რამდენიმე დღის წინ ცნობილი გახდა, რომ ნაპოლის ქართველ შემტევ ხვიჩა კვარაცხელიასთან DAZN-მა ინტერვიუ ჩაწერა, რომლის მცირე ნაწილიც იტალიურ ვებ-გვერდებზე გავრცელდა, თუმცა დღეს სრული ვერსიაც გასაჯაროვდა.

საქართველოზე...

ჩემს სამშობლოში ფეხბურთი ყველას უყვარს და სპორტსმენებს დიდ პატივს სცემენ. აქედან გამომდინარე, ჩემთვის ამხელა სიყვარულის მიღება რთული არ არის. მას შემდეგ, რაც ნაპოლიში გადმოვედი, ამ გუნდის გულშემატკივარი ბევრი ქართველი გახდა. როდესაც საქართველოში დავბრუნდი, ძალიან სასიამოვნო იყო. ხალხი თბილად დამხვდა. ნაპოლის მატჩებს თბილისსა და სხვა ქალაქებში როგორც წესი, ყველა უყურებს ხოლმე.

დებიუტი ჩემპიონთა ლიგაზე

როცა წინასწარ იცი, რომ ასეთ ტურნირზე დებიუტი ლივერპულის დონის გუნდთან გექნება, ეს ორმაგ მოტივაციას გაძლევს, რადგან იქ თამაში დიდი ჩემპიონების წინააღმდეგ გიწევს. ვიცი, რომ ყოველთვის მაქსიმალურად უნდა დავიხარჯო. ჩემთვის ასეთი ვარსკვლავების წინააღმდეგ თამაში დიდი პატივია.

თამაში ძლიერი მცველების წინააღმდეგ

ვარჯიშებზე, საკმაოდ რთულია დი ლორენცოს წინააღმდეგ თამაში. ის ძალიან ძლიერია. საკუთარ თავზე ბევრს ვმუშაობ, რათა არაპროგნოზირებადი ვიყო და მცველებს ჩემი შეჩერება გაუჭირდეთ.

ოჯახის შესახებ

მამა ასევე ფეხბურთელი გახლდათ. ამ სპორტისადმი სიყვარულიც სწორედ მან გადმომცა. ბავშვობაში, ჩემი საყვარელი ფეხბურთელი გუტი იყო. მისი თამაშით ყოველთვის აღფრთოვანებული ვრჩებოდი.

თბილისის დინამოს აკადემიაში ყოფნის დროს, ჩვენთან ესპანელი სპეციალისტებიც მუშაობდნენ და მათგან ბევრი რამის სწავლა მოვახერხე. ეს ძალიან დამეხმარა. ვფიქრობ, ჩემი უმცროსი ძმა ჩემზე ძლიერი ფეხბურთელია, მაგრამ ამის დასამტკიცებლად თავდაუზოგავი შრომა მოუწევს. მიმაჩნია, რომ აქვს ყველაფერი, რათა ჩემზე უკეთესი გახდეს.

მესი თუ რონალდუ

ყოველთვის ვფიქრობდი, რომ ამ ორი მოთამაშის შედარება რთულია. არგენტინელი ფანტასტიკური ფეხბურთელია, ამავდროულად ვაფასებ კრიშტიანუს შრომასაც. ჩემი კერპი სწორედ რონალდუა. 77-ს პირდაპირი კავშირი არ აქვს. 7 ჩემი საყვარელი ნომერია და ასეა რონალდუს შემთხვევაშიც.

ლუჩანო სპალეტის შესახებ

მთავარ მწვრთნელთან ძალიან კარგი ურთიერთობა მაქვს. როდესაც მითითებებს მაძლევს, ყურადღებით ვუსმენ და ვცდილობ შეცდომები გამოვასწორო. თუ ლუჩანო მეტყვის, რომ რაიმეზე სამუშაო მაქვს, ამას დიდ ყურადღებას ვაქცევ. მისი მოვალეობა სწორედ ესაა, რომ მიმითითოს რა მჭირდება. სპალეტი თითოეულ მოთამაშესთან შესანიშნავი ურთიერთობის შენარჩუნებას ახერხებს. ეს გუნდს ძალიან ეხმარება.

თანაგუნდელებთან ასევე შესანიშნავი ურთიერთობა მაქვს. მათ პირველივე დღიდან თბილად მიმიღეს. ადაპტაცია სწრაფად გავიარე და ამაში ყველამ დიდი როლი ითამაშა. სიმართლე გითხრათ, არ ველოდი თუ ეს ყოველივე ასე მარტივად მოხდებოდა.

მოლაპარაკებები ნაპოლისთან

ეს მარტივი პროცესი არ ყოფილა, საკმაოდ დიდხანს მიმდინარეობდა. შეიძლება ითქვას, რომ დაახლოებით ორი წელი. რა თქმა უნდა, მიხაროდა, რომ ასეთი დონის გუნდი ჩემით სერიოზულად ინტერესდებოდა.

ხშირად ვუყურებდი ამ გუნდის თამაშებს და მისი სტილი მომწონდა. საკუთარ თავს ვეუბნებოდი, რომ ასეთ მოთამაშეებთან ადაპტირებას შევძლებდი. მიხარია, რომ ახლა თამამად შემიძლია ვთქვა - მე ნაპოლის ფეხბურთელი ვარ, ამ ოჯახის წევრი.

ქალაქი ნეაპოლი ნებისმიერს მოხიბლავს. თავისებური ქალაქია, გასაოცარი სილამაზით. აქაური მაცხოვრებლები კი განსაკუთრებულები არიან. ისინი ფეხბურთის სიყვარულით ცხოვრობენ. ყოველი დღე ფეხბურთზე საუბრით იწყება და მთავრდება.

სამწუხაროა, რომ ამ ქალაქის კარგად დათვალიერებას ვერ ვახერხებ, რადგან ხშირად გარეთ გამოსვლა ფიზიკურად შეუძლებელია. მაბედნიერებს, რომ გულშემატკივრები ჩვენზე ძალიან არიან შეყვარებულნი.

გოლის აღნიშვნა სტეფ კარის სტილში

ასეთი რამის გაკეთება იმ მომენტში არსებულ განწყობაზეა დამოკიდებული. დიახ, ხშირ შემთხვევაში ასეა და არ ვიცი, ოდესმე გავიმეორებ თუ არა. წინასწარ არასდროს ვიცი თუ რას გავაკეთებ გოლის გატანის შემდეგ. ეს ყველაფერი ბუნებრივად ხდება.

ფეხბურთის სტეფ კარი? ეს რონალდუა. მთელი ცხოვრებაა მისი გულშემატკივარი ვარ და ეს დღესაც ასეა. ის ახლაც აქტიურ ფეხბურთშია და სანამ ითამაშებს, მის ყურებას გავაგრძელებ. არის კიდევ ერთი აღნიშვნა, რომელსაც ასევე ხშირად ვაკეთებ ხოლმე. ეს ჩემი შეყვარებულის სახელის პირველი ასოა.

საყვარელი კერძი და სიტყვა იტალიურად

რა თქმა უნდა, Forza Napoli, ხოლო კერძი სპაგეტი ტომატის სოუსით.

ფიქრი სკუდეტოს მოგებაზე

ვფიქრობ, ამის შესაძლებლობა ნამდვილად გვაქვს, მაგრამ სეზონის დასკვნით ნაწილამდე დიდი დროა და წინ უამრავი რთული მატჩი გველოდება. ამ ყველაფერს კი უმაღლეს დონეზე მომზადებულები უნდა შევხვდეთ. ფეხბურთელები და მთლიანად გუნდის წარმომადგენლები ამ მიზნის მისაღწევად ძალებს არ დავიშურებთ. როდესაც მინდორზე გამოვდივართ, ერთადერთი მიზანი გვაქვს და ეს გამარჯვებაა. მოტივაციის ნაკლებობას ნამდვილად არ განვიცდით და მჯერა, რომ ტიტულის მოგება შეგვიძლია.

ადგილის დამკვიდრება ევროპის საუკეთესო მოთამაშეთა შორის

ყოველთვის რთულია იფიქრო იმაზე, რომ ასეთი პატარა ქვეყნიდან შენ შეგიძლია დიდ გუნდში ითამაშო. საუკეთესოთა შორის ადგილის დამკვიდრება? ალბათ, ამისგან ჯერ კიდევ შორს ვარ. ეს უდიდეს შრომას მოითხოვს. ნაპოლის დონის გრანდში თამაშზე ყოველთვის ვოცნებობდი, მაგრამ კიდევ ბევრი მიზანი მაქვს დასახული და რა თქმა უნდა, მის მისაღწევად ყველაფერს გავაკეთებ.

მეტსახელები

აქ ჩამოსვლის შემდეგ, რამდენიმე მეტსახელი შემარქვეს. ერთ-ერთი "კვარადონაა", რომელიც ძალიან მომწონს, მაგრამ ამავდროულად უდიდეს პასუხისმგებლობას მაკისრებს. ჩემთვის ეს დიდი პატივია და ამით ამაყი ვარ. როცა მარადონას სახელის მცირე ნაწილსაც კი შენ გიკავშირებენ, შეუძლებელია განსხვავებული ემოცია განიცადო.

ყოველთვის მაქსიმალურად ვიხარჯებოდი, მაგრამ არ ვიცი, ველოდი თუ არა ასეთ გავლენას, როცა იტალიაში მოვდიოდი. მე გუნდისთვის ყველაფერს ვაკეთებ, ფეხბურთი ჩემი ცხოვრების უდიდესი ნაწილია, დანარჩენი კი უკვე გულშემატკივრების გადასაწყვეტია.

კროკო ნაპოლის რეგიონალური პარტნიორია!

კვარაცხელია: "ამის მისაღწევად ყველაფერს გავაკეთებ"

კვარახელიას ინტერვიუ DAZN-სთან

უახლესი ამბები