაციო ეტაპზე ჩეხეთი და თურქეთი ერთ ჯგუფში იმყოფებოდნენ და მათი ურთიერთშეხვედრები ორივე შემთხვევაში სტუმარი გუნდის გამარჯვებით დასრულდა. საბოლოოდ კი კონტინენტის პირველობაზე თამაშის უფლება ორივემ მოიპოვა და ისე მოხდა, რომ რვა წლის წინაც ეს გუნდები წილისყრამ ისევ ერთ ქვეჯგუფში გაუშვა. გამარჯვება კი ისევ თურქებს დარჩათ, თუმცა მომდევნო ეტაპზე გასვლა ვერცერთმა მათგანმა შეძლო.

კაან აიჰანი (თურქეთის ნაკრების მცველი):

გულწრფელად გითხრათ, მიმდინარე ევროპის ჩემპიონატზე გონებაში სხვა სცენარი წარმომედგინა. გვსურდა, რომ პლეი ოფის საგზური ჩეხეთთან მატჩამდე გაგვენაღდებინა, ისევე, როგორც ეს ევრო 2008-ზე მოხდა, მაგრამ სამწუხაროდ, ასე არ მოხდა.

ახლა შეგვიძლია, რომ ჩეხეთთან ის ისტორიული (ევრო 2008. თურქეთი 3-2 ჩეხეთი) მატჩი გავიმეოროთ ან უფრო უკეთესი შედეგიც ვაჩვენოთ. აქ, გერმანიაში ჩვენი შესანიშნავი გულშემატკივრის წინაშე დიდი წარმატების მიღწევა გვსურს.

რობინ ჰრანაჩი (ჩეხეთის ნაკრების მცველი):

ყველამ ერთად უნდა ვეცადოთ, რომ ჩვენი ტაქტიკური მონახაზი შევინარჩუნოთ, ვიყოთ ძლიერები, კონცენტრირებულები და ყველა ბურთის მოსაგებად ვიბრძოლოთ. ასევე, მოგვიწევს, რომ თურქი გულშემატკივრების მიერ შექმნილ ატმოსფეროს გავუმკლავდეთ, რომელსაც თურქეთის ჩემპიონატიდან კარგად ვიცნობ.

ამ ევროპის ჩემპიონატზე ყველა ნაკრებს ჰყავს ფეხბურთელები, რომლებსაც ინდივიდუალურად უმაღლეს დონეზე თამაში შეუძლიათ და ასეა თურქეთის ნაკრებშიც. ამ ეტაპზე არავის გამოვყოფდი, რადგან რამდენჯერაც ვღაცის გვარი დავასახელე, იმდენჯერ სხვა მოთამაშეებმა უფრო გაიბრწყინეს.

სავარაუდო შემადგენლობები:

ჩეხეთი:

ინდრიხ სტანეკი, ტომაშ ჰოლეში, რობინ ჰრანაჩი, ლადისლავ კრეიჩი, ვლადიმირ ცოუფალი, ტომაშ სოუჩეკი, ანტონინ ბარაკი, ლუკაშ პროვოდი, დავიდ დუდერა, ადამ ჰლოჟეკი, ონდრეი ლინგრი

თურქეთი:

მერტ გიუნოკი, ფერდი კადიოღლუ, კაან აიჰანი, მერიჰ დემირალი, მერტ მიულდური, ისმაილ იუკსეკი, ჰაკან ჩალჰანოღლუ, კენან ილდიზი, არდა გიულერი, კერემ აკთურქოღლუ, ბარიშ ალპერ ილმაზი

დიდი ალბათობით, ჩეხეთის ნაკრებს მთავარი თავდამსხმელი, პატრიკ შიკი ვერ დაეხმარება, რომელმაც ტრავმა საქართველოსთან მატჩის დროს მიიღო და მოედნის ნაადრევად დატოვებაც მოუხდა. ხოლო, თურქეთის ნაკრებში დისკვალიფიკაციის გამო აბდულქერიმ ბარდაკჯი ვერ ითამაშებს, რომელმაც განვლილ ორ ტურში ორი ყვითელი ბარათი მიიღო.

შეხვედრის მთავარი არბიტრი 39 წლის რუმინელი, იშტვან კოვაჩი იქნება.

პრევიუ | ჩეხეთი VS თურქეთი

თურქეთს პლეი ოფში გასასვლელად ფრეც ჰყოფნის

ჩეხეთი პირველი გამარჯვების მოპოვებას ეცდება

უახლესი ამბები