პროფესიონალ ჩოგბურთელთა ასოციაციის ოფიციალურ ვებგვერდზე საქართველოს პირველ და მსოფლიოს მეცხრამეტე ჩოგანზე, ნიკოლოზ ბასილაშვილზე ვრცელი სტატია ვრცელდება.

ბასილაშვილი ATP-ისთან ინტერვიუში პროფესიონალ ჩოგბურთელობამდე მის კარიერას და განვლილ გზას იხსენებს. ქართველ ჩოგბურთელზე სტატიაში ასევე საუბრობს მისი მთავარი მწვრთნელი, იან დე ვიტი.

"ნიკოლოზ ბასილაშვილი პერფექციონისტი და ამავდროულად შემოქმედია. ის ცდილობს ჩააგდოს ყველაზე სუფთა ბურთები, გააერთიანოს დარტყმები, რომლებიც დამანგრეველია და ითამაშოს სრულყოფილი თამაში. მაგრამ ჩოგბურთი ოპტიმალურია, უნდა გაყვე გეგმას და რაც შეიძლება ეფექტურად შეასრულო შენი საქმე", - წერს სტატიის ავტორი ჯეიმს ბადელი.

იან დე ვიტი: "სრულყოფილად ყოფნის დიდი გულშემატკივარი არ ვარ. ვიცი, რომ სუპერ სიზუსტის სურვილის რეპუტაცია მაქვს, მაგრამ ვერ შეძლებ ასეთად ყოფნას. მარტივ გადაწყვეტილებამდე უნდა მიხვიდე და თამაში კიდევ უფრო არ უნდა გაართულო. ნიკას ძალიან მოსწონს რაღაცების სრულყოფილად კეთება და სურს ეს ყველაფერი მარტივი გამოჩნდეს, ამიტომ იბრძვის მოგებისთვის".

"ბასილაშვილი, რომელმაც პროფესიონალურ ლიგაში თამაში 2008 წლიდან დაიწყო, ყოველდღიურად საკუთარ ბუნებრივ ინსტიქტს ებრძვის.

ნიკოლოზ ბასილაშვილი: "ჩოგბურთი მხოლოდ ბურთზე დარტყმა და ფიზიკური მონაცემები არ არის, ის მენტალურ მხარეზე მუშაობაცაა. სპორტის ამ სახეობაში ძალიან მნიშვნელოვანია, გადამწყვეტ მომენტებში ნერვების მოთოკვა. ამ გამოცდილებას ჯერ კიდევ ვიღებ. 22-23 წლის ასაკამდე საუთარი მიდგომებით არაპროფესიონალი ვიყავი. ვიცოდი, რომ კარგად თამაში მინდოდა, მაგრამ ამ დონეზე თამაში არ შემეძლო. გეგმაც არ მქონდა, რომ შედეგისთვის მიმეღწია. ვიცოდი, რომ რაღაც მაკლდა. დიდი ხნის განმავლობაში, მსოფლიო რეიტინგში 50-100-ეულში ვიყავი. მჭირდებოდა ვინმე, ვისაც ასი პროცენტით ვენდობოდი".

სტატიის ავტორი ასევე ქართველი ჩოგბურთელის ადრეული ასაკის მწვრთნელის, სტეფენ კუნის სიტყვებსაც იშველიებს, რომელიც ამბობს, რომ დარწმუნებული იყო, ბასილაშვილი არაფერს შეუშინდებოდა.

სტეფენ კუნი: "ძალიან მომწონდა მისი ძლიერი ჩაწოდებები. ის მძიმე სამუშაოს შესრულებას არასდროს ერიდებოდა და მაშინვე ვიცოდი, რომ ამ ბიჭს ვერავინ და ვერაფერი შეაშინებდა, რათა ჩოგბურთელი გამხდარიყო".

"მისი ნიჭი კითხვის ნიშნის ქვეშ არასდროს დაყენებულა, თუმცა ბასილაშვილმა, რომელმაც ჩოგბურთი პირველად ხუთი წლის ასაკში ითამაშა, რთულ პერიოდს იხსენებს:

ნიკოლოზ ბასილაშვილი: "იყო მომენტები, როდესაც რამდნეიმე კვირის განმავლობაში მე და მამაჩემს მანქანაში გვეძინა. საინტერესო თავგადასავალი იყო. ცუდ კონდიციებში ვვარჯიშობდი და სპონსორსაც ვერ ვპოულობდი, ამიტომ რუსეთის მოქალაქეობა მივიღე. ახალგაზრდულ ტურნირებზე, იყო დრო, როდესაც თვეების განმავლობაში მანქანაში ან ტურნირის კარავში გვეძინა. 20-21 წლის ასაკში ჩოგბურთის თამაში პრაქტიკულად ახლიდან დავიწყე, მენტალურად განადგურებული ვიყავი. ცხოვრებაში ცუდი რაღაცები ტყუილად არ ხდება. ამან უფრო გამაძლიერა და დიდი სურვილი მომცა, ჩოგბურთი უმაღლეს დონეზე მეთამაშა.

მხოლოდ იმაზე ვფიქრობდი, რომ საკმარისი ფული მქონოდა, რათა ტურნირებზე მეასპარეზა. ვფიქრობდი კორტის დაჯავშნაზე, ბურთებზე და ვარჯიშზე სპარინგ პარტნიორის ყოლაზე, ეს ყველაფერი მხოლოდ გადარჩენისთვის იყო. როდესაც 2015 წელს უიმლდონის საკვალიფიკაციო ეტაპი დავძლიე და ძირითად ბადეში ორი შეხვედრა მოვიგე, ვფიქრობ, ამან ჩემში დიდი ცვლილება გამოიწვია. კარგ ჩოგბურთს ვთამაშობდი, თუმცა ტოპ 50 ჩოგბურთელს შორის ვერ შევდიოდი. ვიცოდი, რომ ამისთვის მენტორი მჭირდებოდა. ვიცოდი, იანის ტაქტიკა და სამწვრთნელო შესაძლებლობები, სწორედ ამიტომ დავუკავშირდი მას".

იან დე ვიტი: "მომხიბლა მისმა რეაქციებმა ვარჯიშებზე. დავრწმუნდი, რომ ეს ბიჭი საქმეს სერიოზულად უდგება და საკუთარი თამაშის გასაუმჯობესებლად ყველაფერს გააკეთებდა".

განვლილი რთული პერიოდის გახსენების შემდეგ, ბასილაშვილმა ATP-ის ორი ტურნირის მოგებაზე და ამჟამინდელ წარმატებაზეც ისაუბრა.

ნიკოლოზ ბასილაშვილი: "ATP-ის ტურზე ფინალში აქამდეც ვყოფილვარ, კიცბუელსა (2016 წლის ივნისი) და მემფისში (2017 წლის თებერვალი), მაგრამ ტურნირის მოგება განსხვავებული გრძნობაა, მითუმეტეს 500-იანის. ამან თავდაჯერებულობა შემმატა, რაც ჩოგბურთში ყველაზე მნიშვნელოვანია - გახვიდე კორტზე და გჯეროდეს, რომ მატჩს მოიგებ.

ახალი მიმართულება მაქვს - ვიყო უფრო პროფესიონალი და ჩემს მწვრთნელს ბოლომდე ვენდო. ATP-ის ტურნირის მოგების სახით, მჭირდებოდა დასტური, რომ ნამდვილად სწორ გზაზე ვიდექი. და როდესაც ჰამბურგისა და პეკინის ტურნირები მოვიგე, მოტივაცია მომეცა".

დე ვიტსა და ბასილაშვილს უკვე აქვთ გეგმა, რომლისთვისაც ისინი ერთობლივად მუშაობენ. გერმანელი სპეციალისტის თქმით, მათი მიზანი, გრანდ სლემის მოგებაა.

იან დე ვიტი: "ზუსტად ვიცით, რაც გვსურს. მაკვირვებს, როგორ სწრაფად პროგრესირებს ნიკა. არასდროს მყოლია მოთამაშე, რომელიც ისე სწრაფად სწავლობს, როგორც ის. მას განსაკუთრებული ნიჭი აქვს, როცა საქმე ბიომექანიკისა და ტექნიკის სწავლას ეხება. როცა მასთან მუშაობას ვიწყებდი, ამის შესახებ არაფერი ვიცოდი. მსოფლიო რეიტინგის ოცეულში მოხვედრა მისი ან ჩემი მიზანი არ ყოფილა. არც ათეულში შესვლაა ჩვენი მიზანი, ეს ყველაფერი ისედაც მოვა, თუ ყველაფერს სწორად გავაკეთებთ. მოკლე პერიოდში არაფერი კეთდება. ჩვენი მიზანი გრანდ სლემის მოგებაა. გაკვირვებული ვარ და ძალიან მიხარია, რომ ის სწრაფად სწავლობს, თუმცა მნიშვნელოვანია, რომ ჩვენ ყველაფერს ეტაპოვბრივად ვაკეთებთ. მოკლე გზა არ არსებობს და ყველგან გამოწვევებია. მარტივი დღე არ არსებობს, პრობლემები ყოველთვის გვექნება. ყველაფერს ვაკეთებთ, რომ მისი პოტენციალი ბოლომდე გამოვიყენოთ. თუ ყველაფერს ერთად და სწორად გავაკეთებთ, ნიკა გრანდ სლემისთვის მზად იქნება".

ბასილაშვილის მწვრთნელი: ჩვენი მიზანი გრანდ სლემის მოგებაა

უახლესი ამბები