ტაისონ ფიური UFC–ში გამოსვლას არ გამორიცხავს
ბრიტანელმა საქმეებს ჯერ კრივში უნდა მიხედოს

ყველასთვის ცნობილია, რომ რამდენიმე თვის წინ, ბრიტანელმა ბოშამ გამოთქვა სურვილი, რომ მან ბრძოლები აბსოლუტური საბრძოლო ჩემპიონატის ეგიდითაც გამართოს და როგორც აღმოჩნდა, დაუმარცხებელი ჩემპიონი ამ ყველაფერზე ისევ ფიქრობს.

კუგან კასიუსთან ინსტაგრამის პირდაპირ ეთერში ფიურიმ განაცხადა, რომ მას UFC–ზე ფიქრი არ შეუწყვეტია, თუმცა მანამდე მას კრივში რამდენიმე ბრძოლის გამართვა მოუწევს და სავარაუდო მეტოქეებიც მისთვის ცნობილია.

"მე დანა უაითთან ბევრჯერ მქონდა საუბარი ჩემს UFC–ში შესაძლო ასპარეზობასთან დაკავშირებით. ნამდვილად მამოძრავებს სურვილი, რომ რომელიმე მებრძოლს ოქტაგონზე შევხვდე, თუმცა გულახდილად გეტყვით, რომ ამ ეტაპზე ეს მე არაფერში მჭირდება.

დაგეგმილი მაქვს, რომ დეონტეი უაილდერთან მესამე დაპირისპირებაც გავმართო და ეს ნამდვილად იქნება სამართლიანი. ასევე მსურს ენტონი ჯოშუასთან და დილიან უაითთან შეხვედრა.

იმ შემთხვევაში თუ სამივე მათგანს დავუპირისპირდები, შევძლებ, რომ ჩემი კარიერა ღირსეულად დავასრულო. მე მზად ვარ ნებისმიერს შევხვდე რინგზე. უკანასკნელ პერიოდში არაერთი პერსპექტიული სპორტსმენი გამოჩნდა. მათ შორის არიან ტონი იოკა, ჯოი ჯოისი და დენიელ დუბოისი.

ბრძოლის სურვილი ერთია, თუმცა ვისთან რა სახის მოლაპარაკებები გაიმართება და საბოლოოდ შეთანხმება რომელ მათგანთან მიიღწევა, რთული სათქმელია. ამ ყველაფრით კი იმის თქმა მსურს, რომ სანამ კრივში ჯერ კიდევ მაქვს საქმეები, UFC–ში ფრენსის ნგანუსთან, სტიპე მიოჩიჩთან ან ბროკ ლესნართან ბრძოლა არ მჭირდება. როცა საბოლოოდ გადავწყვიტავ, რომ ჩემი თავი კრივში ამოვწურე, მაშინ სხვა ვარიანტებე მუშაობას დავიწყებ", – აცხადებს ტაისონ ფიური.

ასევე იხილეთ: ფიურის სჯერა, რომ ჯოშუას ნოკაუტით დაამარცხებს

ფიური UFC–ზე ისევ ფიქრობს

უახლესი ამბები