10 ივნისი ევროპული ფეხბურთისთვის 2022-23 წლების სეზონის კულმინაციურ დღეს წარმოადგენს. სწორედ დღეს, ყველაზე პრესტიჟული საკლუბო ტურნირის, ჩემპიონთა ლიგის ფინალური დაპირისპირება გაიმართა, სადაც ერთმანეთს ინგლისის მოქმედი ჩემპიონი - მანჩესტერ სიტი და ინტერი შეხვდნენ.

აღსანიშნავია, რომ ორი წლის წინ, “ქალაქელებმა“ ამ ტურნირის ფინალი ლონდონის ჩელსისთან დათმეს და ხელიდან გაუშვეს შანსი, რომ ჩემპიონთა ლიგა პირველად მოეგოთ, მაგრამ ახლა ხოსეპ გუარდიოლას გუნდმა, ეს შანსი კიდევ ერთხელ მიიღო.

თავის მხრივ, “ნერაძურის“ ევროპის ყველაზე პრესტიჟული საკლუბო ტურნირი აქამდე სამჯერ ჰქონდა მოგებული. ბოლოს მან ამის გაკეთება 2010 წელს შეძლო და 13 წლის შემდეგ, ამ თასის მეოთხედ დასაუფლებლად იბრძოდა.

გუნდების სასტარტო შემადგენლობა ფინალური მატჩისთვის ასე გამოიყურებოდა:

მანჩესტერ სიტი - ედერსონი, აკანჯი, დიაში, აკე, სტოუნსი, როდრი, გიუნდოგანი, სილვა, დე ბრუინი, გრილიში, ჰალანდი.

ინტერი - ონანა, დუმფრისი, დარმიანი, აჩერბი, ბასტონი, დიმარკო, ბროზოვიჩი, ბარელა, ჩალჰანოღლუ, ლაუტარო, ჯეკო.

საწყისი 25 წუთი ნაკლებად სანახაობრივი გამოდგა. პირველი სახიფათო მომენტი, რომელიც ზუსტი დარტყმით დასრულდა, მანჩესტერ სიტიმ 27-ე წუთზე შექმნა, როცა ერლინგ ჰალანდის დარტყმული ანდრე ონანამ მოიგერია.

36-ე წუთზე, "ქალაქელებს" ტრავმის გამო, გუნდის ერთ-ერთი ლიდერი, კევინ დე ბრუინი გამოაკლდა, რომელიც ფილ ფოდენმა ჩაანაცვლა. შეხვედრის პირველი ნახევარი გატანილი გოლების გარეშე დასრულდა.

მეორე ტაიმის დაწყებიდან დაახლოებით 13 წუთში, ლაუტარო მარტინესმა საკმაოდ სახიფათო მომენტი ინგლისელთა კართან შექმნა, მაგრამ ედერსონი მოწოდების სიმაღლეზე აღმოჩნდა.

ანგარიში 68-ე წუთზე როდრიმ გახსნა. ესპანელმა ინტერის კარი ძლიერი დარტყმით აიღო. დარჩენილი წუთები საკმაოდ დაძაბული გამოდგა, ძირითადი დროის ამოწურვამდე, ერთი წუთით ადრე, ლუკაკუმ იდეალური შანსი ვერ გამოიყენა. ამის შემდეგ ტაბლოზე ანგარიში აღარ შეცვლილა. გუარდიოლას გუნდმა საბოლოოდ 1:0 იმარჯვა და ჩემპიონთა ლიგა ისტორიაში პირველად მოიგო. 2022-23 წლების სეზონში კი მანჩესტერ სიტიმ მესამე ტიტული მოიპოვა!

Man City have done it! 🏆 #UCLfinal pic.twitter.com/kU6ok68vgP
— UEFA Champions League (@ChampionsLeague) June 10, 2023

მანჩესტერ სიტი ჩემპიონთა ლიგის გამარჯვებულია!

უახლესი ამბები