2022 წლის 20 ნოემბრიდან, 18 დეკემბრამდე ყატარი მსოფლიოს საფეხბურთო ჩემპიონატს უმასპინძლებს. აღსანიშნავია, რომ ყატარს მუნდიალის მასპინძლობა 200 მილიარდი ევრო დაუჯდა, რაც რუსეთის მიერ 2018 წლის მსოფლიო ჩემპიონატზე გაწეულ ხარჯებს თითქმის 20-ჯერ აღემატება.

საფრანგეთის ნაკრები D ჯგუფში მოხვდა, სადაც მასთან ერთად, დანიის, ავსტრალიისა და ტუნისის ნაკრებები იასპარეზებენ. მთავარ ფავორიტად „მამლები“ მიიჩნევიან, ხოლო მეორე ადგილზე გასვლის ყველაზე დიდ შანსს დანია ინარჩუნებს, რომლის სახითაც მათ საკმაოდ ძლიერი მეტოქე შეხვდათ.

მოქმედი ჩემპიონი ტიტულის დაცვას შეეცდება, რაც 62 წლის წინ, (1958-1960) ბრაზილიამ მოახერხა.

საფრანგეთის საფეხბურთო ასოციაცია 1904 წელს დაარსა და ამავე წელს, ფიფას წევრის სტატუსიც მიიღო. საფრანგეთის ნაკრებმა პირველი მატჩი 1905 წელს, შვეიცარიის ნაკრების წინააღმდეგ ჩაატარა, სადაც მეტოქე 1-0 დაამარცხა.

რაც შეეხება, მსოფლიო ჩემპიონატებზე მათ ასპარეზობას, პირველად მუნდიალზე 1930 წელს იასპარეზეს, სადაც სადებიუტო შეხვედრაში მექსიკასთან, 4-1 დამარცხდნენ. მსოფლიო ჩემპიონატზე ფრანგებმა პირველად მეტ-ნაკლებად წარმატებას 1958 წელს მიაღწიეს, როდესაც მესამე ადგილზე გავიდნენ.

მიუხედავად იმისა, რომ 80-იან წლებში „მამლებში“ სამ გზის ოქროს ბურთის მფლობელი, მიშელ პლატინი ასპარეზობდა, მათთვის არათუ მსოფლიო ჩემპიონის ტიტული, არამედ ფინალიც კი მიუღწეველი იყო. მათ 1982 და 1986 წლების მუნდიალებზე ნახევარფინალამდე გააღწიეს. 1982 წელს, ფრანგებმა მეოთხე, ხოლო 1986 წელს კი, მესამე ადგილის დაკავება მოახერხეს. აღსანიშნავია, რომ ამ ორ მუნდიალს შორის, 1984 წელს, ფრანგებმა ისტორიაში პირველი ოფიციალური ტიტული მოიგეს და ევროპის ჩემპიონები გახდნენ.

მსოფლიო ჩემპიონატზე ფრანგების პირველი წარმატება 1998 წელს შედგა. მათ ამ წელს მუნდიალს 60 წლის შემდეგ, პირველად უმასპინძლეს და როგორც აღმოჩნდა, მათთვის საკმაოდ იღბლიანადაც. „მამლებმა“ იმ დროს მოქმედი მსოფლიო ჩემპიონი, ბრაზილია 3-0 დაამარცხეს ისტორიაში პირველი ტიტულიც მოიგეს. 2002 წელს, აწ უკვე მოქმედი ჩემპიონი საფრანგეთი ჯგუფში ისე ჩარჩა, რომ გოლის გატანაც ვერ მოახერხა.

2006 წელს, რაიმონ დომენეკის გაწვრთნილი საფრანგეთის ნაკრები ფინალში გავიდა. „მამლებმა“ გზად ესპანეთის, ბრაზილიისა და პორტუგალიის ნაკრებები დაამარცხეს. ფინალში კი, მიუხედავად იმისა, რომ ზინედინ ზიდანის პენალტით დაწინაურდნენ, პენალტების სერიაში დამარცხდნენ.

2010 წლის მსოფლიო ჩემპიონატზე, საფრანგეთის ნაკრები კვლავ ჯგუფში ჩარჩა. მაშინ ჯგუფიდან ურუგვაისა და მექსიკის ნაკრებები გავიდნენ. 2010 წლის ივლისში, დომენეკის ნაცვლად მთავარ მწვრთნელად ლორან ბლანი დაინიშნა, რომელიც 2012 წლის ევროპის ჩემპიონატის შემდეგ დაითხოვეს. მის შემცვლელად კი, ასევე ყოფილი ფეხბურთელი და 1998 წლის მუნდიალის ტრიუმფატორი, დიდიე დეშამი დანიშნეს. მისი პირველი მუნდიალი არც თუ ისე წარმატებული გამოდგა. „მამლებმა“ მეოთხედფინალამდე გააღწიეს, სადაც იმდროისთვის მომავალ ჩემპიონთან, გერმანიის ნაკრებთან დამარცხდნენ.

2018 წელს, დიდიე დეშამს გაცილებით უფრო ძლიერი გუნდი ჰყავდა და ყველა რგოლში მაღალო დონის ფეხბურთელებით დაკომპლექტებული იყო. ჯგუფიდან გასვლის შემდეგ, ფინალისკენ მიმავალ გზაზე, საფრანგეთმა არგენტინის, ურუგვაისა და ბელგიის ნაკრებები დაამარცხა. რაც შეეხება ფინალს, საფრანგეთის ნაკრებმა ზლატკო დალიჩის ხორვატიის ნაკრები 4-2 დაამარცხა და ისტორიაში მეორე მუნდიალი მოიგო.

მწვრთნელი

დიდიე დეშამმა საფრანგეთის ნაკრები 2012 წლის ზაფხულში ჩაიბარა. მისი ხელმძღვანელობით „მამლებმა“ 2014 წელს პირველი მსოფლიო ჩემპიონატი ითამაშეს, სადაც მეოთხედფინალში გერმანიასთან დამარცხდნენ. 2016 წელს, დეშამმა საფრანგეთი პირველი დიდი ტურნირის ფინალში გაიყვანა. საფრანგეთი ევროპის ჩემპიონატის ფინალში პორტუგალიასთან დამარცხდა.

2018 წელს, საფრანგეთის ნაკრებმა გაცილებით უფრო ძლიერ შემადგენლობას მოუყარა თავი ისტორიაში თავისი მეორე ტიტულიც დადო. ამრიგად, დიდიე დეშამი გახდა მწვრთნელი, რომელმაც საფრანგეთის ნაკრებთან ერთად, მსოფლიო ჩემპიონობა როგორც ფეხბურთელის, ასევე მწვრთნელის რანგში იზეიმა. საფრანგეთის ნაკრებმა მსოფლიო ჩემპიონატი პირველად 1998 წელს მოიგეს. მაშინ მათ, სწორედ დეშამი კაპიტნობდათ.

დიდიე დეშამის ხელმძღვანელობით საფრანგეთის ნაკრებმა 132 მატჩი ჩაატარა, სადაც 84 მოიგო, 27 ფრედ ითამაშა, ხოლო 21 კი დათმო.

აღსანიშნავია, რომ 2022 წლის მუნდიალი, დიდიე დეშამისთვის საფრანგეთის მწვრთნელის რანგში ბოლო მუნდიალი იქნება. როგორც უცხოური პრესა წერს, დეშამს აღნიშნულ აღნიშნულ პოზიციაზე ზინედინ ზიდანი ჩაანაცვლებს.

ლიდერები

საფრანგეთის ნაკრები ყატარის მუნდიალს საკმაოდ დიდი დანაკლისით ხვდება. „მამლებს“ ნახევარდაცვის ლიდერები და 2018 წლის მუნდიალის ერთ-ერთი მთავარი ვარსკვლავები, ნ’გოლო კანტე და პოლ პოგბა დააკლდებათ. ორივე ამ ფეხბურთელს მსოფლიო ჩემპიონატის გამოტოვება ტრავმის გამო მოუწევთ. საფრანგეთის შუახაზში მათი ღირსეულად შეცვლა, ჩუამენსა და კამავინგას მოუწევთ, რომელთაც ფრანგული ფეხბურთის მომავალსაც უწოდებენ.

„მამლებმა“ ცოტა ხნის წინ, ტრავმის გამო კიმპემბე და ნკუნკუ დაკარგეს, რომლებიც დეშამმა, აქსელ დისასითა და მარკუს ტურამით ჩაანაცვლა.

საფრანგეთის ნაკრების ბანაკში ოქროს ბურთის მოქმედი მფლობელი, კარიმ ბენზემა დაბრუნდა, რომელსაც მეთიუ ვალბუენასთან დაკავშირებული სკანდალის გამო, დიდი ხნის განმავლობაში ეროვნულ ნაკრებში არ იძახებდნენ. კარიმ ბენზემასთან ერთად, შეტევის ხაზში მთავარ ვარსკვლავად კილიან მბაპე მოიაზრება.

შეტევის ხაზიდან ასევე გამოსარჩევია მილანის ვეტერანი ფორვარდი, ოლივიე ჟირუ, რომლის ანგარიშზეც საფრანგეთის ნაკრების მაისურით 49 გოლია. საფრანგეთის ნაკრების ყველა დროის საუკეთესო მეგოლის, ტიერი ანრის ანგარიშზე 51 გოლია და ყველაზე ახლოს მისი რეკორდის მოხსნასთან სწორედ ჟირუა.

შემადგენლობა

მეკარეები: ლორისი, არეოლა, მანდანდა

მცველები: უპამეკანო, ვარანი, დისასი, კონატე, სალიბა, პავარი, ლ.ერნანდესი, კუნდე, თ.ერნანდესი

ნახევარმცველები: ფოფანა, გენდუზი, რაბიო, ჩუამენი, კამავინგა, ვერეტუ

შემტევები: ბენზემა, კომანი, დემბელე, ტურამი, ჟირუ, გრიზმანი, მბაპე.

გაიცანი მსოფლიო ჩემპიონატის მონაწილე - საფრანგეთი

საფრანგეთის ნაკრები ბრაზილიის მიღწევის გამეორებას აპირებს

უახლესი ამბები