დღეს "ავჭალაზე" 18:00 საათზე შავი ლომი რაგბი ევროპის სუპერთასის ნახევარფინალში, ესპანურ იბერიანსს ოპტიმალური შემადგენლობით დაუპირისპირდა. კოვიდ-რეგულაციების მოხსნის შედეგად, გულშემატკივრებს ტრიბუნაზე დასწრების საშუალება სრულად ჰქონდათ, რაც 3500 მაყურებელს გულისხმობდა.

ცნობილი იყო, რომ ამ თამაშის გამარჯვებული სუპერთასის ფინალში პორტუგალიურ ლუზიტანუშსა და ისრაელის თელ-ავივ ჰითს შორის გამარჯვებულს შეხვდებოდა. მათი დაპირისპირება კი გუშინ გაიმართა და პორტუგალიელებმა 42:26 იმარჯვეს.

შავი ლომის შემადგენლობა

ხაზი: 15. ლაშა ხმალაძე, 14. აკა ტაბუცაძე, 13. დემე თაფლაძე, 12. მერაბ შარიქაძე, 11. სანდრო თოდუა, 10. გიორგი ბაბუნაშვილი, 9. თენგიზ პერანიძე;

შერკინება: 1. ნიკა აბულაძე, 2. შალვა მამუკაშვილი, 3. ნიკა ხატიაშვილი, 4. ნოდარ ჭეიშვილი, 5. ლაშა ჯაიანი, 6. ნიკო აფციაური, 7. სანდრო მამამთავრიშვილი, 8. ლუკა ივანიშვილი.

მარქაფა: 16. თენგიზ ზამთარაძე, 17. გოგა ქადარია, 18. გიორგი პერტაია, 19. მიხეილ ბაბუნაშვილი, 20. თორნიკე აქუბარდია; 21. გიორგი ბეგაძე, 22. ლაშა ლომიძე, 23. მირიან მოდებაძე.

დღევანდელი დაპირისპირება საკმაოდ საინტერესო და დაძაბული გამოდგა. ნახევარფინალის პირველი ლელოს ავტორი ნიკო აფციაური გახდა. ლელოს დადებით თავი მერაბ შარიქაძემ, ლაშა ხმალაძემ და შალვა მამუკაშვილმა გამოიჩინეს. შედეგად, პირველი ტაიმი ქართული გუნდის გამარჯვებით 26:20 დასრულდა. შეხვედრის მეორე ნახევრის საწყის პერიოდში კი უპირატესობა სტუმრებმა მოიპოვეს და ოთხი ქულით წინ გაიჭრნენ, თუმცა შავმა ლომმა ლიდერობა მოკლე პერიოდში დაიბრუნა და 57–ე წუთისთვის მეტოქეს 33:30 ამარცხებდა.

ზუსტად ორ წუთში მამუკაშვილმა ესპანური კლუბი დაალელოვა. შემდგომ კი ბაბუნაშვილის გარდასახვა ზუსტი არ გამოდგა და ანგარიში 38:30 შავი ლომის სასარგებლოდ შენარჩუნდა.

68–ე წუთზე სტუმრებმა საჯარიმო დარტყმა ზუსტად შეასრულეს და სხვაობა ხუთ ქულამდე შეამცირეს. ლაშა ლომიძემ კი მატჩის ძირითადი დროის ამოწურვამდე ოთხი წუთით ადრე, ლელოს დადება შეძლო. ბოლო წამებზე ლელო ესპანელებმაც დადეს, ხოლო გარდასახვა ზუსტად ვერ შეასრულეს, ხოლო ტაბლოზე საბოლოო ანგარიში ქართული გუნდის სასარგებლოდ 43:40 დაფიქსირდა, რაც იმას ნიშნავს, რომ შავი ლომი ფინალში ითამაშებს, რომელიც რვა მაისს ლისაბონში გაიმართება და როგორც უკვე მოგახსენეთ, მეტოქე პორტუგალიური ლუზიტანუში იქნება.

ფოტო: შავი ლომი/ირაკლი ტყემალაძე

შავი ლომი სუპერთასის ფინალშია!

შავი ლომი ნახევარფინალში ესპანურ იბერიანს დაუპირისპირდა

უახლესი ამბები