PRO D2–ის ახალ სეზონში, პირველი ქართული ლელოს ავტორი, ბორჯღალოსანთა მესამეხაზელი გიორგი ცუცქირიძე გახდა. მეორე ტურში ორიაკმა ბაიონს უმასპინძლა და პირველი ტაიმი 10:30 მოიგო, თუმცა საბოლოოდ 20:28 დამარცხდა. მასპინძლებმა უპირატესობა ვერ შეინარჩუნეს.

გიორგი ცუცქირიძემ თამაში ძირითად შემადგენლობაში დაიწყო და შეხვედრა შეუცვლელად ჩაატარა. მატჩის მიწურულს, მან მისი გუნდის მეორე ლელო გაიტანა. საკმაოდ ხანგრძლივი ტრავმის შემდეგ, გიორგიმ პირველი ლელოს დადება შეძლო.

ორიაკის სასტარტოში იყო და 58 წუთი ითამაშა გიორგი ქართველიშვილმა. შეცვლაზე შესულმა ლუკა ნიორაძემ კი მეორე ტაიმი სრულად ჩაატარა. 51–ე წუთზე კი საქმეში გიორგი ჯავახიაც ჩაერთო. კოტე მიქაუტაძემ ბაიონში ბოლო 18 წუთი ითამაშა.

ოიონამ კოლომიესგან დასკვნით ხუთ წუთში ორი ჯარიმა გაუშვა და შინ 21:23 დამარცხდა. მასპინძელთა შორის 57-ე წუთიდან ითამაშა ბექა კაკაბაძემ.

რუანმა ნარბონს უმასპინძლა და ბონუსით, 57:16 დაამარცხა. გამარჯვებულთა რიგებში მიმდინარე სეზონში პირცველად ითამაშა კახა ასიეშვილმა, რომელიც შეცვლაზე 58-ე წუთზე შევიდა.

სტუმრად მონ-დე-მარსანთან დიდი სხვაობით, 13:48 დამარცხდა ბურგ-ან-ბრესი, რომლის ძირითად შემადგენლობაში ვაჟა კაპანაძე და ზაურ თევდორაშვილი იყვნენ. ქართველი ბურჯები 49-ე წუთზე შეცვალეს. თევდორაშვილმა ახალი გუნდის კვართით პირველი ოფიციალური შეხვედრა ჩაატარა და მას მოედანზე დაბრუნება მატჩის მიწურულს, ორი წუთით მოუწია.

მონტობანმა კარკასონს სამით მეტი ჯარიმა გაუტანა და 25:16 დაამარცხა. მასპინძელთა გამარჯვებაში საკუთარი წვლილი შეიტანა მირიან ბურდულმა, რომელიც შეცვლაზე 49-ე წუთზე შევიდა. ეს მისი სადებიუტო მატჩი იყო მონტობანის შემადგენლობაში.

სეზონის პირველი გამარჯვება იზეიმა გრენობლმა, რომელმაც სტუმრად ვანი 38:33 დაამარცხა. გამარჯვებულთა შორის 53-ე წუთზე შეცვლაზე შევიდნენ ბურჯები – ზურაბ ჟვანია და ილია კაიკაციშვილი. აღსანიშნავია, რომ სტუმრებმა გამარჯვების ლელო ბოლოსწინა წუთზე გაიტანეს და გარდასახვაც ზუსტი იყო.

rugby.ge

ფოტო: STADE AURILLACOIS

ცუცქირიძემ PRO D2-ის მიმდინარე სეზონში პირველი ქართული ლელო გაიტანა

ორიაკი ბაიონს დაუპირისპირდა

უახლესი ამბები