Eurosport-მა ნაპოლისა და საქართველოს ეროვნული ნაკრების ახალგაზრდა შემტევ, ხვიჩა კვარაცხელიას სტატია მიუძღვნა და მასში ნათქვამია, რომ ერთადერთი ფეხბურთელი, რომელსაც შეიძლება ახლა კვარაცხელია შევადაროთ, მილანის ყოფილი ბრაზილიელი შემტევი - ოქროს ბურთის მფლობელი რიკარდო კაკაა.

ხვიჩა კვარაცხელია არაჩვეულებრივი ფეხბურთელია. მან ამ სეზონში სერია ა-ს იერარქია დაარღვია. ნეაპოლში ჩასულმა უცნობმა ბიჭუნამ, მაშინვე გამოავლინა მთელი თავისი პოტენციალი და ამით ყველას ყურადღება მიიქცია.

ნაპოლიმ მაშინვე აღმოაჩინა, რომ მათ ხელში "ბინგო" აღმოჩნდა. 10 მილიონად შეძენილი ფეხბურთელი, უკვე 60 მილიონი ღირს. სადებიუტო სეზონში ის გუნდს მესამე სკუდეტოსკენ მიუძღვება. მას ჩემპიონობისკენ მიმავალ გზაზე, გუნდის წარმატებაში დიდი წვლილი შეაქვს. 77-ე ნომერმა ყოველგვარ მოლოდინს გადააჭარბა.

სადებიუტო სეზონში მის ამჟამინდელ სტატისტიკას თუ გავითვალისწინებთ, შეგვიძლია, რომ ის ლეგენდარულ რიკარდო კაკას შევადაროთ. გასული სეზონის ბოლოს, ნაპოლი გუნდის ლიდერმა, ლორენცო ინსინიემ დატოვა. მან დატოვა სიცარიელე, რომლის შევსებაც მარტივი სულაც არ იყო. ამის შემდეგ კლუბმა გადაწყვიტა დაემატებინა არა ცნობილი ფეხბურთელი, არამედ ახალგაზრდა მოთამაშე, რომელიც ბათუმის დინამოში გამოდიოდა. კვარას შესახებ ფაქტობრივად არაფერი იყო ცნობილი. ისევე როგორც კიმის შემთხვევაში, კვარასთან მიმართებაშიც არსებობდა ვარაუდი, რომ მას ადაპტაციისთვის რამდენიმე თვე დასჭირდებოდა.

სპალეტიმ ის პირველსავე შეხვედრაში სასტარტოში გაამწესა. მან კი გოლი გაიტანა და საგოლე გადაცემაც მიითვალა. ამით პირველი დიდი ნაბიჯი გადადგა. ასეთ დებიუტზე ბევრი ვერც კი იოცნებებდა. ყოველ მომდევნო შეხვედრაში, ხვიჩა თავს ეფექტური თამაშით იჩენდა.

კვარაცხელიამ ჩემპიონთა ლიგაზე ლივერპულის წინააღმდეგაც ითამაშა და ნაპოლიმ 4:1 მოიგო. ქართველს კი დაუვიწყარი საღამო ჰქონდა. ტრენტ-ალექსანდრ არნოლდისთვის ის თავის ტკივილად იქცა. ამის შემდეგ მან გაიბრწყინა ისეთ გუნდებთანაც, როგორებიცაა: აიაქსი, რეინჯერსი, იუვენტუსი. სასუოლოსა და ატალანტას წინააღმდეგ კი ბრწყინვალე გოლები გაიტანა.

ის მოედანზე ნამდვილი მხატვარია. მოწინააღმდეგე გუნდის მცველებს თავისი დრიბლინგებით ანადგურებს. ის 70-ანი წლებიდან გამოგზავნილ მოთამაშეს ჰგავს. გენიოსია, რომელშიც ყველა საჭირო თვისებაა გაერთიანებული. მისნაირ თამაშს თანამედროვე ფეხბურთში თითქმის ვეღარავინ გვთავაზობს.

რიკარდო კაკა

2003 წლის ზაფხულში მილანმა სან პაოლოდან დაიმატა ახალგაზრდა შემტევი, რომელსაც იმ დროს არავინ იცნობდა. მასში 8.5 მილიონი გადაიხადეს. 21 წლის ბრაზილიელს სკოლის მოსწავლის გამომეტყველება ჰქონდა. მაშინ არავინ იცოდა თუ ვინ უნდა გაეწვრთნა კარლო ანჩელოტის. ალბათ მხოლოდ ბრაიდა ფიქრობდა, რომ ჩემპიონი იპოვა. ამ დროს მის პოზიციაზე მილანს ბრწყინვალე რუი კოშტა ჰყავდა. პორტუგალიელმა კაკას ტრანსფერიდან ერთ თვეში გალიანის უთხრა, რომ ახალგაზრდა ბრაზილიელი მასზე ძლიერი იყო.

სულ რამდენიმე კვირაში, კაკამ ყველას დაუმტკიცა თუ რა შეეძლო რეალურად. მისი აჩქარება, დრიბლინგი და ელეგანტური მოძრაობები ყველას ხიბლავდა.

პირველი გოლი მილანურ დერბიში გაიტანა. ამის შემდეგ კი ემპოლის კარი საოცარი გოლით აიღო. ყოველ მატჩში კაკა სულ უფრო მეტად უმატებდა. "როსონერის" მიერ მოგებულ მე-17 სკუდეტოში მან დიდი წვლილი შეიტანა და გულშემატკივრების გულიც მოიგო.

კაკას ვერავინ აჩერებდა. 2006-07 წლების სეზონში მილანმა ჩემპიონთა ლიგა მოიგო და მთავარი შემოქმედი სწორედ კაკა იყო. ამას კი ოქროს ბურთის მოგებაც მოჰყვა.

კვარაცხელიას სტატისტიკა 2022-23 წლების სეზონში

სერია ა - 22 მატჩი, 11 გოლი, 11 საგოლე გადაცემა.

ჩემპიონთა ლიგა - 6 მატჩი, 2 გოლი, 4 საგოლე გადაცემა.

კაკას სტატისტიკა 2003-04 წლების სეზონში

სერია ა - 30 მატჩი, 10 გოლი, 6 საგოლე გადაცემა

ჩემპიონთა ლიგა - 10 მატჩი, 4 გოლი, 1 საგოლე გადაცემა.

EUROSPORT კვარაცხელიას სტატიას უძღვნის და მას კაკას ადარებს

ქართველ შემტევს ოქროს ბურთის მფლობელ ბრაზილიელს ადარებენ

უახლესი ამბები