მიდინარე სეზონში ნაპოლის ბრწყინვალე სტარტსა და ამ ყველაფერში ხვიჩა კვარაცხელიას დიდ როლზე უამრავმა უცხოურმა გავლენიანმა გამოცემამ დაწერა. მაგალითად ასეთები იყვნენ The Washington Post და New York Times. ასევე არაერთი ცნობილი იტალიური გაზეთიც. ახლა კი მორიგ სტატიას უკვე CNN აქვეყნებს შემდეგი სათაურით: "ხვიჩა კვარაცხელია - ნაპოლის ქართული სენსაცია, რომელსაც "კვარადონა" დაერქვა".

როდესაც ისინი კვარას ხედავენ, ხედავენ მარადონას.

ნაპოლის ყოველთვის ჰყავდა შეტევის ხაზში გამორჩეული მოთამაშეები. ბოლო წლებში იყვნენ დრის მერტენსი და ლორენცო ინსინიე, უფრო ადრე ეზეკიელ ლავეცი და მარეკ ჰამშიკი, მაგრამ ნაპოლის გულშემატკივრებისთვის ისეთი პოპულარული და საყვარელი არავინ ყოფილა, როგორც მარადონა. არგენტინელი ნეაპოლელთათვის სიმბოლოდ იქცა. იქ გატარებული შვიდი სეზონის განმავლობაში, მან გაიტანა გოლები და მოიგო ტიტულები.

"ელ პელუზამ" კლუბში დიდი კვალი დატოვა. სწორედ მის დროს შეძლო ნაპოლიმ ისტორიაში ორჯერ სკუდეტოს მოგება და ევროასპარეზზეც იმ ერთადერთი წარმატების მიღწევა 1988-89 წლებში. მარადონას გარდაცვალების შემდეგ, 2020 წელს ნაპოლის სტადიონი მისი სახელობის გახდა. მან კლუბი 1991 წელს დატოვა.

მარადონასთან სხვა ფეხბურთელის შედარება ნაპოლის გულშემატკივრებისთვის არის იმედი იმისა, რომ ის მოიტანს დიდ წარმატებას. მარადოანს მემკვიდრედ არაერთი მოთამაშე შერაცხეს, თუმცა სერია ა-ს მესამე ტიტული ნაპოლისთვის მიუღწეველი დარჩა.

მიმდინარე წლის ივლისში ნაპოლის რიგებში ახალგაზრდა შემტევი, ხვიჩა კვარაცხელია ჩაირიცხა. მან უკვე ნოემბრამდე იმდენი მოახერხა, რომ მარადონას ადარებენ. იტალიაში ელვისებურად დაწყებული სიცოცხლის შემდეგ, მას მოფერებით "კვარადონა" შეარქვეს. მან ფეხბურთის სიყვარულით შეშლილი ქალაქი სრულად დაიპყრო.

კროკოს სპორტული ჟურნალისტი, ედო ბადალაშვილი სექტემბერში ნეაპოლს ეწვია, რათა ენახა კვარაცხელიას თამაში თავისი საყვარელი კლუბის, ლივერპულის წინააღმდეგ.

მიუხედავად იმისა, რომ ხვიჩას იმ მატჩში გოლი არ გაუტანია, მან ლივერპულელი მცველები "გააწამა" და ნაპოლის დამაჯერებელ გამარჯვებაში (4:1) დიდი წვლილი შეიტანა.

"ჩვენი ქართველი ემიგრანტები, რომლებიც ნეაპოლში ცხოვრობენ, ამბობდნენ, რომ კვარას გამო, როგორც ქართველებს მათ პიცას უფასოდ აძლევენ", - განუცხადა ედო ბადალაშვილმა CNN-ს. "მარადონას ქალაქში, კვარა ყველას უყვარს. მათ მისი მაისურები აცვიათ. როცა აქაურებმა გაიგეს, რომ საქართველოდან ვარ, მათ თბილად მიმიღეს, ფოტოები გადაიღეს და "ხვიჩა ხვიჩას" სკანდირებდნენ. მართალია, გვარის სწორად წარმოთქმა ჯერ კიდევ უჭირთ, თუმცა არ ვიცი, კვარაცხელიამ ეს ასე მოკლე დროში როგორ მოახერხა. დამიჯერეთ, ნეაპოლში ის ძალიან უყვართ და აქ ის დღევანდელი გუნდიდან პირველ მოთამაშედ მიიჩნევა. მე მაქვს ვიდეო, სადაც აღბეჭდილია თუ როგორ სკანდირებენ ნაპოლის გულშემატკივრები ფეხბურთელების გვარებს ლივერპულთან მატჩის წინ. გვარი, რომელსაც ყველაზე ხმამაღლა სკანდირებდნენ, იყო კვარაცხელია!".

ნაპოლიში ხანგრძლივი მოღვაწეობის შემდეგ, კლუბი ორმა სახელოვანმა მოთამაშემ, ლორენცო ინსინიემ და დრის მერტენსმა დატოვეს. შესაბამისად, ნაპოლი შეტევის ფლანგზე შემცვლელს ეძებდა. ბევრისთვის მოულოდნელად, მათ შეიძინეს უამრავი გულშემატკივრისთვის უცნობი ფეხბურთელი, ხვიჩა კვარაცხელია ბათუმის დინამოდან.

იმის გათვალისწინებით, რომ კვარაცხელია თეორიულად ნაპოლისთვის საჭირო მონახაზს ავსებდა, ის "მოინათლა" კლუბის მთავარ ტრანსფერად გასულ ზაფხულს. ნაპოლის სპორტულ დირექტორებს ხშირად ეკითხებოდნენ, გააკეთეს თუ არა მათ საკმარისი და იმუშავეს თუ არა ისე, რომ ეს სეზონის განმავლობაში კლუბზე უარყოფითად არ ასახულიყო.

Total Italian Football-ის ჟურნალისტმა ეუან ბერნსმა CNN Sport-თან თქვა: "როდესაც ხედავ, რომ ინსინიე და მერტენსი გუნდიდან წავიდნენ, ხოლო მათ ნაცვლად პირდაპირ საქართველოს ჩემპიონატიდან 21 წლის უცნობი ახალგაზრდა მოვიდა, ფიქრობ, რომ რაღაც რიგზე ვერ არის. ყოველივე ამის ფონზე, გულშემატკივრები ფიქრობდნენ, რომ ამ ბიჭს არ შესწევდა საკმარისი ძალა, რომ ნაპოლის არსებული დანაკლისი შეევსო, მაგრამ ამის შემდეგ კვარაცხელიამ მოირგო 77-ნომრიანი მაისური და იმაზე ბევრად მეტი გააკეთა, ვიდრე მისგან ელოდნენ".

ლუჩანო სპალეტის შესუსტებული გუნდისთვის, 21 წლის ქართველი შეტევის მარცხენა ფლანგზე სიცოცხლის მამოძრავებელი ძალა გახდა. ის გუნდს დიდ დახმარებას უწევს გოლებითა და ასისტებით როგორც სერია ა-ში, ასევე ჩემპიონთა ლიგაზეც. ის ქარიშხალივით მოევლინა და ნაპოლი ევროპაში ერთ-ერთ ყველაზე საინტერესო გუნდად აქცია. ხანგრძლივ წაუგებელ სერიაში, მისი წვლილი ძალიან დიდია.

16 მატჩში მან რვა გოლი გაიტანა და ამდენივე საგოლე გადაცემა მიითვალა. ლივერპულის წინააღმდეგ გამართულ შეხვედრაში, მან ნამდვილი საფეხბურთო წვეულება მოაწყო. როდესაც ზემოთხსენებულ ბერნსს სთხოვეს გაეხსენებინა ფეხბურთელი, რომელმაც ასე მოკლე დროში იტალიურ ფეხბურთზე მსგავსი გავლენის მოხდენა შეძლო, მას ასეთი მოთამაშის გახსენება გაუჭირდა. მან კვარაცხელიას მრავალფეროვანი თამაში მანჩესტერ სიტის ახალწვეულ, ერლინგ ჰალანდის თამაშს შეადარა. ინგლისში მანაც საოცრად დაიწყო.

"ჰალანდთან დაკავშირებით საინტერესო ის არის, რომ მიუხედავად მისი ზომისა, მას აქვს თავდამსხმელობის ყველა ელემენტი იმ გაგებით, რომ მას შეუძლია დიდი გზა გაიაროს ბურთით და ეს მაღალ ტემპში გააკეთოს“, - თქვა ბერნსმა. "ასევე შეუძლია შორიდან ზუსტად და ძლიერად დარტყმა და თავით გოლების გატანა. ჩვენთან კი კვარაცხელია თავს გამორჩეულ გარემარბად გრძნობს. ის ჰალანდივით მაღალი არ არის, მაგრამ თავით ეფექტური გოლი მასაც აქვს გატანილი. ის ბურთითაც და მის გარეშეც ძალიან სწრაფია. კვარაცხელია ძალიან ძლიერია და ვფიქრობ, სწორედ ესაა ის, რაც მას განასხვავებს ისეთი მოთამაშეებისგან, როგორიც ინსინიეა. ლორენცო ხშირად წარმოუდგენლად კარგი იყო. მასაც შეეძლო ნებისმიერი ადგილიდან დაერტყა, თუმცა ის არ იყო განსაკუთრებულად ძლიერი ამ თვალსაზრისით. კვარაცხელიას კი შეუძლია, რომ მცველები ბურთს დააშოროს".

კროკოს ჟურნალისტის, ედო ბადალაშვილის თქმით, კვარაცხელიასა და ნაპოლის გულშემატკივრებს ერთმანეთთან დიდი სიყვარული აკავშირებთ. "კვარაცხელიასთვის ნაპოლი იყო პირველი გუნდი, რომლის სამკერდე ნიშანსაც მან გატანილი გოლის შემდეგ აკოცა". ედო ამბობს, რომ მას კარგად ახსოვს ხვიჩას თამაშები რუსთავში, თბილისის დინამოში, მოსკოვის ლოკომოტივსა და ყაზანის რუბინში.

"გოლის შემდეგ მან ნაპოლის სამკერდე ნიშანს აკოცა და ამით ბევრი რამ თქვა. ეს იყო სიგნალი, რომ უყვარს ნაპოლი და მისი მადლიერია. შემიძლია იმის თქმა, რომ კვარაცხელიას ნაპოლის მომავალ ლეგენდად ვხედავ. მისი სახელი უკვე მოიხსენიება როგორც "კვარადონა". როცა ამ კლუბის ქომაგებს ვესაუბრე, მათ მითხრეს, რომ როცა კვარას თამაშს უყურებენ, მასში მარადონას ხედავენ", - დასძინა ბადალაშვილმა.

კვარაცხელიამ საქართველოში ცხოვრება შეცვალა

მას შემდეგ, რაც 17 წლის ასაკში მისი დებიუტი შედგა საქართველოს უდიდეს საფეხბურთო გუნდში - დინამო თბილისში, კვარაცხელიას მომავალი ქვეყნის ტოტემური მოთამაშის სტატუსი მიეწერა, მაგრამ მისი ცნობისმოყვარეობის აწევა წრიულ გზას ადგა და დინამო თბილისიდან ერთი წლის შემდეგ შეუერთდა მეზობელი ქალაქის გუნდ რუსთავს. მას მეტი სათამაშო დრო სჭირდებოდა.

2018 წელს, Guardian-ის სტატიაში, სადაც საუბარი იყო 60 საუკეთესო ახალგაზრდა ფეხბურთელზე, ხვიჩა კვარაცხელიაც მოიხსენიეს. 2018-19 წლების სეზონის მეორე ნახევარში, ის იჯარით მოსკოვის ლოკომოტივში წავიდა. იქ მან თავისი კვალი ნამდვილად დატოვა, ხოლო შემდეგ ყაზანის რუბინთან სრულფასოვანი კონტრაქტი გააფორმა.

ბადალაშვილს ახსოვს, რომ მოსკოვის ლოკომოტივის მაშინდელი მენეჯერი - იური სიომინი ნამდვილად იყო იმედგაცრუებული, რომ კლუბმა კვარაცხელია ვერ შეინარჩუნა, რადგან ასეთი იყო მისი დაპირება.

ყაზანში გატარებული ორნახევარი სეზონის განმავლობაში, კვარაცხელია ჩამოყალიბდა როგორც პირველი გუნდის რეგულარული, ასევე საქართველოს ნაკრების მთავარი საყრდენი მოთამაშე.

მიუხედავად იმისა, რომ ის მოედანზე ვარსკვლავად იქცა, მის დაბრუნებას კრიტიკაც მოჰყვა. 2008 წელს რუსული არმია შემოიჭრა საქართველოში და ამ ქვეყნის მეხუთედი რუსეთის ოკუპაციის ქვეშაა. მაშინ საქართველოში ბევრი ამბობდა, რომ ამ საკითხზე კვარაცხელიას ღიად და თამამად უნდა ესაუბრა, თუმცა ხვიჩამ არჩია, რომ როგორც ფეხბურთელისთვის, მისი მხრიდან პოლიტიკაზე საუბარი სწორი არ იყო.

უკრაინაში რუსეთის შეჭრის და ფიფას გამოცხადების შემდეგ, რომ რუსეთში უცხოელ ფეხბურთელებს შეუძლიათ კონტრაქტების შეჩერება, კვარაცხელიამ ყაზანი დატოვა და საქართველოში დაბრუნდა, სადაც ბათუმის დინამოში ჩაირიცხა.

ქართულ კლუბში გატარებული გარკვეული დროის შემდეგ, ის ნაპოლიში გადავიდა. იტალიაში მის ჩასვლამდე, ხვიჩას თანაგუნდელი ეროვნულ ნაკრებში - გიორგი მამარდაშვილი უკვე ირიცხებოდა ლა ლიგის ბინადარ ვალენსიაში. ედო ბადალაშვილი თვლის, რომ ამ ორმა ფეხბურთელმა, გააღეს ევროპული ფეხბურთის კარები, რომლებიც აქამდე ქართველებისთვის დაკეტილი იყო.

"წლების განმავლობაში ჩვენი ფეხბურთელები ევროპაში ვერ მიდიოდნენ. არამარტო კვარაცხელია და მამარდაშვილი, ჩვენ კიდევ გვჭირდება მოთამაშეები ევროპაში. ამჟამად გვყავს სხვა კარგი ფეხბურთელებიც, მაგრამ ისინი ვერ მიდიან ევროპაში, ეს კი ძალიან გვჭირდება. კვარაცხელიასა და მამარდაშვილის ასეთი თამაშის ფონზე, არის იმედი, რომ სხვა ფეხბურთელების მიმართ ინტერესი გაიზრდება დ მათაც წაიყვანენ."

სიურპრიზი იყო ის თუ როგორ ავიდა ხვიჩა ამ დიდ სცენაზე. მან თავისი არაორდინალური სტილითა და ბურთთან ყოვლისმომცველი თამაშით დიდი შთაბეჭდილების მოხდენა შეძლო. ეს ყველაფერი მიანიშნებს იმაზე, რომ მას სამომავლოდ ნაპოლიზე უფრო დიდი გეგმები აქვს დასახული და ვიმედოვნებ, რომ ლივერპულს აირჩევს", - დასძინა ედო ბადალაშვილმა.

დღეს უკვე საქართველოში მისი რეპუტაცია გამყარებულია. როცა ის სამშობლოში დაბრუნდება, ისე მიიღებენ, როგორც ნამდვილ გმირს.

"ბოლო ორი წლის განმავლობაში, საქართველოში ყველაფერი შეიცვალა. ახლა ყველაფერი სხვანაირადაა. ვისაც ფეხბურთი არ უყვარდა, მათაც დაიწყეს ნაპოლის თამაშების ყურება. როცა ნაპოლი თამაშობს, საქართველოში დიდი დღეა. საქართველოს ნაკრების თამაშზე იმ ხალხმა დაიწყო სიარული, ვისაც ეს სპორტი აქამდე არ მოსწონდა. საქართველოს სხვადასხვა ქალაქებში უამრავ ადამიანს შეხვდებით, რომლებსაც კვარაცხელიას ნაპოლის ან საქართველოს ნაკრების მაისურები აცვიათ.

საქართველოს ეროვნულმა გუნდმა 11 მატჩის განმავლობაში შეძლო წაუგებლად ყოფნა. ახლა ხალხს იმედი აქვს, რომ ჩვენ შევძლებთ ევრო 2024-ზე ან შემდეგ მსოფლიო ჩემპიონატზე მოხვედრას. დღეს საქართველო ფეხბურთით ცხოვრობს. ჩვენ საფეხბურთო ქვეყანა ვართ. კვარაცხელიამ საქართველოში ცხოვრება შეცვალა და როცა აქ მოხვდებით, ამას დაინახავთ", - ამბობს ბადალაშვილი.

კროკო ნაპოლის რეგიონალური პარტნიორია!

CNN: ხვიჩა კვარაცხელია - ნაპოლის ქართული სენსაცია, რომელსაც "კვარადონა" დაერქვა

CNN ხვიჩა კვარაცხელიას შესახებ წერს

უახლესი ამბები