ჩემპიონთა ლიგის მიმდინარე სეზონის გათამაშება მეოთხედფინალური ეტაპის შეხვედრებით გრძელდება. გუშინ ორი მატჩი გაიმართა. ბენფიკა შინ ინტერთან 2:0 დამარცხდა, ხოლო მანჩესტერ სიტიმ მიუნხენის ბაიერნს უმასპინძლა და 3:0 იმარჯვა. დღეს კი ორი ასევე საკმაოდ საინტერესო დაპირისპირება შედგება. იტალიის მოქმედი ჩემპიონი - მილანი "სან-სიროზე" სერია ა-ს მიმდინარე გათამაშების ლიდერ, ნაპოლის მიიღებს, პარალელურად კი მადრიდის რეალი "სანტიაგო ბერნაბეუზე" ჩელსის დაუხვდება.

Gearing up for the big one 🔴⚫️#MilanNapoli #UCL #SempreMilan

Brought to you by @play_eFootball pic.twitter.com/pEWuVkVaVq
— AC Milan (@acmilan) April 11, 2023

ნაპოლისა და მილანის შეხვედრა მიმდინარე თვის დასაწყისში, ორ აპრილს სერია ა-ს ეგიდით შედგა და მაშინ ნეაპოლელები საკუთარ კედლებში ბევრისთვის მოულოდნელად გამანადგურებელი ანგარიშით, 4:0 დამარცხდნენ, თუმცა დღეს ისინი უკვე ერთმანეთს ჩემპიონთა ლიგაზე შეხვდებიან და როგორც მთავარი მწვრთნელები ამბობენ, ის თამაში ვერანაირ გავლენას ვერ მოახდენს.

აღსანიშნავია, რომ ნაპოლი ჩემპიონთა ლიგის ამ სტადიაზე ისტორიაში პირველად ითამაშებს. ევროპის ყველაზე პრესტიჟულ საკლუბო ტურნირზე კი "როსონერი" "პარტენოპეის" პირველად ხვდება.

🔜 #UCL ✨

💙 #ForzaNapoliSempre pic.twitter.com/zvNLV1klf7
— Official SSC Napoli (@en_sscnapoli) April 11, 2023

სტეფანო პიოლი (მილანის მწვრთნელი)

ეს მატჩი 180 წუთი გაგრძელდება და ყველაფერი სხვანაირად იქნება. ყველაზე მნიშვნელოვანია, რომ ყურადღება არცერთი წამით არ მოვადუნოთ, რადგან ეს დიდი რისკის შემცველი იქნება.

სერია ა-ს თამაშები სრულიად განსხვავებულია. ჩემპიონთა ლიგის მატჩებს მასთან საერთო არაფერი აქვთ. საჭიროა, მაქსიმალური კონცენტრაცია. ახლა სიმშვიდეს ვინარჩუნებთ, რადგან კარგად მოვემზადეთ.

ნახევარფინალში გასვლა გასაოცარი იქნება, მაგრამ ამის მისაღწევად დიდი შრომაა საჭირო. ახლა ორივე გუნდი ძალიან მოტივირებულია. ნაპოლიმ ჩემპიონთა ლიგის ამ სეზონში ყველაზე მეტი გოლი გაიტანა და ამით ყველაფერი ნათქვამია.

მეოთხედფინალში რვა გუნდი გამოდის და ყველა ძალიან ძლიერია. ველოდები, რომ ორივე თამაში ჩემი გუნდის შესრულებით დაბალანსებული იქნება. ნამდვილად კარგად ვართ მომზადებული და ფეხბურთელებისგან რაღაც განსაკუთრებულს ველოდები.

ცხადია, არ ვიცი რა გეგმა აქვს სპალეტის და რა აზრები ტრიალებს მის თავში. ჩემმა ბიჭებმა უნდა შეძლონ სხვადასხვა სიტუაციების წაკითხვა, მომენტების სწორი შეფასება და საჭირო ადგილების პოვნა.

ლუჩანო სპალეტი (ნაპოლის მწვრთნელი)

აქ ერთმანეთს ჩემპიონები ეჯიბრებიან, რომლებიც საჭირო ძალებს ყოველთვის პოულობენ. მე კარგად ვიცნობ ჩემს გუნდს და ის ყველაფერს გააკეთებს, რათა მილანზე უკეთესი იყოს. ვიმედოვნებ, რომ ამ მატჩის მსგავსად, კიდევ ბევრ მნიშვნელოვან შეხვედრას ჩავატარებთ. ახლა ძალიან პოზიტიური პერიოდი გვაქვს. ფეხბურთელებთან შესანიშნავი ურთიერთობა მაქვს და ეს ყველაფერი ახლა მოედანზეც უნდა გავიტანოთ.

მე ველოდები უმაღლესი დონის თამაშს, გამარჯვების მენტალიტეტით, რომელიც ამ სეზონში ყოველთვის გვქონდა. ოსიმენი? მნიშვნელოვანი თამაშები მის გარეშეც მოვიგეთ და ვფიქრობ, ამის გაკეთების ძალა ახლაც შეგვწევს. რა თქმა უნდა, ის ჩვენთვის ძალიან მნიშვნელოვანი მოთამაშეა.

ოსიმენის მილანში წაყვანა არ მოვისურვეთ, რადგან ეს რისკებთან იყო დაკავშირებული. ამიტომ დასვენების საშუალება მივეცით. ჩვენ შემდეგ მატჩებზეც ვფიქრობთ.

ეს არის მატჩი, სადაც ყველა ეცდება, რომ საუკეთესო თვისებები გამოავლინოს. ჩვენ მთელი მსოფლიო გვიყურებს. რასპადორის რაც შეეხება, ვნახოთ მატჩის წინ თავს როგორ იგრძნობს. ბოლო ვარჯიში მას სრული დატვირთვით არ ჩაუტარებია.

ჯოვანი დი ლორენცო (ნაპოლის მცველი)

ჩემთვის და მთელი გუნდისთვის ეს მნიშვნელოვანი მატჩი იქნება. ახლა ჩვენ უნდა ვაჩვენოთ საუკეთესო თამაში და ამ ყველაფრით უნდა ვისიამოვნოთ. ვფიქრობ, ამ შეხვედრისთვის კარგად მოვემზადეთ. მილანი დიდებული გუნდია და ცხადია ვაცნობიერებთ, რომ მათ წინააღმდეგ ძალიან რთული მატჩი გველოდება. ჩემპიონთა ლიგაზე მოთამაშე გუნდების დონე ძალიან მაღალია, მაგრამ ჩვენ მზად ვართ.

სავარაუდო შემადგენლობები

მილანი: მენიო, კალაბრია, ტომორი, კიაერი, ტ.ერნანდესი, ტონალი, კრუნიჩი, ბენასერი, დიასი, ლეაუ, ჟირუ.

ყვითელი ბარათის მიღების შემთხვევაში, შემდეგი მატჩის გამოტოვება ემუქრებათ ტონალის, ტომორის, კრუნიჩსა და ბალო ტურეს.

ნაპოლი: მერეტი, დი ლორენცო, რაჰმანი, კიმი, რუი, ლობოტკა, ანგისა, ზიელინსკი, კვარაცხელია, ლოსანო, რასპადორი

დანაკლისი: ოსიმენი, სიმეონე.

ყვითელი ბარათის მიღების შემთხვევაში, შემდეგი მატჩის გამოტოვება ემქურებათ კიმს, ჟესუსსა და პოლიტანოს.

პრევიუ | მილანი VS ნაპოლი

მატჩი 23:00 საათზე დაიწყება

უახლესი ამბები