დღეს მსოფლიოს 22-ე ჩემპიონატის ბოლოსწინა, მესამე ადგილისთვის მატჩის დღეა, როცა თავად ეს თამაში თითქმის არავის აინტერესებს და ყველა ხვალისკენ და ფინალისკენ იყურება. თუმცა წლეულს მესამე ადგილმაც პრესტიჟი შეიძინა ამ ტიტულისთვის მებრძოლი გუნდებიდან გამომდინარე - ხორვატიისთვის და მითუმეტეს, მაროკოსთვის, დღევანდელი ბრინჯაო ოქროს სინჯისაა.

[html]

🥉 Qui terminera troisième de ce Mondial au Qatar ?

🇭🇷🇲🇦 Demi-finalistes malheureux, la Croatie de Luka Modric et le Maroc d'Hakim Ziyech s'affrontent aujourd'hui à 16h, à Doha.

📲 Un match à suivre en direct sur l'application RMC ici ► https://t.co/4Wlv45gpC7 pic.twitter.com/wUY7CGKknH
— RMC Sport (@RMCsport) December 17, 2022

[/html]

ისე კი, ამ თამაშზე ყოველთვის ჩემი მეგობრის მამის ნათქვამი მახსენდება, სკოლაში ოთხიანის მიღებას, სამიანის მიღება სჯობს იმიტომ, რომ როცა ოთხიანს იღებ, ესე იგი გაკვეთილი ისწავლე და იმდენად უნიჭო ხარ, სკოლამდე ვერ მიიტანე ნამეცადინები და როცა სამიანს იღებ, ნიშნავს, რომ საერთოდ არ გისწავლია და მდგომარეობიდან გამოძვერიო. ეს ბრინჯაოც რაღაცით სამოსნების ოთხიანზე წვალებას ჰგავს, რომელსაც იშვიათად, ვინმემ სერიოზულად უყუროს და იშვიათადვე, თავად მონაწილეებმა შეაკლან ერთმანეთს თავი.

რაც შეეხება ზოგადად ამ ჩემპიონატს, მის დაწყებამდე ბევრი ძალიან სკეპტიკურად იყო განწყობილი, რასაც ორი მთავარი მიზეზი ჰქონდა - მასპინძელი ქვეყანა და მასზე მიბმული ჩატარების დრო.

ცოტა რომ გავშალოთ - მასპინძელი არ მოსწონდათ არა მარტო იმიტომ, რომ არასაფეხბურთო ქვეყანაა, არამედ უფრო იმიტომ, თუ როგორ მოიპოვა მან მასპინძლობის უფლება. ფიფამ, ფაქტობრივად, აღიარა, რომ კატარში ამხელა ამბის მოწყობა შეცდომა იყო, თუმცა ამ შეცდომის უკან უზარმაზარი ფული და კორუფცია დგას. როგორც რუსეთის შემთხვევაში იყო. მიუხედავად ამისა, შეიძლება ითქვას, რომ კატარმა ინფრასტრუქტურულადაც და ტექნიკურადაც მისიას თავი გაართვა და ამ მხრივ, ჩემპიონატი, ძალიან კარგი იყო. ნუ, თუ არ ჩავთვლით მოდიქტატორო ხელისუფლების ზოგიერთ ხუშტურს, მაგალითად, დრესკოდს ან ლუდის აკრძალვას, რომლებიც, კიდევ კარგი, ბოლომდე არ ამუშავდა.

[html]

FIFA president BACKS Qatar World Cup stadium alcohol ban: 'If for three hours a day you cannot drink a beer you will survive' https://t.co/zIEDU108GD
— Daily Mail Online (@MailOnline) November 19, 2022

[/html]

კრიტიკის მეორე მიზეზი იყო მსოფლიოს ჩემპიონატის ჩატარების დრო. ზამთარში ეს პირველად მოხდა და ამან ბევრი რამ შეცვალა როგორც პრაქტიკული, ისე ემოციური კუთხით - ფეხბურთელებს გახურებულ სეზონში მოუწიათ ყველაზე დიდ ტურნირში ჩართვა, ადრე კი ჯერ საკლუბო ტურნირები მთავრდებოდა, მერე იყო პატარა არდადეგები და მერე ფორმაში თავიდან შესვლა, რაც არ არის მარტივი პროცესი. ამიტომ, ამ სიახლით, ფეხბურთელები წესით კმაყოფილი უნდა ყოფილიყვნენ. და თუ შეატყვეთ, ამ ტურნირზე საგრძნობლად იკლო ტრავმებმაც, რაც სწორედ მისი ჩატარების დროის დამსახურებაა - სად გახურებული რომ თამაშობ და სად, გახურებული, მერე დასვენებული და ისევ გახურებული.

კმაყოფილი ჩანს თავიდან მაგარი დამფრთხალი ქომაგთა ლეგიონიც. ამ შიშსაც თავის მიზეზები ჰქონდა - ჩვენ არასდროს გვიყურებია მსოფლიოსთვის მაშინ, როცა ფანჯრები დახურულია და მარწყვის მაგივრად მაგიდაზე მანდარინი აწყვია, როცა თამაშის დროს სხვა ფანჯრებიდან გოლით ან უგოლობით გამოწვეული ღრიალი და დასრულებისას ეზოში გავარდნილი ბავშვების ჟრიამული არ გესმის, როცა სადმე ქალაქგარეთ კი არ ხარ წამოკოტრიალებული ჩრდილში, არამედ ჯერ კიდევ გაყინულ სიბნელეში უნდა ადგე და ვთქვათ, ბავშვი წაიყვანო სკოლაში... მაგრამ ჩვენ დაგვავიწყდა ფეხბურთის ჯადოსნური ძალა, რომელსაც სეზონები არ აინტერესებს და ყველაფერს გითბობს და გიფერადებს - შეუძლებელია, ვინმეს მართლა გულშემატკივრობდე და გციოდეს, ბნელოდეს და რამე გეზარებოდეს. და თან ჩემპიონატისშემდგომი მონატრებაც ადვილი გადასაგორებელია - ჯერ ახალი წელია და მერე ხვიჩა იწყება, ჩვენი პირადი მსოფლიოს ჩემპიონატი.

შეიცვალა თავად ფეხბურთიც, რომელშიც უკვე არ გვიკვირს, რომ ყოველწამიერად ერევა ვიდეოკონტროლი, რაც არცთუ სასიამოვნო პაუზებს და ხანდახან ემოციებსაც იწვევს - რამდენჯერ ვნახეთ, როგორ გაუხარდა რომელიმე გუნდს გოლი და მერე ეს გოლი როგორ გაუქმდა. შეუძლებელია, ეს ფეხბურთელის ფსიქოლოგიაზე კარგად მოქმედებდეს, მაგრამ ტექნოლოგიების გააქტიურებას პლუსიც აქვს - თითქმის ასპროცენტიანი სამართლიანობა სადავო ეპიზოდებში, რაც ფეხბურთისთვის უაღრესად მნიშვნელოვანია. და სუფთა დრო - წარსულს ჩაბარდა გოლების სამწუთიანი აღნიშვნები და სიმულანტური კოტრიალი, ყველაფერი კომპენსირდება მსაჯის გაჩერებული წამზომით, რამაც ზოგადად საფეხბურთო მატჩები რამდენიმე წუთით გაწელა.

სიახლეებია წმინდა საფეხბურთო დეტალებში, ტაქტიკურ და სტრატეგიულ სქემებში, სამწვრთნელო მონახაზებში და ასე შემდეგ, თუმცა ამაზე, უმჯობესი იქნება მას შემდეგ ვილაპარაკოთ, როცა გაირკვევა - ფეხბურთს ერთი ახალი ღმერთი ჰყავს თუ ძველი ღმერთების ჯგუფი გაიზრდება ერთი ახალი წევრით.

ხვალამდე

დღე ოცდამეშვიდე - მანდარინად ქცეული მარწყვი

უახლესი ამბები