ხვიჩა კვარაცხელია ყაზანის რუბინში რჩებაო, დიდი კმაყოფილებით იწერება რუსულ პრესაში. ანუ ფეხბურთელი, რომელსაც მთელი ზაფხული ხან მილანში „ვაგზავნიდით“, ხან არსენალში და ხან რეალში, ისევ საშუალო დონის რუსულ კლუბში რჩება გაურკვეველი ვადით. რას ნიშნავს ეს?

დავიწყოთ იმით, რომ როგორც ყველაფერი რუსული, ფეხბურთიც ნაგავია მაგ ქვეყანაში. უვარგისია იქაური კლუბები, უვარგისია იქაური ნაკრები, უვარგისები არიან რუსი ფეხბურთელები. ერთადერთი, რაც საქართველოს ოკუპენტი ქვეყნის საფეხბურთო მეურნეობაში არის მოწესრიგებული, გახლავთ დიდი ფული. შეიძლება ითქვას, რომ რუსული ფუტბოლი ერთი დიდი ფულის სამრეცხაო მანქანაა. შავი ფულის, რა თქმა უნდა. იქ მეპატრონეებს კლუბები იმისთვის კი არ უნდათ, რომ ფული ჩადონ, მაგარი ფეხბურთი ათამაშონ და ფინანსურ მოგებაზე ამ გზით გავიდნენ. არა, იმ მეპატრონეებს უკვე ნაშოვნი აქვთ უზარმაზარი მაყუთი და ფეხბურთში, უბრალოდ, ათეთრებენ. შესაბამისად, ამ მრეცხაობაში, საშუალო დონის გუნდში შეიძლება იმხელა ხელფასი მოგცენ, ევროპაში სახელი და კლასი რომ სჭირდება. რომ დავზიპოთ, ასე გამოვა - გინდა უბრალოდ ბევრი ფული? ითამაშე რუსეთში და დაივიწყე განვითარება. გინდა დიდი ფეხბურთის თამაში და ფულიც? წადი ევროპაში, იმუშავე, იწვალე და გახდი ვარსკვლავი.

და რა უნდა ხვიჩას?

დარწმუნებული ვარ, ეს უნიჭიერესი ბიჭი პატარაობიდანვე ოცნებობდა გადაჭედილი სტადიონების აპლოდისმენტებზე და ალბათ, დღესაც ასეა. ვიცი, რომ კარგი ადამიანიცაა, მშრომელიც და ნიჭიერიც, თუმცა როგორც ვხედავთ, საშუალო დონის ჩემპიონატის საშუალო გაქანების კლუბიდან არ უშვებენ. რუსები ზოგადად ასეთები არიან, მითუმეტეს, ქართველებთან მიმართებაში - მათ უყვართ, როცა კარგს აფუჭებენ და ვერ იტანენ ხარისხიანის შექმნას. ხარისხი რუსის მტერია.

აქ საქმეში ერთვება სხვა რგოლიც - სპორტული აგენტები, რომლებიც ძირითადად პოსტ-სოციალისტურ ბაზარზე მუშაობენ. ამ აგენტებში არიან ქართველებიც და სწორედ ერთ-ერთმა მათგანმა თქვა დაახლოებით თვის წინ, რომ ხვიჩა არსად მიდის. და მანდ მივხვდი, რომ საქართველო თავის მარგალიტს კარგავს, რომ კვარაცხელიამ ვერ გაასწრო იმ ფულიანი ჯოჯოხეთიდან, რომ კვლავ ყველა დათანხმდა დღევანდელ კვერცხს და ყველა კმაყოფილია - რუსეთის ფეხბურთის ფედერაცია, იმიტომ რომ ტექნიკური ვარსკვლავი დაიტოვა და სანახაობა შეინარჩუნა საზიზღარ ჩემპიონატში; რუბინი, ვინაიდან ხვიჩა რჩება; აგენტები, რომლებიც მორიგ ორ კაპიკს შეინარჩუნებენ კარგი სავაჭრო პერსპექტივით.

რუსეთის ჩემპიონატში გატარებული მორიგი სეზონი ქართველი შემტევისთვის რეგრესის სეზონი იქნება, რადგან ფეხბურთელი ასე ვითარდება: ბავშვობაში სწავლობს ანბანს, მერე რაღაც დონეზე ეს ანბანი პრაქტიკაში გადააქვს (ვთქვათ, რუსეთის პირველობაში), მერე კიბეზე კიდევ მაღლა ადის (ვთქვათ, ჰოლანდიის ჩემპიონატში) და იქმნება საერთაშორისო დონის პროდუქტი, რომელზეც დასაწყისში ხსენებული მილანები და რეალები ნადირობენ. ეს კლასიკური გზაა, სხვანაირად დიდი ფეხბურთელობა არ გამოდის და სამწუხაროდ, კვარაცხელია უმთავრეს ტრამპლინთან ეფლობა ჭაობში. ჰოდა, სხვა ვერაფერს ვეტყვი ამ მართლა გადასარევ ფეხბურთელს, გარდა ამისა:

გაიქეცი ხვიჩა მაქედან, გაიქეცი!

გაიქეცი, ხვიჩა, გაიქეცი!

ასევე იხილეთ

უახლესი ამბები