11 იანვარს დოჰაში სტარტი ძიუდოს მასტერსმა აიღო.

პირველ დღეს მასტერსზე ექვსმა ქართველმა ძიუდოისტმა იჭიდავა, თუმცა მედლის მოპოვება მხოლოდ ერთმა მათგანმა მოახერხა. ვაჟა მარგველაშვილმა საქართველოს ნაკრებს პირველი, ბრინჯაოს მედალი მოუტანა.

დოჰას მასტერსის მეორე დღეს კი საქართველოს ჰიმნი ტატო გრიგალაშვილმა ააჟღერა. ახალგაზრდა ქართველმა ძიუდოისტმა ყველა შეხვედრა დამაჯერებლად მოიგო და დოჰას მასტერსის გამარჯვებული გახდა, საქართველოს ნაკრების აქტივში კი პირველი ოქროს მედალი ჩაწერა.

მასტერსის მესამე დღეს კი საქართველოს სახელით ექვსი ქართველი ძიუდოისტი ასპარეზობს.

-90კგ წონით კატეგორიაში კი მედლებისთვის ბრძოლას ლაშა ბექაური და ბექა ღვინიაშვილი განაგრძობდნენ.

ღვინიაშვილი მეოთხედფინალში გერმანელ ედუარდ ტრიპელს დაუპირისპირდა და დაძაბულ შეხვედრაში იმარჯვა. ქართველი ძიუდოისტი ვაზარით მარცხდებოდა, თუმცა შეხვედრის შემოტრიალება თავის სტულში მოახერხა, საბოლოოდ იპონით მოიგო და ნახევარფინალში გავიდა. ნახევაფინალურ შეხვედრაში ღვინიაშვილი თურქ მიჰაელ ზგანკს დაუპირისპირდა, ვაზარით დაამარცხა და ფინალში გავიდა. ოქროს მედლისთვის დაპირისპირებაში ქართველი ძიუდოისტი ნიდერლანდელ ნოელ ვან ტ ენდს დაუპირისპირდა.

ფინალურ შეხვედრაში ღვინიაშვილმა მსოფლიოს მოქმედ ჩემპიონთან უმძიმესი ბრძოლა გამართა და სამწუხაროდ დამარცხდა. ქართველმა ძიუდოისტმა ჩვენს გუნდს მეოთხე მედალი მოუტანა, თავად კი ვერცხლის მედალი დაისაკუთრა.

რაც შეეხება ბექაურს, 20 წლის ქართველი ძიუდოისტი რუს მიხაილ იგოლნიკოვთან უდაძაბულეს ბრძოლაში დამარცხდა და დოჰას მასტერსზე ბრინჯაოს მედლისთვის ბრძოლაში გადაერთო. რეპეშაჟში ბექაური მონღოლ ალტანბაგანა განტულგას დაუპირისპირდა და ორი გდებით, იპონით იმარჯვა და ფინალურ ბლოკში ბრინჯაოს მედლისთვის ღვინიაშვილის მიერ დამარცხებულ ზგანკს შეხვდა. მეტოქეს მარტივად მოუგო და დოჰას მასტერსზე ბრინჯაოს მედალი მოიპოვა.

-100კგ წონით კატეგორიაში საქართველოს ეროვნული ნაკრების კაპიტანი, ვარლამ ლიპარტელიანი ღვინიაშვილის მსგავსად ფინალში, ოქროს მედლისთვის იბრძოლებს. ფინალში ლიპო აზერბაიჯანელ ზელიმ კოტსოიევს დაუპირისპირდება.

+100კგ წონით კატეგორიაში გელა ზაალიშვილი ლეგენდარულ ტედი რინერს დაუპირისპირდა და საკუთარი დაწყებული ილეთის შემდეგ, ოლიმპიურ ჩემპიონთან მტკივნეული ილეთით დამარცხდა. სამწუხაროდ, მედლისთვის ბრძოლას გამოეთიშა ამავე წონით კატეგორიაში მოასპარეზე დანარჩენი ორი ქართველი ძიუდოისტიც. ლევან მატიაშვილი რუს ინალ ტასოევთან დამარცხდა, ხოლო გურამ თუშიშვილმა შეხვედრა კორეელ მინჯონგ კიმთან დათმო.

ბექა ღვინიაშვილმა დოჰას მასტერსზე ვერცხლის მედალი მოიპოვა

ასევე იხილეთ

უახლესი ამბები