ჯორჯ სენ–პიერი ყველაზე ჭკვიან მებრძოლს ასახელებს
კანადელი ისრაელ ადესანიამ მოხიბლა

UFC–ს ლეგენდარული მებრძოლი, ჯორჯ სენ–პიერი აცხადებს, რომ ოქტაგონზე გამოსვლის დროს, მებრძოლისთვის ჭკვიანური გადაწყვეტილებების მიღება ისეთივე მნიშვნელოვანია, როგორც კარგ ფიზიკურ ფორმაში ყოფნა.

როგორც ჩანს, კანადელი მოხიბლულია 30 წლის ნიგერიელი სპორტსმენით და ისრაელ ადესანიას ყველაზე ჭკვიან მებრძოლად მიიჩნევს. მას UFC–ში ჯერჯერობით არცერთი მარცხი არ უგემია და რვა მატჩიანი მოგებათა სერია აქვს.

ჯორჯ სენ–პიერი ბევრი გულშემატკივრის აზრით, ყველა დროის საუკეთესო მებრძოლია. ის UFC–ს დიდების დარბაზის წევრიც გახდა და ალი აბდელაზიზი მზად იყო, რომ ორგანიზება გაეწია კანადელისა და ხაბიბ ნურმაგომედოვის ბრძოლისთვის, რადგან თვლიდა, რომ დაღესტანელთან რეალური შანსი მხოლოდ ჯორჯს ექნებოდა, თუმცა ალის ინიციატივას გამოხმაურება არ მოჰყოლია.

"ისრაელ ადესანიას კარიერას თვალს კიკბოქსიდან მოყოლებული ვადევნებ. ის თავს ოქტაგონზეც შესანიშნავად გრძნობს და ზუსტად იცის თუ როდის უნდა გადავიდეს შეტევაზე. სწორი დროის შერჩევას ყოველთვის ახერხებს.

ვიტყოდი, რომ ის ყველაზე ჭკვიანი მებრძოლია. შეცდომების არ დაშვება, გამარჯვებას განაპირობებს. როცა სპორტსმენი საბრძოლველად ემზადება, მისთვის ჭკვიანური გადაწყვეტილებების მიღება ისეთივე მნიშვნელოვანია, როგორც კარგ ფიზიკურ ფორმაში ყოფნა.

მომწონს ათლეტები, რომლებიც აზროვნებით გამოირჩევიან და უპირატესობას ყოველთვის მათ ვანიჭებდი. არ მსურს კონკრეტული გვარების დასახელება, თუმცა არაერთი კარგი მონაცემების მქონე მებრძოლი მინახავს, რომლებიც მხოლოდ ფიზიკურ ფორმაზე იყვნენ დამოკიდებულნი და ხშირად უფრო სუსტებთან მარცხდებოდნენ. ვიტყოდი, რომ ტვინი ოქტაგონზე თამაშის ის კომპონენტია, რომელიც გადამწყვეტ როლს ასრულებს", – ამბობს ჯორჯ სენ–პიერი.

ასევე იხილეთ: ისრაელ ადესანია საპროტესტო აქციას შეუერთდა

ჯორჯ სენ–პიერი: "ის ყველაზე ჭკვიანი მებრძოლია"

უახლესი ამბები