დღეს ცოტა უცნაური სიმბოლური ნაკრების შედგენა მოგვიწევს - იმ ფეხბურთელების, რომლებიც თავის დროზე ვარსკვლავები იყვნენ, მაგრამ სახელი სხვა მიმართულებითაც გაითქვეს. მაგალითად, სმაში, ან ნარკოტიკების მიღებაში, ან უდისციპლინობაში - ყველაფერ იმაში, რასაც ფეხბურთთან თითქოს არანაირი კავშირი არ აქვს. თუმცა ვარსკვლავიც ადამიანია და ხშირად აკეთებს იმას, რაც საქმეში და სახელში ხელს უშლის, ან პირიქით, რაღაც კუთხით ეხმარება კიდეც, თუ ზომიერებას მიაქცევს ყურადღებას. ერთი სიტყვით, აგერ არის 11 ფეხბურთელი, ვინც მსოფლიო ფეხბურთშიც სხვადასხვა ზომის კვალი დატოვა და არც ღვინო, დუდუკი და დრაგები მოუკლია:

მარკ ბოსნიჩი

წარმოიდგინეთ, რამდენად ნიჭიერი უნდა იყო, რომ ავსტრალიელი ბიჭი, თან მეკარე, ჯერ ასტონ ვილაში მოხვდე, მერე მანჩესტერ იუნაიტედში, თან პიტერ შმეიხელის შემცვლელად და მერე ჩელსიში. ბოსნიჩმა ეს გზა გაიარა, კარიერის შექმნა დაიწყო, ქომაგებს თავი შეაყვარა და ზუსტად მაგ დროს გაიცნო ბრიტანელი მოდელი სოფი ანდერტონი, ლამაზი, კოკაინის მოყვარული გოგო. გაიცნო და თეთრი ფხვნილი ბოსნიჩის მეორე შეყვარებული გახდა 5 წლის განმავლობაში: „რაღაც მომენტში, ჩემდა წილად, დღეში 10 გრამ კოკაინს ვყნოსავდი“ - იტყვის წლების შემდეგ მეკარე, რომელსაც კარიერა აერია და გაბანკროტდა.

ტონი ადამსი

ინგლისის ნაკრების და დიდი ლონდონის არსენალის ლეგენდა, საყელოაწეული თამადა, რომელიც ჰაიბერიზე 22 სეზონი დააბიჯებდა და ყველას აგრძნობინებდა, რომ მოედანზე მთავარი კაცი სწორედ ისაა. უმაღლესი კლასის მცველი იყო, მაგრამ ეგეთი ხომ ბევრია - ადამსის ხიბლი მისი ხასიათი, ძმაკაცების დაცვა, გუნდისთვის თავდადება, „ბლატაობა“ და მოწინააღმდეგისთვის ჭკუის სწავლება იყო. ამიტომაც დგას მისი ქანდაკება ემირეითს სთედიუმის მახლობლად. სმა ოთხმოციანების მიწურულს დაიწყო, გალოთდა, ნარკოტიკებზეც გაიწია, ხშირად ჩხუბობდა ბარებში, რამდენჯერმე დაიჭირეს, მაგრამ მერე არსენ ვენგერის და მეგობრების დახმარებით გამოძვრა. დღეს ტონი ადამსს აქვს კლინიკა, სადაც ეხმარება სასმელ და თამაშდამოკიდებულ სპორტსმენებს.

ლადისლაო კუბალა

ლეგენდარული კაცი, რომელმაც სამ სხვადასხვა ნაკრებში მოასწრო თამაში (უნგრეთი, ჩეხოსლოვაკია, ესპანეთი) და ბარსელონას სუპერვარსკვლავად იქცა (280 გოლი 345 მატჩში), რაღაც მომენტში ისე გალოთდა, რომ ფეხზე ვეღარ ჩერდებოდა. უნგრეთში დაბრუნებული მსოფლიო ფეხბურთის ვარსკვლავი კომუნისტურმა რეჟიმმა დააპატიმრა, როგორც „ანტისახელმწიფოებრივი ელემენტი“, მაგრამ მალე გაუშვა. მერე ბარსელონამაც დააჯარიმა რამდენიმეთვიანი დისკვალიფიკაციით, მაგრამ კუბალას ვერაფერმა უშველა და ასე დაემშვიდობა ფეხბურთს.

პოლ მერსონი

კიდევ ერთი არსენალელი და ინგლისის ნაკრების ნახევარმცველი, რომელიც ერბაშად სამ რაღაცაზე იყო დამოკიდებული - სასმელზე, აზარტულ თამაშებზე და ნარკოტიკებზე. ყველას ეგონა, რომ მისი საქმე წასულია, მაგრამ ფეხბურთის ასოციაციის დახმარებით მან სამივე მიმართულებით თერაპიის კურსი გაიარა, განიკურნა და დღეს ცნობილი ტელეწამყვანია.

ადრიან მუტუ

მას შემდეგ, რაც მილანის ინტერში წავიდა, მთელი რუმინეთი ელოდა ახალი სუპერვარსკვლავის დაბადებას, რომელსაც ზღვა ნიჭი ჰქონდა და შესანიშნავი ფორვარდი იყო, მაგრამ უცებ კოკაინისკენ გაექცა ცხვირი და კარიერაც ამ ამბავს გადააყოლა - არ დადიოდა ვარჯიშებზე, თუ დადიოდა, არ იხარჯებოდა, მოედანზე მისი სარგებელი ნულამდე დაეცა, რამდენჯერმე გამოიჭირეს დოპინგკონტროლზე და მისი სახელიც საფეხბურთო რუკიდან ნელ-ნელა გაქრა.

პოლ გასკოინი

გაზა თავისი თაობის უნიჭიერეს ფეხბურთელად ითვლებოდა, მაგრამ გაცილებით ნიჭიერი აღმოჩნდა სმაში, სისულელეების კეთებაში და ჩხუბში. პირველად ჰოსპიტალში მაშინ მოხვდა, როცა ზედიზედ 32 ჭიქა ბურბონი დალია და მას შემდეგ თერაპიების ხშირი სტუმარი იყო, თუმცა იქიდან გამოსული კვლავ ალკოჰოლს უბრუნდებოდა, პარალელურად კი ბიპოლარული აშლილობაც დაუდგინდა.

დიეგო არმანდო მარადონა

ფეხბურთის ღმერთზე ყველამ ყველაფერი იცის, როგორ მიეჩვია კოკაინს ნეაპოლში, როგორ ზრდიდა დოზებს, როგორ იჯდა ფარდებჩამოფარებულ ოთახში თვეობით, როგორ დაუმეგობრდა კოზა ნოსტრას და როგორ ეხმარებოდა კოკაინის მიმოქცევაში, როგორ გადაერთო კარიერის შემდეგ უფრო მძიმე დრაგებზე, როგორ დაკრგა საკუთარ თავზე კონტროლი და ბოლოს - როგორ გარდაიცვალა. თუმცა აქ ერთი მთავარი კითხვა შეიძლება დავსვათ, სხვა შემთხვევვებისგან განსხვავებით - რომ არა ცხოვრების ეს წესი, მოახერხებდა იმ უნიკალური შედევრების შექმნას?

სოკრატესი

მაღალი, სიმპათიური, ექიმი, ბრაზილიის დიდი გუნდის კაპიტანი, წამყვანი გაზეთების მესვეტე, რომელიც მხოლოდ ფეხბურთზე კი არა, პოლიტიკასა და ეკონომიკაზე წერდა, ტელეწამყვანი და ძალიან განათლებული ადამიანი - ეგეთი ჩვენ დიმიტრი გელოვანი გვყავდა და ბრაზილიელებს სოკრატესი. თუმცა, ამ სიმბოლური ნაკრების სხვა წევრებისგან განსხვავებით, სოკრატესის ალკოჰოლთან ურთიერთობა მალე დამთავრდა და კარიერასაც ნაკლებად შეუშალა ხელი.

ჯორჯ ბესტი

ერთხელ მანჩესტერ იუნაიტედის სკაუტი ბობ ბიშოპი ლეგენდარულ მწვრთნელთან, მატ ბასბისთან მივიდა და უთხრა: „ბოს, გენიოსი გიპოვეთ“. წლების შემდეგ კი ეს მართლაც გენიალური შემტევი ასე იტყვის: „გამომუშავებული ფულის 90 პროცენტი სასმელსა და ქალებში წავიდა, დანარჩენი დავხარჯე.“ ის ძვირფასი მანქანებით დადიოდა, ბრიტანეთის ელიტარულ წრეებში მიღებული კაცი იყო, უამრავ ლამაზ და გავლენიან ქალთან ჰქონდა რომანი, ხშირად მოხვედრილა პოლიციაში და გამოირჩეოდა სპორტული უდისციპლინობით. მიუხედავად ამისა, ბესტმა მაინც მოახერხა ფეხბურთის ისტორიაში „ბესტად“ დარჩენა.

გარინჩა

ადამიანი, რომელსაც ერთი ფეხი შვიდი სანტიმეტრით მოკლე ჰქონდა, თვით ბრაზილიური ფეხბურთის ისტორიაში ითვლება საუკეთესოდ და ბევრი პელეზე მაღლაც აყენებს. ის მთელი ცხოვრება ერთ ფინტს აკეთებდა და მაინც ვერავინ დაკეტა, მას თერთმეტივე მეტოქე მოუტყუებია, ფიზიკის კანონების საწინააღმდეგო რაღაცეები უკეთებია და ბოლოს სახანძრო მანქანაზე დასვენებული გააცილეს ბოლო გზაზე - ციროზმა მოკლა, გაუთავებელმა სმამ, დარდმა, უმეგობრობამ, უფულობამ. მოუსმინეთ მის მომღერალ ცოლს, ელზა სუარესს და მიხვდებით, რამხელა ემოციები იყო ამ კაცის ცხოვრებაში.

ადრიანუ

ადრიანუ მაშინ დამამახსოვრდა, როცა კოპა ამერიკას ფინალში ერთმანეთს შეხვდნენ ბრაზილია (მეორე-მესამე ნაკრებით) და არგენტინა საუკეთესო შემადგენლობით. ბრაზილიაში მარტო ის იყო ძირითადი გუნდიდან და მთელ ამ ვარსკვლავურ არგენტინას მარტომ დაახია ბურთი თავზე. თუმცა მერე ხშირად მხვდებოდა ასეთი სათაურები: ადრიანუ შეკრებაზე არ ჩავიდა, ადრიანუ მწვრთნელს ეჩხუბა, ადრიანუ ბრაზილიაში ბრუნდება - და დროთა განმავლობაში მასზე სათაურები საერთოდ გაქრა. მიზეზი - ალკოჰოლი.

ღვინო, დუდუკი, დრაგები

უახლესი ამბები