ტაისონს ბრძოლის სანაცვლოდ 20 მილიონს შესთავაზებენ
მოლაპარაკებები მომდევნო კვირას დაიწყება

BKFC–ს (კრივი ხელთათმანების გარეშე) პრეზიდენტი, დევიდ ფელდმანი აცხადებს, რომ ის მომდევნო კვირაში მოლაპარაკებების დაწყებას აპირებს და გეგმავს, რომ მაიკ ტაისონს ვანდერლეი სილვასთან ბრძოლის სანაცვლოდ 20 მილიონი შესთავაზოს.

როგორც ირკვევა, "რკინის მაიკიმ" თავდაპირველად ამ საკითხთან დაკავშირებით საუბარი არ ისურვა, თუმცა ფელდმანი დანებებას არ აპირებს და ახლო მომავალში მას კვლავ დაუკავშირდება, რათა მისი დარწმუნება შეძლოს.

"მაიკისგან თანხმობის მიღება ძალიან რთული იქნება. მის დასაყოლიებლად ყველაფერს გავაკეთებ, თუმცა აღსანიშნავია, რომ პირველად მან ამ საკითხზე საუბარი საერთოდ არ ისურვა.

ამის მიუხედავად, ვფიქრობ, რომ უშანსოდ ნამდვილად არ ვართ. ჩვენ მას მომდევნო კვირაში დავუკავშირდებით, რის შემდეგაც ჩვენს წინადადებას უფრო დეტალურად გავაცნობთ, თუმცა ამ ეტაპზე პროგრესი არ გვაქვს.

ტიტო ორტისისთვის მაიკთან ბრძოლა არ შემითავაზებია, რადგან მიმაჩნია, რომ ხალხს შესაძლოა ამან არ დააინტერესოს. რაც შეეხება ვანდერლეი სილვას, მასთან მიმართებაში სიტუაცია განსხვავებულია. ასაკს მნიშვნელობა არ აქვს. ის კვლავ სახიფათოა და მისი დაპირისპირება მაიკ ტაისონთან ყველასთვის საინტერესო იქნება", – აცხადებს დევიდ ფელდმანი.

მას შემდეგ, რაც ტაისონმა რინგზე სენსაციური დაბრუნება დაანონსა, მასთან ბრძოლის სურვილი არაერთმა ცნობილმა სპორტსმენმა გამოთქვა. თავდაპირველად ამერიკელს "ოლ ბლექსის" ლეგენდას, სონი ბილ უილიამსს უკავშირებდნენ. შემდეგ ევანდერ ჰოლიფილდმა განაცხადა, რომ ის ტრილოგიისთვის მზადაა. ამას მოჰყვა შენონ ბრიგსი, რომელიც ამბობდა, რომ ისინი პრაქტიკულად შეთანხმდნენ და ამ ეტაპზე მხოლოდ ფინანსური საკითხის მოგვარება აფერხებდა შოუს თარიღის გამოცხადებას.

მოგვიანებით კი პორშეს ყოფილმა ტოპ მენეჯერმა და პოლიტიკოსმა, უვე ჰუკმა გამოთქვა სურვილი, რომ "რკინის მაიკის" რინგზე შეხვდეს და თუ ლეგენდარული ამერიკელი ამას დათანხმდება, კლიჩკო და შვარცნეგერი ჰუკს ბრძოლისთვის მოამზადებენ.

ასევე იხილეთ: VIDEO | ტაისონი: "ვგრძნობ, რომ შეუჩერებელი ვარ"

მაიკ ტაისონი 20 მილიონიან შეთავაზებას მიიღებს

უახლესი ამბები