ტატო გრიგალაშვილი დოჰას მასტერსის ჩემპიონია!

პირველ დღეს მასტერსზე ექვსმა ქართველმა ძიუდოისტმა იჭიდავა, თუმცა მედლის მოპოვება მხოლოდ ერთმა მათგანმა მოახერხა. ვაჟა მარგველაშვილმა საქართველოს ნაკრებს პირველი, ბრინჯაოს მედალი მოიტანა.

მასტერსის მეორე დღეს კი საქართველოს სახელით სამი ქართველი ძიუდოისტი ასპარეზობს.

-73კგ წონით კატეგორიაში საქართველოს სახელს მხოლოდ ლაშა შავდათუაშვილი იცავდა, რომელიც გათამაშებას პირველივე წრიდან ჩაერთო და ისრაელის წარმომადგენელ ტოჰარ ბუტბულთან, დამატებით დროში, ვაზარით დამარცხდა და დოჰას მასტერსს გამოეთიშა.

-81კგ წონით კატეგორიაში ტატო გრიგალაშვილმა მეორე წრეში უნგრელ ატილა უნგვარის "გოლდენ სქორში", იპონით დაამარცხა და მერვედფინალში გავიდა, სადაც მისი მეტოქე იტალიელი ანტონიო ესპოსიტო გახლდათ. ქართველმა ძიუდოისტმა იტალიელ მოწინააღმდეგეს 37 წამში, შესანიშნავი იპონით სძლია და მეოთხედფინალის საგზური მოიპოვა. ტატოს მესამე მეტოქე კი რუსი ალან ხუბეცოვი გახლდათ, რომელსაც ვაზარით სძლია და ნახევარფინალში გავიდა.

ნახევარფინალურ შეხვედრაში გრიგალაშვილი კორეელ სუნგჰო ლის დაუპირისპირდა. დაძაბულ ორთაბრძოლაში ქართველმა ძიუდოისტმა იპონით იმარჯვა და დოჰას მასტერსის ფინალში გავიდა.

ფინალში კი ახალგაზრდა ქართველმა ძიუდოისტმა ნიდერლანდელ ფრანკ დე ვიტი ვაზარზე დააგდო, შემდეგ კი მტკივნეული ილეთით შეხვედრა 21 წამით ადრე დაასრულა და დოჰას ამსტერსზე ოქროს მედალი მოიპოვა.

სამწუხაროდ, პირველივე შეხვედრა დათმო ამავე წონით კატეგორიაში მსოფლიო ჩემპიონატის ბრინჯაოს პრიზიორმა, ლუკა მაისურაძემ. ახალგაზრდა ქართველმა ძიუდოისტმა მეორე წრის მატჩი მონღოლეთის სახელით მოასპარეზე საეიდ მოლაეისთან ბოლო წამებზე დათმო და დოჰას მასტერსს გამოეთიშა.

შეგახსენებთ, რომ ხვალ, 13 იანვარს დოჰას მასტერსის, მესამე, დასკვნით საშეჯიბრო დღეს სამ წონით კატეგორიაში ექვსი ქართველი ძიუდოისტი იჭიდავებს. -90კგ წონით კატეგორიაში საქართველოს სახელით ბექა ღვინიაშვილი და ლაშა ბექაური იასპარეზებენ. -100კგ წონით კატეგორიაში შეჯიბრში საქართველოს ეროვნული ნაკრების კაპიტანი, ვარლამ ლიპარტელიანი ჩაერთვება, ხოლო +100კგ წონით კატეგორიაში გურამ თუშიშვილი, ლევან მატიაშვილი და გელა ზაალიშვილი იჭიდავებენ.