როგორც უკვე მოგახსენეთ, დღეს გამთენიისას ლას–ვეგასში UFC-მ მორიგი ღონისძიება გამართა, რომელიც ქართველი გულშემატკივრებისთვის განსაკუთრებულად საინტერესო იყო, რადგან ამ ქარდზე ორი ქართველი – რომან დოლიძე და ილია თოფურია გამოდიოდნენ.

თავდაპირველად თოფურიამ იბრძოლა და ამერიკელი დეიმონ ჯექსონი დაანოკაუტა. შემდეგ კი საქმეს დოლიძეც შეუდგა. მისი მეტოქე საკმაოდ ძლიერი და გამოცდილი ბრაზილიელი – ჯონ ალანი გახლდათ, თუმცა ჩვენებურმა მას აჯობა და ხადის იბრაგიმოვის დამარცხების შემდეგ, ყველაზე პრესტიჟულ ორგანიზაციაში უკვე ზედიზედ მეორე გამარჯვება მოიპოვა.

"მსაჯების არაერთსულოვანმა გადაწყვეტილებამ გამაკვირვა. ჩემი მეტოქე მართლაც ძალიან ძლიერია. ვფიქრობდი, რომ უფრო მარტივი ბრძოლა მექნებოდა, ვიდრე რეალურად იყო.

ბრძოლის მიმდინარეობისას მას ეტყობოდა, რომ მიღებული დარტყმების შემდეგ, ფეხი სტკიოდა. ცხადია, შეცდომებს მეც ვუშვებ, მაგრამ ყველაფერს გავაკეთებ, რომ ისინი მინიმუმამდე დავიყვანო. ქართველი ხალხისთვის ეს გამარჯვება მნიშვნელოვანი იყო და მიხარია, რომ ამის გაკეთების საშუალება UFC–მ მომცა", – განაცხადა რომან დოლიძემ ბრძოლის შემდეგ.

შეგახსენებთ, რომ აღნიშნულ ქარდზე მერაბ დვალიშვილსაც სურდა გამოსვლა, თუმცა მას მეტოქე ვერ შეურჩიეს და სამწუხაროდ შოუს მიღმა დარჩა.

რომან დოლიძე: "მსაჯების არაერთსულოვანმა გადაწყვეტილებამ გამაკვირვა"

დოლიძემ ალანს აჯობა

ჩვენებურმა UFC–ში ზედიზედ მეორედ იმარჯვა

უახლესი ამბები