საქართველოს 21-წლამდელთა ნაკრები დღეს, ცხრა სექტემბერს ევროპის ჩემპიონატის შესარჩევი ციკლის მორიგ მატჩს, თბილისის დროით 22:00 საათზე სტუმრად ნიდერლანდებთან გამართავს.

რამაზ სვანაძის გუნდს, გასული ექვსი ტურის შემდეგ, ჯგუფში 16 ქულა აქვს და მეორე ადგილზე იმყოფება. 13 ქულით შვედეთი მესამე ადგილს იკავებს, რომელიც 10 სექტემბერს სტუმრად მოლდოვას დაუპირისპირდება. ჯგუფში პირველ პოზიციაზე 24 ქულით ნიდერლანდები იმყოფება.

რამაზ სვანაძე (მთავარი მწვრთნელი)

განწყობა დადებითია, რადგან წლების შემდეგ, ახლა ბევრად მეტი შანსი გვაქვს, რომ შესარჩევი ეტაპიდან შევძლოთ ევროპის ჩემპიონატზე თამაშის უფლება. ნიდერლანდებთან ურთულეს მატჩს ველოდებით. ძალიან კარგად ვაცნობიერებთ თუ ვის ვუპირისპირდებით.

ჩვენ ვიცით რა დონის ფეხბურთელები ჰყავთ ნიდერლანდელებს და რა გამოცდილება უმაგრებთ ზურგს. ეს განსაკუთრებით ძლიერი გუნდია მაშინ, როცა საშინაო მატჩს ატარებს.

ჩვენ ჩვენი გეგმები გვაქვს და ვეცდებით, რომ შანსები მაქსიმალურად გამოვიყენოთ. ამ თამაშში შეცდომის დაშვების უფლება არ გვაქვს. ნიდერლანდების ნაკრები ნებისმიერ შეცდომაზე რეაგირებს და მათი მხრიდან მოწინააღმდეგის მყისიერი დასჯა ხდება. სამწვრთნელო შტაბი დიდი ინტერესით ველით იმას თუ როგორ წარმოაჩენენ ჩვენი ფეხბურთელები თავს ასეთი მეტოქის წინააღმდეგ.

ამ მეტოქესთან ერთი თამაში უკვე ჩავატარეთ და დიდი ანგარიშით დავმარცხდით. მიზანი ისაა, რომ დავინახოთ თუ როგორ გამოიყურებიან ერთი წლის გასვლის შემდეგ ჩვენი ფეხბურთელები. დადებითი შედეგის დაფიქსირება მნიშვნელოვანია და ჩვენ ბოლომდე ვიბრძოლებთ.

ლუკა გაგნიძე (21-წლამდე ნაკრების ფეხბურთელი)

ეს თამაში ძალიან რთული იქნება. მათთან ბოლო შეხვედრა 3:0 წავაგეთ, თუმცა არ იყო ისეთი სურათი, რომ უნდა წაგვეგო იმ ანგარიშით. რაც შეეხება ჩვენს თამაშებს, დარჩენილია სამი ფინალის ტოლფასი მატჩი და ახლა მოედანზე სამი ქულის წამოსაღებად გავალთ. გვინდა ისტორია ისევ დავწეროთ. ამჯერად უკვე საკვალიფიკაციო ეტაპიდან.

ახლა დიდი შანსი გვაქვს, რომ ევროპის ჩემპიონატზე მოვხვდეთ. დარჩენილ სამ მატჩში ყველაფერი მაქსიმალურად უნდა გავაკეთოთ.

21-წლამდე ნაკრების შემადგენლობა

მეკარეები: მიხეილ მაქაცარია (დინამო თბილისი), ლუკა ხარატიშვილი (დინამო ბათუმი), ლევან თანდილაშვილი (თელავი).

მცველები: დავით გოგოტიშვილი (თელავი), საბა ხვადაგიანი (დინამო თბილისი), ნიკოლოზ უგრეხელიძე (დინამო თბილისი), საბა მამაცაშვილი (სირიუსი, შვედეთი), ზურაბ რუხაძე (დილა გორი), დავით ზურაბიანი (კოლხეთი ფოთი 1913), ლადო ოდიშვილი (თელავი), საბა საზონოვი (ტორინო, იტალია).

ნახევარმცველები: ლაშა ოდიშარია (რფს რიგა, ლატვია), ოთარ მამაგეიშვილი (იბერია 1999), გიზი მამაგეიშვილი (იბერია 1999), ლევან ოსიყმაშვილი (დინამო თბილისი), ირაკლი იეგოიანი (ვიტესი, ნიდერლანდები), ლუკა გაგნიძე (დინამო მოსკოვი, რუსეთი), ნოდარ ლომინაძე (დილა გორი), თორნიკე მორჩილაძე (თელავი).

თავდამსხმელები: ვასილიოს გორდეზიანი (დინამო თბილისი), გიორგი კვერნაძე (ფროზინონე, იტალია), გიორგი აბუაშვილი (კოლხეთი ფოთი 1913), ჯადული იობაშვილი (დინამო თბილისი).

2025 წლის ევროპის 21-წლამდელთა ჩემპიონატზე, საკვალიფიკაციო რაუნდის ჯგუფური ეტაპიდან (მასპინძელი სლოვაკეთის გარდა) პირდაპირ მოხვდება 9 ჯგუფის გამარჯვებული ნაკრები და 3 საუკეთესო მეორეადგილოსანი, ხოლო დარჩენილი ექვსი მეორეადგილოსანი გუნდი, ერთმანეთში, წყვილად 2-მატჩიან პლეი-ოფს ითამაშებს და ბოლო 3 საგზურიც ამ გზით გადანაწილდება.

ფოტო: nakrebi.ge

სვანაძე: "ნიდერლანდებთან შეცდომის დაშვების უფლება არ გვაქვს"

22:00 | ნიდერლანდები VS საქართველო

უახლესი ამბები