მერვედფინალური წყვილების ზუსტად ნახევარი ცნობილია: 3 დეკემბერს 7 საათზე შეხვდებიან ჰოლანდია -აშშ და თერთმეტზე არგენტინა - ავსტრალია. 4 დეკემბერი, პირველი მატჩი:საფრანგეთი - პოლონეთი, მეორე მატჩი: ინგლისი - სენეგალი.

გუშინ კიდევ ერთი ფავორიტი, სტარტზე მოსრიალებული არგენტინა გავიდა ფლეი ოფში და თავისი საუკეთესო ფეხბურთიც ითამაშა ჯერჯერობით. კი, პოლონეთი წარმოუდგენლად ცუდი გუნდია და მოედანზე თითქმის არაფერი უკეთებია, თუმცა მაინც შევაქოთ არგენტინა, რომელიც ძალიან ნელა, მაგრამ მაინც უმატებს. და კიდევ კარგი, წინ არცთუ სერიოზული მეტოქე ჰყავს ავსტრალიის სახით, რომელმაც ტურნირის კიდევ ერთი მოულოდნელად უინტერესო ნაკრები, დანია ჩატოვა გასამგზავრებელ ჩემოდანში. წესით, სკალონის გუნდი ავსტრალიას მარტივად გაივლის და შესაბამისად, მეტი დრო ექნება იმ ფორმაში მოსასვლელად, რომელშიც ვერცერთი გრანდი ვერ გადაყლაპავს. პირიქით, პირიქით არ მოხდეს.

საინტერესო ამბები მაშინ დაიწყო, როცა მსაჯმა პოლონეთს ნახევრადსაეჭვო პენალტი დაუდო და სანამ ამას იზამდა VAR-ზე მიშტერებული, მეკარე შჩესნიმ და ლეო მესიმ 100 ევროზე „გამაზეს“, იქნებოდა თუ არა თერთმეტმეტრიანი. საბოლოოდ მესი ცოტა კიდევ უფრო გამდიდრდა, მაგრამ მეკარემ აჯობა და გახადა მეორე კაცი განელი ასამოა გიანის შემდეგ, ვინც მსოფლიოს ჩემპიონატებზე ორი პენალტი გააფუჭა - მანამდე მესიმ ისლანდიას ვერ შეუგდო რუსეთში. თავად ვოიცეხი კი იქცა მეორე გოლკიპერად, ვინც საკუთარი შეცდომის გამო დანიშნული პენალტი აიღო - პირველად ეს ფრანგმა ჟოელ ბატსმა გააკეთა 1986 წელს ბრაზილიასთან.

მესის ამ გაფუჭებულ დარტყმას, საბოლოოდ, ჯადოსნური დატვირთვა შეიძლება აღმოაჩნდეს, ვინაიდან 1978 წელს მარიო კემპესმა, ხოლო 1986-შიდიეგო მარადონამ სწორედ მესამე ტურში გააფუჭეს სასჯელის უმაღლესი ზომები და მერე მსოფლიოს ჩემპიონები გახდნენ.

მიუხედავად უგოლო მატჩისა, ლეოს დღეს 17 გოლით მეტი აქვს გატანილი, ვიდრე მთლიანად არგენტინის ნაკრებს. და მიუხედავად იმისა, რომ პოლონეთთან ფანტასტიკურად ითამაშა როდრიგო დე პაულმა, რომელმაც არგენტინული რეკორდი დაამყარა 145-დან 137! ზუსტი პასით, მატჩის საუკეთესო ფეხბურთელად მაინც პენალტგაფუჭებული მესი დაასახელეს. იმსახურებდა? შეიძლება ამაზე დავა, თუმცა გუშინ ის ნამდვილი ლიდერი იყო მოედანზე. და ლიდერივითვე დაამთავრა მოედნის მიღმაც - ემვიპის პრიზი ალექსის მაკალისტერს გადასცა მისი ბრწყინვალე 90 წუთის აღსანიშნავად. სხვათა შორის, ეს პირველი მაკალისტერი არაა არგენტინის ნაკრებში - კარლოს ხავიერ მაკალისტერს 1993 წელს სამი თამაში აქვს ეროვნულ გუნდში მარადონასთან, რედონდოსთან, ბატისტუტასთან ერთად. თუმცა შემდგომში დიეგო იტყვის, რომ შოტლანდიური წარმოშობის კარლოსი მას ქრთამის სანაცვლოდ ნაკრებში ფეხბურთელების მიწვევას სთავაზობდა, რის შემდეგაც ღმერთის ხელმა მას გუნდის კარი სამუდამოდ ჩაუკეტა.

და ეს ამბავიც არ გამოგვრჩეს - ლეო მესი, არც ნაკრებში და არც კლუბში, ჯგუფური ეტაპიდან არასდროს გავარდნილა.

მექსიკელები ფლეი ოფს მიღმა პირველად აღმოჩდნენ 1978 წლის შემდეგ და ეს ორმაგად საწყენია ამ პოლონეთის ფონზე - ასეთი უხარისხო მერვედფინალისტი, მსოფლიოს, დიდი ხანია არ ჰყოლია. მსგავსი სირცხვილი, რაც ამ ჩემპიონატზე, არასდროს უჭამია დანიას, რომელიც, მექსიკელებისგან განსხვავებით, ნამდვილად იმსახურებდა კატარის დატოვებას. ისე, კატარის კი არა, სკანდინავიელები მალე მთლიანად ფიფას დატოვებასაც აპირებენ.

რაც შეეხება საფრანგეთი - ტუნისს, ეს მატჩი ღირსეულ ადგილს დაიკავებდა „ცისფერ მთებში“ -სადმე გრელანდიის მიდამოებში უნდა ყოფილიყო მუდმივად ჩართული. და შედეგიც ისეთი გამოვიდა, ერთი ეგზემპლარი ფიზკულტურის ინსტიტუტში რომ უნდა წაიღო - ტუნისმა მსოფლიოს ჩემპიონს მოუგო და ჯგუფში ჩარჩა. თან როგორ მოიგო, გრიზმანმა გაათანაბრა, მსაჯმა თამაში დაამთავრა და მერე გოლი გააუქმეს, ოფსაიდი იყოო. ამ სისტემაზე კიდევ ბევრია სამუშაო, როგორც ჩანს - ფეხბურთელს გოლი ვერ გახარებია წესიერად.

ხვალამდე

​დღე მეთერთმეტე - „გამაზული“ ჯადოპენალტი, ანუ ტიანშანი

უახლესი ამბები

დღე მეთერთმეტე - „გამაზული“ ჯადოპენალტი, ანუ ტიანშანი