ბუდაპეშტში ჯუდოს მსოფლიო ჩემპიონატი მიმდინარეობს. პირველ საშეჯიბრო დღეს საქართველოს გიორგი სარდალაშვილი წარმოადგენდა, რომელიც მოქმედი ჩემპიონის რანგში ასპარეზობდა, თუმცა წლევანდელ ტურნირზე გამოსვლა უმედლოდ დაასრულა. მეორე დღეს კი საქართველოს სახელით საქმეში ვაჟა მარგველაშვილი ვიხილეთ. სამწუხაროდ, საშეჯიბრო დღემ მისთვისაც უმედლოდ ჩაიარა.

დღეს, 15 ივნისს ტატამიზე საქართველოს სამი წარმომადგენელი გამოვიდა. მათ შორის იყვნენ: ლაშა შავდათუაშვილი (-73 კგ), ეთერ ლიპარტელიანი (-57 კგ) და ნინო ლოლაძე (-57 კგ).

ლოლაძემ და შავდათუაშვილმა ასპარეზობა მედლების გარეშე დაასრულეს. რაც შეეხება ლიპარტელიანს, მან სამხრეთ კორეელი ჯუჰე კიმის დამარცხება იპონით შეძლო. მერვედფინალში ეთომ რუს დარია კურბონმამადოვას იპონით მოუგო და მეოთხედფინალში გააღწია. აქ კი მისი მეტოქე ფინელი ფილალ სალონენი გახლდათ, რომელსაც ქართველმა იპონით მოუგო და ნახევარფინალში გამოსვლის უფლება მოიპოვა, სადაც მას კონკურენციას თურქმენეთის 20 წლის წარმომადგენელი, მაისა პარდაიევა უწევდა.

საბედნიეროდ, ეთერი ლიპარტელიანმა იპონით გაიმარჯვა და გახდა პირველი ქართველი ქალი, რომელიც მსოფლიო ჩემპიონატის ფინალში გავიდა! ოქროს მედლისთვის მას იაპონელი მომო ტამაოკი ეცილებოდა. საბედნიეროდ, ლიპარტელიანმა ეს ბარიერიც დამაჯერებლად დასძლია და მსოფლიო ჩემპიონი გახდა!

ფოტო: Kulumbegashvili Tamara

ისტორიული გამარჯვება - ეთერი ლიპარტელიანი მსოფლიო ჩემპიონია

უახლესი ამბები