ფორმულა 1-ის გამხსნელი დიდი პრიზი შეიძლება ბაჰრენში ჩატარდეს

Motorsport-ის ცნობით, ფორმულა 1-ის ახალის სეზონის პირველი რბოლა შეიძლება კალენდარში ჩანიშნულზე გვიან ჩატარდეს. საერთაშორისო საავტომბილო ფედერაციის მიერ დეკემბერში გამოქვეყნებული კალენდრის თანახმად, პირველი დიდი პრიზი 21 მარტს ავსტრალიაში უნდა ჩატარდეს, მაგრამ კორონავირუსის პანდემიის და მწვანე კონტინენტის ისედაც მკაცრი საკარანტინო რეგულაციების უფრო გამკაცრებით, რბოლის მასპინძლები ასპარეზობის შემოდგომისთვის გადატანას სერიოზულად განიხილავენ.

შემოდგომის მჭიდრო გრაფიკის გათვალისწინებით ასევე განიხილება მეორე ვარიანტიც - დიდი პრიზის 25 აპრილისთვის გადატანა. საქმე ის არის, რომ ვიეტნამის რბოლის გაუქმების გამო მითითებული თარიღი ჯერაც თავისუფალია.

აღსანიშნავია, რომ ავსტრალიის დიდი პრიზის 2020 წლის გათამაშება პარასკევის სესიებამდე ერთი საათით ადრე გაუქმდა. იმ შემთხვევაში თუ მელბურნ პარკში რბოლები პირვანდელ ვადებში არ ჩატარდა, მაშინ სეზონის პირველი რბოლის სტატუსი შეიძლება ბაჰრეინის დიდ პრიზს დარჩეს, რომელიც კალენდარში 28 მარტს არის ჩანიშნული.