დღეს ჩემპიონთა ლიგა მეოთხედფინალური ეტაპის საპასუხო მატჩებით გაგრძელდება. ლონდონის ჩელსი მადრიდის რეალს უმასპინძლებს, ხოლო პარალელურად იტალიის მოქმედი ჩემპიონი, მილანი სერია ა-ს მიმდინარე გათამაშების ლიდერ, ნაპოლის ესტუმრება. ამ გუნდებს შორის პირველი შეხვედრა "სან-სიროზე" საკმაოდ დაძაბული გამოდგა და იქ მილანელებმა 1:0 იმარჯვეს, რაც მათ გარკვეულ უპირატესობას აძლევს, თუმცა ნეაპოლელები ახლა საკუთარ კედლებში მხოლოდ გამარჯვებისთვის იბრძოლებენ.

👀 Sguardo puntato a #NapoliMilan

💙 #ForzaNapoliSempre #TuttoPerLei pic.twitter.com/inJJmMcfDp
— Official SSC Napoli (@sscnapoli) April 17, 2023

მოგახსენებთ, რომ ნაპოლი ჩემპიონთა ლიგის ამ სტადიაზე ისტორიაში პირველად იმყოფება. მიმდინარე სეზონში ეს გუნდები ერთმანეთს სულ სამჯერ შეხვდნენ. ორჯერ სერია ა-ში და ერთხელ ჩემპიონთა ლიგაზე. ლუჩანო სპალეტის გუნდმა იტალიის ჩემპიონატში "როსონერის" "სან-სიროზე" მოუგო, შემდეგ შინ 4:0 განადგურდა და ბოლოს, გასულ კვირას მინიმალური სხვაობით დამარცხდა.

დღეს ბუკმეიეკრების ფავორიტი ნაპოლია. ეს პირველ მეოთხედფინალურ დაპირისპირებაშიც ასე იყო. აღსანიშნავია, რომ სპალეტის გუნდი დღევანდელ შეხვედრას დანაკლისით ხვდება. პირველ მატჩში წითელი ბარათო ანგისამ მიიღო, ხოლო ყვითელი კიმმა და ისინი დისკვალიფიცირებულნი არიან. სასიხარულო ამბავი კი "პარტენოპეისთვის" ის არის, რომ გუნდს ერთ-ერთი ლიდერი, ვიქტორ ოსიმენი უბრუნდება, რომელმაც გასულ კვირას "სან-სიროზე" ვერ ითამაშა. ახლა კი დიდი ალბათობით, სტუმართა კარს პირველივე წუთებიდან შეუტევს. ვრცელდებოდა ინფორმაცია, რომ შესაძლებელი იყო, დღევანდელი თამაში ოლივიე ჟირუს გამოეტოვებინა, რადგან მან ბოლო ვარჯიში ნაადრევად დატოვა, მაგრამ ფრანგი გუნდთან ერთად ნეაპოლში გაემგზავრა.

The warmer weather calls for our fresh new @OffWht uniform ✈️☀️ #NapoliMilan #UCL #SempreMilan pic.twitter.com/QhFwgmXMyg
— AC Milan (@acmilan) April 17, 2023

აღსანიშნავია ის ფაქტიც, რომ იმ შემთხვევაში თუ ხვიჩა კვარაცხელია დღეს გოლის გატანას შეძლებს, ის გახდება პირველი ქართველი ფეხბურთელი, რომელიც ჩემპიონთა ლიგის ამ სტადიაზე გოლს გაიტანს და ამით ქართული ფეხბურთის ისტორიაში შევა. ნეაპოლური კლუბის გულშემატკივრები დღეს ყველაზე მეტს სწორედ მისგან და ოსიმენისგან ელიან.

ლუჩანო სპალეტი (ნაპოლის მწვრთნელი)

ჩვენ უნდა ვიფიქროთ იმაზე, რომ საუკეთესო მატჩი ჩავატაროთ. გავიღოთ ყველაფერი, რაც ჩვენს შესაძლებლობებს შეესაბამება. ფეხბურთის ეს დონე არის შანსი მოთამაშეებისთვის, რომ თავიანთი ძალები გამოავლინონ. ჩვენ ჩემპიონთა ლიგაზე უკვე საკმაოდ ბევრი მატჩი ჩავატარეთ და გამოცდილება დავაგროვეთ. განვლილ თამაშებში მტკიცე ხასიათი გამოვავლინეთ.

დიდი იმედი მაქვს, რომ ჩემი გუნდი დღეს სასურველი შედეგის დაფიქსირებას შეძლებს. მილანი სხვა კლუბებისგან საკმაოდ განსხვავებულია. მათ გამორჩეული სტილი აქვთ. ჰყავთ სწრაფი, ტექნიკური და ფიზიკურად ძლიერი მოთამაშეები. გასული თამაშიდან ჩვენ გარკვეული დასკვნები გამოვიტანეთ და ვიცით თუ რა არის გამოსასწორებელი.

ჩემპიონთა ლიგის ამ ეტაპზე მოხვედრით, ნაპოლიმ ისტორია უკვე დაწერა, მაგრამ ჩვენ უფრო შორს გვსურს წასვლა და არ ვაპირებთ, რომ ამ შედეგს დავსჯერდეთ. უკეთესი დღეებისთვის ვიბრძოლებთ.

მე არაფერს გამოვრიცხავ. მათ შორის არც დამატებით დროსა და პენალტების სერიას. თუ საქმე თერთმეტმეტრიანებამდე მივა, ვფიქრობ, ჯერ საუკეთესო შემსრულებლებმა უნდა დაარტყან, რათა ეს სერია ნაადრევად არ დასრულდეს. ჩვენ ყველაფრისთვის მოვემზადეთ. ასეთი ტიპის თამაშებისთვის სხვაგვარად არც შეიძლება.

ორივე გუნდს ჰყავს მოთამაშეები, რომლებსაც თამაშის ბედის გადაწყვეტა შეუძლიათ. ოსიმენი და ლეაუ ერთმანეთს ამ მხრივ ჰგვანან. სუფთა საფეხბურთო თვალსაზრისით კარგია, რომ ამ თამაშში მონაწილეობას ორივე მათგანი მიიღებს.

ჟუან ჟესუსი (ნაპოლის მცველი)

ველოდები, რომ დღეს გუნდი თავის ხასიათს გამოავლენს. ჩვენ სერია ა-ში მათთან 22-ქულიანი უპირატესობა გვაქვს. დღეს კი ჩემპიონთა ლიგაზე ვითამაშებთ და ყველაფერს გავაკეთებთ, რომ მომდევნო ეტაპის საგზური მოვიპოვოთ.

ისინი ლეაუსთან, ჟირუსთან და დიასთან ერთად, ძალიან ძლიერები არიან. ამიტომ, ფრთხილად უნდა ვიყოთ და მაქსიმალურად ვეცადოთ, რომ ბურთი დიდხანს ვაკონტროლოთ. თუ ჩვენ ამ უპირატესობას მოვიპოვებთ, მათ არაფრის გაკეთების შანსს აღარ დავუტოვებთ.

სტეფანო პიოლი (მილანის მწვრთნელი)

ჩვენ ერთმანეთს უკვე მესამედ შევხვდებით. აქამდე კი განსხვავებული გზებით მოვედით. ახლა შესაძლოა, რომ ეს თამაში სხვებისგან სრულიად განსხვავებულად წარიმართოს. ჩვენ ვითვალისწინებთ მეტოქის მახასიათებლებს და ვიცით თუ რომელ პოზიციებზე არიან განსაკუთრებულად ძლიერები.

მილანს თამაშის საკუთარი სტილი და გზა აქვს, რომელსაც არ უღალატებს. წინა თამაშებში მიღებული გამოცდილება უნდა გავითვალისწინოთ და ზუსტად შევარჩიოთ დრო როგორც ტემპის მომატებისთვის, ასევე მისი დაგდებისთვის. ეს ძალიან მნიშვნელოვანი იქნება.

დაცვაზე ფიქრს არ ვაპირებთ. ეს შეცდომა იქნება, რადგან სხვაობა მინიმალურია. ჩვენ მოგვიწევს, რომ რიგ ეპიზოდებში გავრისკოთ. ისინი წელს საშუალოდ თამაშში სამ-ოთხ გოლს იტანენ, რაც საკმაოდ მაღალი მაჩვენებელია. საჭიროა, რომ დღეს გუნდურად ვითამაშოთ. გამარჯვებული ის იქნება, ვინც საკუთარ შესაძლებლობებს მაქსიმალურად გამოიყენებს.

სიმონ კიაერი (მილანის მცველი)

ეს განსაკუთრებული მატჩებია და არასდროს იცი, როგორი იქნება მომდევნო. ამის წარმოდგენაც კი რთულია. ასეთი შეხვედრები ფეხბურთელს სამუდამოდ ამახსოვრდება. ჩვენ ამიტომაც ვთამაშობთ ფეხბურთს. სწორედ ეს გვსურს - მივიღოთ ემოციები და ადრენალინი.

პირველი მატჩი, რომელიც "სან-სიროზე" შედგა, ჩემი კარიერის ერთ-ერთი საუკეთესო გამოცდილება იყო. ეს თამაში სხვაგვარად წარიმართება, მაგრამ ის სხვა განცდებს მოგვანიჭებს. ჩვენ მხოლოდ წარმატებაზე ვფიქრობთ.

სავარაუდო შემადგენლობები:

ნაპოლი: მერეტი, დი ლორენცო, რაჰმანი, ჟესუსი, ოლივერა, ლობოტკა, ელმასი, ზიელინსკი, ლოსანო, ოსიმენი, კვარაცხელია.

დანაკლისი: სიმეონე, კიმი, ანგისა.

ყვითელი ბარათის მიღების შემთხვევაში, მომდევნო მატჩს გამოტოვებენ: ჟესუსი, პოლიტანო, რაჰმანი.

მილანი: მენიო, კალაბრია, კიაერი, ტომორი, ერნანდესი, ტონალი, ბენასერი, კრუნიჩი, დიასი, ლეაუ, ჟირუ.

ყვითელი ბარათის მიღების შემთხვევაში, მომდევნო მატჩს გამოტოვებენ: კალაბრია, კრუნიჩი, ტომორი, ტონალი.

პრევიუ | ნაპოლი VS მილანი

მეოთხედფინალური ეტაპის განმეორებითი შეხვედრა

მატჩი 23:00 საათზე დაიწყება

უახლესი ამბები