2022 წლის მსოფლიო ჩემპიონატი ბოლო იქნება, რომელშიც 32 ნაკრები მიიღებს მონაწილეობას. მათ შორის არის მაროკო, რომელსაც ჯგუფში 2018 წლის მსოფლიო ჩემპიონატის მესამე ადგილოსანი ბელგია და ფინალისტი ხორვატია ჰყავს.

მეტსახელი: ატლასის ლომები

ფიფას რეიტინგი: 22

მსოფლიო ჩემპიონატებზე: (1970, 1986, 1994, 1998, 2018, 2022).

მაროკოელთა თითქმის ყველა მოთამაშე სხვა ქვეყნის ჩემპიონატებში თამაშობს, მათ შორის მეტად წარმომადგენლობითშიც. საერთო ფანოზე გამოკვეთილები არიან სევილიას 25 წლის თავდამსხმელი იუსეფ ენ ნესირი, ფიორენტინას 26 წლის ნახევარმცველი სოფიან ამრაბატი და, რა თქმა უნდა, პსჟ-ს 23 წლის მცველი აშრაფ ჰაკიმი. სწორედ მათზე ამყარებენ იმედებს ჩრდილოეთ აფრიკელი გულშემატკივრები.

მაგრამ როდესაც ჯგუფში 2018 წლის მსოფლიო ჩემპიონატის მესამე ადგილოსანი ბელგია და ფინალისტი ხორვატია გყავს, მასში წარმატება ურთულესი უნდა იყოს. მაროკოც, ისევე როგორც კანადა, F ჯგუფის აუტსაიდერებად უნდა მივიჩნიოთ.

ადრეული წარმატებები

მაროკოელებმა ერთადერთხელ შეძლეს ჯგუფიდან გასვლა - 1986 წლის მექსიკის მსოფლიო თასზე. ისევე როგორც ახლა, ჩრდილოეთ აფრიკელები 36 წლის წინაც F ჯგუფში მოხვდნენ, ფლეი ოფში გასასვლელად კი ინგლისთან, პოლონეთთან და პორტუგალიასთან მოუწიათ ურთიერთობის გარკვევა, რაც პოლონეთთან და ინგლისთან ნულოვანი ფრით და პორტუგალიასთან მოგებით (3:1) ჯგუფში პირველი ადგილის დაკავებით შეძლეს კიდეც.

მერვედფინალში გასულებს ტურნირის ფავორიტად შერაცხილი გერმანიის ფედერაციული რესპუბლიკის გუნდი ელოდა. მაროკოელებმა ღირსეული მატჩი ჩაატარეს და ახლოსაც იყვნენ სენსაციასთან, მაგრამ ლოთარ მათეუსის მიერ 88-ე წუთზე საჯარიმოდან გატანილმა გოლმა შეხვედრის ბედი განსაზღვრა.

მწვრთნელი და სათამაშო სტილი

მთავარი მწვრთნელი: ვალიდ რეგრაგი

"ატლასის ლომებმა" მსოფლიო შესარჩევი ვაჰიდ ჰალილჰოჯიჩის ხელმძღვანელობით გაიარეს, მაგრამ აგვისტოში ორმხრივი შეთანხმების საფუძველზე ბოსნიელი მწვრთნელი ნაკრებიდან წავიდა, მისი ადგილი კი 47 წლის ვალიდ რეგრაგს ანდვეს. აქედან გამომდინარე, რთულია იმის განსაზღვრა, თუ რა ტაქტიკური ჩანაფიქრები და სათამაშო პრინციპები აქვს მაროკოელთა დამრიგებელს, რომელსაც ერთ-ერთ პერსპექტიულ აფრიკელ მწვრთნელად მიიჩნევენ.

ჰალილჰოჯიჩის ხელში მაროკოს ნაკრები 3-5-2, ან 4-4-2 სისტემით თამაშობდა, ახალი მწვრთნელი კი უპირატესობას ანიჭებს 4-2-3-1 სათამაშო სისტემას. თუმცა, ორთვენახევრის განმავლობაში, ანუ მას შემდეგ რაც მწვრთნელის სავარძელი რეგრაგმა დაიკავა, ნაკლებ სავარაუდოა, რომ რეგრაგს ძირეული ცვლილებები შეეტანა თამაშში.

მაროკოელთა სათამაშო სტილი ფლანგურ შეტევებზეა აგებული, სადაც რიცხობრივი უპირატესობის მოპოვებას ცდილობენ, უყვართ შორეული დარტყმები. იყენებენ ფეხბურთელთა ინდივიდუალურ ოსტატობას - ტექნიკას და სიჩქარეს. უყვართ კონტრშეტევებიც.

ნაკრებში მისვლამდე რეგრაგმა მაროკოულ ვიდადს აფრიკის ჩემპიონთა ლიგა მოაგებინა. ყატარში წარმატებით ასპარეზობის შემთხვევაში კი შეიძლება, მას რომელიმე ევროპული კლუბის მწვრთნელობაც შესთავაზონ.

ლიდერები

აშრაფ ჰაკიმი მაროკოელთა ვარსკვლავია და ბევრი რამ ყატარში სწორედ მასზე იქნება დამოკიდებული. მარჯვენა მცველის პოზიციაზე მოთამაშე გუნდის შეტევაზე მნიშვნელოვან როლს ასრულებს. სწორედ მის გამო ყოფილი მწვრთნელი ჰალილჰოჯიჩი იყენებდა 3-5-2 სათამაშო სისტემას, რათა მაროკოელთა ვარსკვლავისგან მაქსიმალური სარგებელი მიეღო. გამოირჩევა ბრწყინვალე სათამაშო ინტელექტით და ნახევარმცველობასაც ითავსებს.

მაროკოელები ასევე დიდ იმედებს ამყარებენ ჰაკიმ ზიეშზე. მართალია, ჰალილჰოჯიჩთან უკმაყოფილების გამო, თითქმის წელიწადზე მეტია უმთავრეს გუნდში არ უთამაშია, მაგრამ ახალი მწვრთნელის თქმით, ზიეშისთვის კარი ღიაა.

ჰაკიმი კარგია ფლეიმეიკერის როლში, ასევე როგორც სტანდარტულების შემსრულებელი. 40 სანაკრებო მატჩში 17 გოლი ყველაფერზე მეტყველებს. აშრაფ ჰაკიმთან ერთად მარჯვენა ფლანგზე ყოფნა შეიძლება მაროკოელთა წყობაში საკვანძო გახდეს. გარდა ამისა, ზიეშს შეუძლია თავდამსხმელის უკან ცენტრში თამაში, სადაც მაროკოელებს პრობლემები აქვთ.

მეორე სართულზე თამაშში "ატლასის ლომების" მთავარი იარაღად შეგვიძლია მივიჩნიოთ იუსეფ ენ-ნასირი. მისი როლი არამარტო გოლების გატანაა, არამედ შეტევებში ფლანგების ჩართვაც. მთელი თავისი კარიერა ლა ლიგაში თამაშობს და შეზღუდულ სივრცეების გამოყენება მშვენივრად იცის. 192 სანტიმეტრ სიმაღლის მიუხედავად, მოქნილია და სწრაფი.

ძლიერი მხარე: მეორე სართულზე თამაში, ფეხბურთელთა საშუალო დონე.

სუსტი მხარე: მოედნის ცენტრი, ფსიქოლოგია და სამწვრთნელო გადაადგილება.

მაროკოელთა თამაშში მეორე სართულზე ორთაბრძოლები მრავლად არის წარმოდგენილი როგორც მეტოქის, ისე მათსავე საჯარიმოში. ასე რომ, ამ მხრივ მეტად გაწაფულები არიან. მაროკოელები მეორე სართულზე ორთაბრძოლებიდან საშუალოდ 55 პროცენტიდან გამარჯვებულები გამოდიან.

ჰყავთ რამდენიმე კარგზე უკეთესი ფეხბურთელი, რომლებიც ევროპის ტოპ ჩემპიონატებში გამოდიან. არ ეშინიათ ინიციატივის აღების და ხანდახან არაორდინარული გადაწყვეტილებებითაც გვაკვირვებენ.

მაროკოელთა სისუსტე მათ წყობაშია - საყრდენ ზონაში თითქმის არავინ ჰყავთ, რადგან დაცვიდან შეტევაში სწრაფად გადადიან, ეს კი ნებისმიერ ძლიერ გუნდს ხელ-ფეხს უხსნის. დიდად არ აქცევენ ყურადღებას ცენტრალური ზონიდან მოქმედებას, უპირატესობას ფლანგებზე ბურთის გათამაშებას ანიჭებენ და არც შეტევაში აქვთ ყველაფერი აწყობილი.

აღსანიშნავია, რომ მაროკო არ იყენებს პრესინგს. უკან დახევას და საჯარიმოსთან ახლოს დაცვას ამჯობინებენ.

ყატარის მსოფლიო თასამდე ორთვენახევრით ადრე მწვრთნელის შეცვლაც, ალბათ, უარყოფით როლს ითამაშებს.

🇧🇪🇨🇦🇲🇦🇭🇷

Who will progress from Group F at the #FIFAWorldCup? pic.twitter.com/384xP6eJpj
— FIFA World Cup (@FIFAWorldCup) October 19, 2022

F ჯგუფი

პირველი ტური, 23 ნოემბერი

მაროკო - ხორვატია, 14:00 ("ელ ბაითი", ელ ჰაური)

ბელგია - კანადა, 23.00 ("აჰმედ ბინ ალი", ერ რაიანი)

მეორე ტური, 27 ნოემბერი

ბელგია - მაროკო, 17.00 ("ელ ტუმა", დოჰა)

ხორვატია - კანადა, 20.00 (ხალიფა, დოჰა)

მესამე ტური, 1 დეკემბერი

ბელგია - ხორვატია, 19.00 (("აჰმედ ბინ ალი", ერ რაიანი)

კანადა - მაროკო, 19.00 ("ელ ტუმა", დოჰა)

გაიცანი მსოფლიო ჩემპიონატის მონაწილე - მაროკო

მაროკოელებმა ერთადერთხელ შეძლეს ჯგუფიდან გასვლა - 1986 წლის მექსიკის მსოფლიო თასზე

უახლესი ამბები