პირველ თებერვალს, რაგბი ევროპის ჩემპიონატის 2025 წლის გათამაშების პირველი ტურის შეხვედრა საქართველოს ნაკრებმა ავჭალის სტადიონზე გამართა და შვეიცარიას დაუპირისპირდა, რომელიც ამ ტურნირის დებიუტანტი გახლდათ.

ცნობისთვის, წლევანდელი რაგბი ევროპის ჩემპიონატი 2027 წლის მსოფლიო თასის შესარჩევი ეტაპიცაა. ავსტრალიის საგზურს ევროპიდან 4 მოწინავე გუნდი მიიღებს, მეხუთე კი რეპეშაჟში ჩაერთვება.

ბორჯღალოსნების რიგებში 4 დებიუტანტი ვიხილეთ, მათგან 3 სასტარტო შემადგენლობაში. მთავარი მწვრთნელის, რიჩარდ ქოქრილის გადაწყვეტილებით, საქართველოს ნაკრები დღევანდელ დაპირისპირებას შემდეგი მოთამაშეებით შეხვდა:

ხაზი: 15. დაჩი პაპუნაშვილი (ორიაკი), 14. აკაკი ტაბუცაძე (შავი ლომი), 13. გიორგი კვესელაძე (გრენობლი), 12. თორნიკე კახოიძე (შავი ლომი), 11. შალვა აფციაური (შავი ლომი), 10. ლუკა მატკავა (შავი ლომი), 9. გელა აფრასიძე (პერპინიანი);

შერკინება: 1. ნიკა აბულაძე (მონპელიე), 2. ირაკლი ქვათაძე (შავი ლომი), 3. ლუკა ჯაფარიძე (მონპელიე), 4. მიხეილ ბაბუნაშვილი (შავი ლომი), 5. ლადო ჩაჩანიძე (შავი ლომი), 6. ბექა შვანგირაძე (ლიონი), 7. ბექა საღინაძე (ლიონი, კაპ.), 8. ლუკა ივანიშვილი (შავი ლომი).

მარქაფა: 16. ვანო კარკაძე (მონპელიე), 17. ლუკა გოგინავა (მონ დე მარსანი), 18. ირაკლი აფციაური (ლიონი), 19. გიორგი ჯავახია (გრენობლი), 20. ილია სპანდერაშვილი (ვალანსი); 21. მიხეილ ალანია (ორიაკი), 22. დავით ნინიაშვილი (ლიონი), 23. გიორგი ხაინდრავა (ბორდო).

როგორც მოსალოდნელი იყო, მატჩის ორივე ნახევარი ბორჯღალოსნების სრული უპირატესობით წარიმართა. საქართველომ პირველი ნახევარი 42:0 მოიგო, საბოლოოდ კი 110:0 იმარჯვა, რაც იმას ნიშნავს, რომ საქართველომ ისტორიული გამარჯვება მოიპოვა და დღეს ჩვენმა გუნდმა რეკორდული სხვაობით იმარჯვა.

წლის პირველი ლელოს ავტორი გელა აფრასიძე გახდა, ხოლო გარდასახვა ლუკა მატკავამ გამოიყენა. ამას მალევე მოჰყვა გიორგი კვესელაძის ლელო და მატკავას მორიგი წარმატებული გარდასახვა. მორიგი ლელოს ავტორი უკვე ლუკა ჯაფარიძე გახდა და მატკავა კვლავ ზუსტი იყო. ამ ყველაფრის შემდეგ კი გიორგი კახოიძემ სტუმრებს შესანიშნავი ლელო დაუდო. მატკავა კი მეოთხე ჯერზეც უშეცდომო იყო.

ლუკა მატკავა ამ ყველაფრის შემდეგ ლელოს ავტორი თავადაც გახდა და გარდასახვა ისევ გამოიყენა.ტაიმის მიწურულს გულშემატკივრებმა ლუკა ივანიშვილის ლელოც იხილეს და ზემოთხსენებულმა მატკავამ მეექვსე გარდასახვაც გამოიყენა.

მეორე ნახევარში აკაკი ტაბუცაძის ლელო ვიხილეთ, რომელიც მისთვის ნაკრებში 43-ე გახლდათ. ლუკა მატკავამ კი გარდასახვა კვლავ გამოიყენა. ამას ივანიშვილის მეორე ლელო და მატკავას მერვე გარდასახვა მოჰყვა. ლელოების დუბლი გელა აფრასიძემაც გაიფორმა და ამჯერად გარდასახვა წარმატებით დავით ნინიაშვილმა შეასრულა. მალევე შალვა აფციაურმა შვეიცარიელებთან სადებიუტო ლელოს დადება მოახერხა. ნინიაშვილმა კი მეორე გარდასახვაც გაიტანა.

ყველაფერი ამით არ დასრულებულა. მომდევნო ლელო უკვე ილია სპანდერაშვილის აქტივში ჩაიწერა. ნინიაშვილის მესამე გარდასახვამ კი მიზანს ისევ მიაღწია. შემდეგი ლელო უკვე მიხეილ ალანიას ანგარიშზეა. ნინიაშვილს კი სიზუსტემ არც ამჯერად უმტყუნა. მალევე ტაბუცაძემ ნაკრებში 44-ე ლელო გაიტანა და ნინიაშვილმა გარდასახვაც ზუსტად შეასრულა. სტუმართა განადგურება არც ამით დასრულდა. აფციაურმა სადებიუტო თამაშში მეორე ლელოს დადებაც შეძლო. ნინიაშვილის გარდასახვა კი ისევ და ისევ ზუსტი გამოდგა. ბექა შვანგირაძის ლელოთი ბორჯღალოსნებმა სარეკორდო შედეგი დაფიქსირეს. დავით ნინიაშვილის მორიგი გასროლა კი კვლავ წარმატებული იყო. სადებიუტო შეხვედრა ლელოს დადებით გიორგი ხაინდრავამაც აღნიშნა. შეხვედრას კი წერტილი ნინიაშვილმა გარდასახვით დაუსვა და ბორჯღალოსნებმა შვეიცარია 110:0 დაამარცხეს! აქვე მოგახსენებთ, რომ მატჩის საუკეთესო მოთამაშედ აკაკი ტაბუცაძე დასახელდა!

ფოტო: Georgian Rugby/ ირაკლი ტყემალაძე

ბორჯღალოსნების ისტორიული გამარჯვება

საქართველო 110:0 შვეიცარია

უახლესი ამბები