ჩემპიონთა ლიგა ბრუნდება მერვედფინალით და პირველ ორ სათამაშო დღეს ორი დიდი ყომარით - სამშაბათს პარიზში რეალი ჩადის და ოთხშაბათს ინტერთან მილანში - ლივერპული. სხვა რა უნდა ინატრო ზამთრის გრძელი ანტრაქტის შემდეგ, ნამდვილად არ ვიცი. ამიტომ, გილოცავთ საფეხბურთო ახალ წელს.

პარკ დე პრენსზე რეალს ისე თამამად ელიან, როგორც, ალბათ, არასდროს. და ეს იმიტომ, რომ მადრიდელების ბოლო 15 წლის კოშმარი დღეს პარი სენ ჟერმენში თამაშობს. ისე ვეღარ, როგორც კატალონიაში, მაგრამ მესია და იცის, რომ რეალთან უნდა იომოს, სადაც და როგორც არ უნდა იყოს.

პსჟ ფორმაშია, მდიდარია, მოდაშია, კარგი ფრანგული სუნამოს არომატით და დიდი ამბიციებითაა. ლეო იქ არის. იქ არიან რეალის ლეგენდა სერხიო რამოსი და ნეიმარი, მაგრამ ორივე საეჭვოა ტრავმის გამო. იქნება მბაპე, რომელიც სულ უფრო კარგად ეწყობა მესის და თუ ანჩელოტი ამ ჯაჭვს მოშლის, მთავარ ამბავს მოაგვარებს.

რეალის დონის გუნდებს არასდროს ეშლებათ ლიგაზე ზამთრის შესვენების ისე გამოყენება, რომ პლეი ოფს იდეალურ კონდიციაში შეხვდნენ. ესპანეთში მადრიდელების ბოლო თამაშების შემხედვარე, ამაში, შეიძლება, ეჭვი შეგვეპაროს, მაგრამ ეს რეალია და მისი მწვრთნელი - კარლო ანჩელოტი, ფეხბურთში ყველაფრის მნახველი კაცი. ზუსტად ამ ადამიანის უპირატესობა აქვს ამ ორ მატჩში ცამეტთასიან კლუბს გუნდთან, რომელიც ჯერ ერთზე ოცნებობს. მაგრამ ისიც თავისი ჯოკრითაა ჩასაფრებული და ვნახოთ, რომელი იქნება ბოლოს ჯოკერივით კარგ ხასიათზე, დიდი მწვრთნელი თუ უფრო დიდი ფეხბურთელი. ჩემპიონატებში ორივე პირველზეა, თუმცა თუ პარიზელები უკვე თითქმის ჩემპიონები არიან, რეალს სევილია უშლის ნერვებს.

საფრანგეთის პარალელურად, პორტუგალიის დედაქალაქში სპორტინგი ტურნირის ფავორიტს შეასკდება და საეჭვოა, სიტის რამე მოუხერხოს. ლისაბონში კიდევ არის შანსი, რომ ჩემპიონატში პორტუს მადევარმა პრემიერლიგის თამადას კარგი თამაში და კოჭებში ლაწა-ლუწი დაახვედროს, მაგრამ მანჩესტერში გვარდიოლა რომ ქსოვას დაიწყებს, უყარე მერე კაკალი.

ოთხშაბათის ორი მატჩიდან ერთში დაახლოებით ამავე სცენარს უნდა ველოდოთ - კი, კარგი გუნდია ზალცბურგი, ავსტრიის ჩემპიონატშიც უკვე ყველას გააგებინა, რომ ეს სეზონიც მისია და ლიგაზეც გადასარევად გამოიყურებოდა, მაგრამ გაიხედავ მეორე მხარეს და იქით მიუნხენის ბაიერნი დგას ურჩხულივით, რომელიც მზადაა თასისკენ გზაზე ყველა მოსპოს. მითუმეტეს, ზალცბურგი. ავსტრიელებმა ბოლო სამი თამაში მოიგეს, ბავარიელებმა კი ეს-ესაა ბოხუმთან წააგეს უცნაურ ორპირში.

მილანში სერია ა-ს პოტენციური ლიდერი პრემიერლიგის მეორე გუნდს მასპინძლობს და ამით აგრძელებს მურტალ კალენდარს: მარცხი მილანთან, მოგება თასზე რომასთან, ფრე კონკურენტ ნაპოლისთან და აგერ, ლივერპულიც, რომელიც დაფრინავს და შედარებით იოლ კალენდარში, მაგრამ ბოლო ოთხი მატჩი მოიგო.

ამ ორ გუნდს ურთიერთშეხვედრების მოკრძალებული ისტორია აქვს - სულ ორჯერ შეხვედრიან, 2008 წელს, ჩემპიონთა ლიგაზე და მაშინ ორჯერვე ბრიტანელებმა გაიმარჯვეს. ეს თამაშიც ამიტომ ხდება უფრო საინტერესო - იშვიათია.

თუ პსჟ-რეალს ზუსტად თანაბარი შანსები აქვთ, აქ მაინც ლივერპულს ეკუთვნის ორი-სამი პროცენტით მეტი. ყველაფერს რომ თავი დავანებოთ იმიტომ, რომ განმეორებითი თამაში ენფილდზეა, იქ, სადაც ლივერპულმა ნებისმიერი სასწაული შეიძლება შემოგარტყას.

ჯოკერი, ჯოკერი და ენფილდი

უახლესი ამბები