დღეს Counter-Strike: Global Offensive ერთ-ერთი ყველაზე პოპულარული თამაში და კიბერსპორტული დისციპლინაა. მას დღეში საშუალოდ 900 000 ადამიანი თამაშობს, ხოლო სიტყვა "ქაუნთერი" კი ერთხელ მაინც დიდსაც და პატარასაც სმენია.

22 წლის წინ, როდესაც თამაშის პირველი ვერსია გამოვიდა ვერავინ წარმოიდგენდა, რომ პროექტი ასეთ დიდ წარმატებას მიაღწევდა.

თუ Counter-Strike-ის შესახებ არაფერი გსმენიათ, მაშინ აგიხსნით თუ რა არის ეს. Counter-Strike ონლაინ-თამაშია შუთერის (სროლების) ჟანრში, რომელშიც ერთმანეთს ორი მხარე - ტერორისტები და სპეცრაზმელები უპირისპირდებიან. რაუნდის მოსაგებად ტერორისტებმა ბომბი უნდა დადონ და აფეთქებამდე დაიცვან, ან უბრალოდ მოწინააღმდეგის გუნდი უნდა გაანადგურონ. სპეცრაზმის დავალება ტერორისტების განეიტრალება ან დადებული ბომბის გაუვნებელყოფებაა.

იდეა სპეცრაზმელების და ტერორისტების დაპირისპირების შესახებ თამაში შექმნილიყო ჯერ კიდევ 90-იან წლებში დაიბადა, ანუ 11 სექტემბრის მოვლენებამდე რამდენიმე წლით ადრე.

Counter-Strike-ის ავტორი წარმოშობით ვიეტნამელი გეიმდიზაინერი მინ "Gooseman" ლია, თუმცა მანამდე ის ისეთი პოპულარული თამაშების მოდიფიკიაციებზე მუშაობდა, როგორებიცაა Quake და Unreal Tournament, მაგრამ ახლადგამოსულ Half-Life-ს ვერცერთი თამაში ვერ შეედრებოდა, რომელიც იმ მომენტში იდეალური თამაში იყო. მინ ლიმ ახალი მოდის შექმნა სწორედ მისთვის გადაწყვიტა, რადგან თამაშის ძრავი დეველოპერს უფრო მეტ შესაძლებლობას აძლევდა.

Gooseman-ის თქმით უნივერსიტეტში სწავლის დროს ის მოდზე კვირაში 30-40 საათი მუშაობდა.

"მე იმედი მქონდა, რომ თამაშს ვიღაც მაინც ითამაშებდა და, რომ ყველაფერი რამდენიმე მოთამაშით დაიწყებოდა და ნელ-ნელა გაიზრდებოდა", - თქვა ლიმ ერთ-ერთ ინტერვიუში.

მოთამაშეების შეფასებებმა არ დააყოვნა - თამაში ნამდვილ ჰიტად იქცა და ლიმ გადაწყვიტა მასზე მუშაობა გაეგრძელებინა.

ლისთან ერთად Counter-Strike-ზე ჯეს კლიფი მუშაობდა. მისი თქმით მოდიფიკაციაზე მუშაობა საერთო საქმედ იქცა, რადგან უბრალო მოთამაშეებს მის შექმნაში დიდი წვლილი შეჰქონდათ.

"სიმართლე, რომ გითხრათ, ჩვენ CS-ისთვის არცერთი რუკა არ შეგვიქმნია. ყველა რუკას ფანები გვიგზავნიდნენ და ჩვენ უბრალოდ ვარჩევდით, თუ რომელს დავიტოვებდით რელიზისთვის. ამგვარად თამაშს მე, ჯესი და ჩვენი ფანები ქმნიდნენ", - თქვა ლიმ.

Counter-Strike-ის პირველი სატესტო ვერსია 1999 წლის 19 ივნისს გამოვიდა. თამაშზე მუშაობა აქტიურად მიმდინარეობდა, ემატებოდა ახალი რუკები და იარაღები, სწორდებოდა გაპარული შეცდომები და იზრდებოდა პოპულარობა.

2000 წელს Half-Life-ის შემქმნელი კომპანია Valve ლის დაუკავშირდა და შტატში აიყვანა. ეს კომპანიის ერთ-ერთი საუკეთესო გადაწყვეტილება იყო.

Quake-სთან და Unreal Tournament-თან შედარებით Counter-Strike-ს ნელი გეიმფლეი ჰქონდა და აქცენტი გუნდურ მუშაობაზე იყო გაკეთებული. 2000 წლის 8 ნოემბერს CS-ის დამოუკიდებელი ვერსია გამოვიდა, მანამდე მისი გაშვება მხოლოდ Half-Life-ის კლიენტით იყო შესაძლებელი.

Counter-Strike Valve-ს ჰიტად იქცა და ამის მიზეზი ის არის, რომ თამაში ძალიან მარტივია და თან ამავდროულად საკმაოდ რეალისტურია. Easy to learn, hard to master ეს იყო ის პრინციპი, რომლითაც ლი თამაშზე მუშაობისას ხელმძღვანელობდა. მისი თქმით სწორედ ამ პრინციპის გამო გახდა Counter-Strike ასეთი პოპულარული.

2003 წლის 11 ოქტომბერს Counter-Strike 1.6-ის რელიზი შედგა, რომელიც სერიის ისტორიაში ყველაზე პოპულარული ვერსია იყო. "ქაუნთერის" 1.6 ვერსია იყო ის თამაში, რომელსაც 2000-იან წლებში სკოლის მოსწავლეები ინტერნეტ-კაფეებში საათობით თამაშობდნენ.

1.6-ის შემდეგ, 2004 წლის 23 მარტს Counter-Strike: Condition Zero-ს რელიზი შედგა, რომელიც იგივე 1.6 იყო, მაგრამ სხვა ძრავზე მუშაობდა; 2004 წლის 1 ნოემბერს Counter-Strike: Source გამოვიდა რომელიც გეიმერებმა არ შეიყვარეს და 1.6-ის თამაში გააგრძელეს.

შვიდი წლის შემდეგ კომპანია Valve-მ Counter-Strike: Global Offensive დააანონსა. აბსოლუტურად იგივე სათამაშო პროცესით, მაგრამ გათანამედროვებული გრაფიკით, განახლებული ძრავით და Steam-ის მარკეტით. ერთი წლის შემდეგ - 2012 წლის 21 აგვისტოს თამაში გამოვდა.

Global Offensive ცხრა წლის შემდეგ დღესაც ერთ-ერთ ყველაზე პოპულარულ კიბერსპორტულ დისციპლინად რჩება და რაოდენ გასაკვირიც არ უნდა იყოს ის ზრდას განაგრძობს. მასში ყოველკვირა ტარდება ტურნირები, რომელთა საპრიზო ფონდები 100 000 დოლარიდან 1 მილიონ დოლარამდე ვარირებს.

მოთამაშეების პროფესიონალიზმი ყოველწლიურად იზრდება, ჩნდება კიბერსპორტული ფედერაციები. 2000 წლის შემდეგ უამრავი თამაში გამოვიდა, მაგრამ Counter-Strike არ იცვლება და ალბათ ეს არის მიზეზი, რის გამოც მას დღემდე მილიონზე მეტი ადამიანი თამაშობს. გასაოცარი ისტორიაა: Half-Life-ის ერთმა ჩვეულებრივმა მოდმა ვიდეოთამაშების ინდუსტრია შეცვალა და ეს ისტორია ალბათ არც დასრულდება.

ყველაზე პოპულარული თამაში: Counter-Strike-ის ისტორია

უახლესი ამბები