16 მაისს მილანში ჩემპიონთა ლიგის ნახევარფინალის განმეორებითი მატჩი გაიმართება. "როსონერი" ურთულესი ამოცანის წინაშე დგას, რასაც არსებული საკადრო ვითარება კიდევ უფრო ართულებს.

პირველი შეხვედრა, ნომინალურმა სტუმარმა ინტერმა 0-2 მოიგო და თამამად შეიძლება ითქვას, რომ სიმონე ინძაგის ფეხბურთელებს, უფრო დიდი ანგარიშით მოგებაც შეეძლოთ. "ნერაძური" ფინალში გასვლის მთავარი ფავორიტია, მაგრამ მილანელთა მთავარი მწვრთნელი, პიოლი მიიჩნევს, რომ ამოცანა რომელიც მისმა გუნდმა უნდა შეასრულოს, შეუძლებელი არ არის.

აღსანიშნავია, რომ პირველ მატჩამდე, ყველაზე პრესტიჟული ევროპული საკლუბო ტურნირის ნახევარფინალში მილანური გრანდები ერთმანეთს 20 წლის წინ დაუპირისპირდნენ და მიმდინარე სეზონამდე, სულ ევროთასებზე ეს გუნდები ოთხჯერ შეხვდნენ. ამ ოთხი მატჩიდან "შავ-წითლებმა" ორჯერ იმარჯვეს და ამდენჯერვე ფრე დაფიქსირდა. ორივე შემთხვევაში მომდევნო ეტაპის საგზური მილანმა მოიპოვა.

სერია ა-ში მილანური კლუბები განსხვავებულ მდგომარეობაში არიან. "როსონერის" 61 ქულა აქვს და მეოთხე ადგილზე მყოფ ლაციოს 4 ქულით ჩამორჩება. მესამე ადგილზე მყოფი ინტერი კი, მეხუთეადგილოსან მილანს 5 ქულით უსწრებს.

რაც შეეხება გუნდების საკადრო ვითარებას, მილანმა პირველ შეხვედრაში ისმაელ ბენასერი დაკარგა, რომელიც მიმდინარე სეზონში თამაშს ვეღარ მოახერხებს. რაფა ლეაუმ კი ვარჯიში დაიწყო და დიდი შანსია, ითამაშოს. საპირისპიროდ "ნერაძურის" შკრინიარი, დალბერტი და კარბონი ვერ დაეხმარებიან.

სიმონე ინძაგი (ინტერის მთავარი მწვრთნელი)

ინტერი კლუბის ისტორიაში ერთ-ერთ ყველაზე მნიშვნელოვან მატჩს ჩაატარებს. ამ თამაშზე მაქსიმალური კონცენტრაცია უნდა მოვახდინოთ და მთელი გულით ვითამაშოთ. მართალია, პირველი შეხვედრა 2-0 მოვიგეთ, მაგრამ მილანი საშიში გუნდია, რადგან მაღალი დონის ფეხბურთელები ჰყავს.

სტეფანო პიოლი (მილანის მთავარი მწვრთნელი)

ჩვენ მაქსიმალურად კომპაქტურად და გუნდურად უნდა ვითამაშოთ. ასეთ შემთხვევაში მეტოქის დამარცხებას მოვახერხებთ. კარგად ვიცით პირველი გოლი როგორი მნიშვნელოვანია. მნიშვნელობა არ აქვს რომელ წუთზე გავიტანთ. ამ თამაშზე ფიქრი და საუბარი კვირას დავიწყეთ. მთავარია, რომ ამ მატჩში ჩვენმა გუნდმა სწორი დამოკიდებულება აჩვენოს.

სავარაუდო შემადგენლობები

ინტერი: ონანა, დარმიანი, აჩერბი, ბასტონი, დუმფრისი, ბარელა, ჩალჰანოღლუ, მხითარიანი, დიმარკო, მარტინესი, ჯეკო

მილანი: მენიო, კალაბრია, კომორი, კიაერი, ტეო ერნანდესი, ტონალი, კრუნიჩი, სალემაკერსი, ბრაჰიმ დიასი, ლეაუ, ჟირუ

პრევიუ | ინტერი VS მილანი

მილანი და ინტერი ევროტურნირებზე ერთამენთს მეექვსედ დაუპირისპირდებიან

მილანი ურთულესი ამოცანის წინაშე დგას

უახლესი ამბები