ხაბიბ ნურმაგომედოვის სახელი მთელმა მსოფლიომ იცის. ის MMA–ის სამყაროში გამორჩეული ფიგურაა და გულშემატკივრების დიდი ნაწილი მიიჩნევს, რომ ის ყველა დროის საუკეთესო მებრძოლთა შორისაა. დაღესტანელს ისეთი სპორტსმენების გვერდით მოიხსენიებენ, როგორიცაა: ანდერსონ სილვა, ჯონ ჯონსი, ჟორჟ სენ პიერი და ა.შ

ხაბიბი ამჟამად 32 წლისაა. მან კარიერის დასრულების შესახებ განცხადება 2020 წლის 24 ოქტომბერს, უკანასკნელი ბრძოლის შემდეგ, ოქტაგონიდან გააკეთა, თუმცა აბსოლუტური საბრძოლო ჩემპიონატის პრეზიდენტი, დანა უაითი დიდი ხნის განმავლობაში ცდილობდა მისთვის გადაეფიქრებინა. მან ეს ვერ მოახერხა და რამდენიმე თვის წინ, საბოლოოდ დადასტურდა, რომ დაღესტანელის კარიერა დასრულებულია.

ნურმაგომედოვს MMA–ის პროფესიონალურ კარიერაში 29 ბრძოლა აქვს გამართული და თითოეული მათგანი, მისი გამარჯვებით დასრულდა. 29:0 – ეს შთამბეჭდავი სტატისტიკაა, რომელზეც ალბათ უარს არავინ იტყვის.

მისი პირველი ბრძოლა, ოფიციალურად 2008 წელს CSFU–ს ეგიდით ჩემპიონთა ლიგაზე შედგა, სადაც ვუსალ ბაირამოვი დაამარცხა. მას შემდეგ დაღესტანელი რეგულარუალდ ღებულობდა მონაწილეობას სხვადასხვა ტურნირებზე. M1, ProFC და ა.შ. ყველაზე პრესტიჟულ ორგანიზაცია UFC–ში კი 2012 წლიდან მოხვდა, სადაც ზედიზედ 13 ორთაბრძოლა მოიგო.

მას შემდეგ, რაც ის მსუბუქი დივიზიონის ქამარს დაეუფლა, მისთვის ტიტულის წართმევა ვერავინ შეძლო. კარიერის დასრულების შემდეგ მისი ქამარი ვაკანტურად გამოცხადდა და 16 მაისს, ახალი ჩემპიონი გამოვლინდება. ნურმაგომედოვის ბატონობის შემდეგ, UFC-ს მსუბუქი წონითი კატეგორია ახალ მეფეს აირჩევს. ერთმანეთს ჩარლზ ოლივეირა და მაიკლ ჩენდლერი დაუპირისპირდებიან.

რაც შეეხება ხაბიბის მონაცემებს, ნებისმიერმა მისმა მეტოქემ იცოდა, რომ თუ საქმე ჭიდაობამდე მივიდოდა, ხაბიბთან პრაქტიკულად უშანსოდ დარჩებოდა. ნურმაგომედოვმა ბავშვობის პერიოდი გაიხსენა, როცა მამამისმა ის საჭიდაოდ დათვთან მიიყვანა.

"როცა მამამ დათვთან საჭიდაოდ მიმიყვანა, მე მას ვუთხარი, რომ ის დათვი ჩემს კბენას ცდილობდა. მახსოვს, მან მიპასუხა, რომ ეს პრობლემა არ იყო და შემეძლო მეც კბენით მეპასუხა. უნდა მეჭიდავა და ჩემი საქმის კეთება გამეგრძელებინა", – ამბობს ხაბიბ ნურმაგომედოვი.

UFC–ში ხაბიბს ისეთი სახელგანთქმული სპორტსმენები ჰყავს დამარცხებული, როგორებიც არიან: ჯასტინ გეიჯი, კონორ მაკგრეგორი, დასტინ პორიე, რაფაელ დოს ანიოსი და ა.შ.

ნურმაგომედოვის გულშემატკივრებმა კარგად იციან, რომ მის კარიერაში უდიდესი როლი მამამისმა ითამაშა. ხაბიბი ყოველთვის ამბობდა, რომ აბდულმანაპ ნურმაგომედოვი მის ცხოვრებაში განსაკუთრებული იყო.

"მამაჩემი ჩემთვის იყო საუკეთესო მეგობარი, მწვრთნელი და მრჩეველი. მის გარეშე, ჩემი კარიერა ასეთი წარმატებული ვერ იქნებოდა. ბავშვობიდან მოყოლებული, ის ზრუნავდა ჩემზე და ყველაფერს აკეთებდა, რომ ნამდვილი ჩემპიონი გავმხდარიყავი. იყო მკაცრი, სამართლიანი და მომთხოვნი. ეს ყველაფერი კი მან ჩემთან მიმართებაში სწორად გამოიყენა და სწორედ ამის შედეგია ის, რასაც მივაღწიე".

აბდულმანაპ ნურმაგომედოვი გასულ წელს კორონავირუსმა იმსხვერპლა. მას შემდეგ ხაბიბმა მხოლოდ ერთი და უკანასკნელი ორთაბრძოლა გამართა. ჯასტინ გეიჯის დამარცხების შემდეგ კი განაცხადა, რომ მამამისის გარეშე ოქტაგონზე აღარ გავიდოდა და დედამისს პირობა მისცა, რომ კარიერას ჯასტინთან ბრძოლის შემდეგ დაასრულებდა, რადგან ეს დედას ტკივილს აყენებდა. მან პირობა შეასრულა და MMA-დან წავიდა.

ცნობილია, რომ უფროსი ნურმაგომედოვის სურვილი იყო, მის ვაჟს კარიერა 30:0 სტატისტიკით დაესრულებინა. გულშემატკივრები მოელოდნენ, რომ ხაბიბი ყველაფრის მიუხედავად, კიდევ ერთხელ იბრძოლებდა. მის სავარაუდო მეტოქედ ჟორჟ სენ პიერს ასახელებდნენ, თუმცა ეს ასე არ მოხდა.

"ჩემთვის ძალიან რთულია გავიარო მოსამზადებელი პერიოდი და შემდეგ ოქტაგონზე საბრძოლველად ისევ ძველებურად ავიდე მაშინ, როცა მამა ჩემს გვერდით აღარ არის. მისი გარდაცვალება ჩემთვის ძალიან დიდი დარტყმაა. ის უზომოდ მენატრება და არასდროს გასულა დღე, რომ მასზე არ მეფიქროს. ის საუკეთესო მწვრთნელი და მასწავლებელი იყო.

მას შემდეგ, რაც განვცაცხადე, რომ კარიერას ვასრულებდი, დაბრუნებაზე აღარ მიფიქრია. მე დანა უაითს შევხვდი და ამ თემაზე კიდევ ერთხელ ვისაუბრეთ. მან მხოლოდ ახლახანს დაადასტურა ჩემი გადაწყვეტილება, თუმცა მე მის შეცვლას არასდროს ვაპირებდი.

რთულია წასვლა, როცა მსოფლიოში საუკეთესო ხარ. გაქვს ფული, ხარ ძლიერი და ცნობილი. შესაძლოა, საზოგადოებამ ვერ გამიგოს, თუმცა იმედი მაქვს, რომ ჩემს ამ გადაწყვეტილებას პატივს სცემენ და მხარს დამიჭერენ.

ბუნებრივია, რომ სპორტსმენების კარიერას წარმატებასთან ერთად, თან ახლავს რთული პერიოდებიც. ამ სირთულეებს ჩვენ წლების განმავლობაში ერთად ვუმკლავდებოდით. მამის სახით, საუკეთესო მხარდამჭერი მყავდა. მის რჩევებს ყოველთვის ვითვალისწინებდი და შედეგად, მუდამ გამარჯვებული ვრჩბოდი", – ხაბიბი.

დანა უაითი: "ხაბიბ ნურმაგომედოვმა ისტორია დაწერა. მან MMA–სთვის ბევრი გააკეთა. ის ყველა დროის ერთ–ერთი საუკეთესოა. სარგებლობს დიდი პოპულარობით და მსოფლიოს ნებისმიერ წერტილში ჰყავს მილიონობით გულშემატკივარი, რომლებიც მას პატივს სცემენ. მართალია, ჩვენი სურვილი იყო მას 30–ე ორთაბრძოლაც გაემართა და ამაზე საუბარი გვქონდა, თუმცა მან სხვაგვარად გადაწყვიტა და მე მისი კარგად მესმის".

დენიელ კორმიე: "ის MMA–ის ლეგენდა გახდა. 29:0 სტატისტიკა ფანტასტიკაა. ხაბიბს არავისთვის არაფერი აქვს დასამტკიცებელი. დარწმუნებული ვარ, მამამისთან დაკავშირებული ტრაგედია რომ არ მომხდარიყო, ისინი კიდევ უფრო შორს წავიდოდნენ, თუმცა მოხდა ის რაც მოხდა და ჩვენ ხაბიბის და მამამისის მადლიერები უნდა ვიყოთ, რომ ასეთი ჩემპიონი ვიხილეთ".

ჯო როგანი: "ხაბიბი ჩემში აღტაცებას იწვევს. მას დიდ პატივს ვცემ როგორც სპორტსმენს და როგორც პიროვნებას. ძალიან რთულია მაშინ წახვიდე, როცა მწვერვალზე იმყოფები. ამას დიდი გამბედაობა სჭირდება და მან ესეც შეძლო. მის განვლილ კარიერას თვალს თუ გადავავლებთ უდაოა, რომ ის MMA–ს ისტორიაში, ადგილს საუკეთესოთა შორის იმსახურებს. UFC–სთვის ხაბიბი მომგებიანი პროექტი იყო"

ცნობილია, რომ ნურმაგომედოვი და ქველმოქმედებასაც ეწევა. ის არაერთხელ დაეხმარა გაჭირვებულ და უსახლკარო ადამიანებს საკვები პროდუქტებითა და მედიკამენტებით. დაღესტანში აქტიურად ეხმარებოდა ნარკოდამოკიდებულ ადამიანებსაც.

"ის აქტიურადაა ჩართული ნარკოდამოკიდებული ადამიანების რეაბილიტაციის პროცესში. როცა საჭიროება მოითხოვს, ხაბიბი მათ ფინანსურადაც ეხმარება. ზოგიერთს კი ავტორიტეტული, პატივსაცემი ადამიანისგან გამხნევება და საუბარი სჭირდება. ნურმაგომედოვი არც ამაზე იხევს უკან.

მის თანადგომას გრძნობს ყველა, ვისაც ეს სჭირდება. ის ამ ადამიანებს საკმაოდ დიდ დროს უთმობდა. ხშირად მიდიოდა სანახავად, კითხულობდა თუ რა აწუხებდათ და შეძლებისდაგვარად ეხმარებოდა. ხაბიბი მამამისის გზას აგრძელებს და თავის ხალხზე ზრუნავს. აქ ის ყველას უყვარს, აფასებენს და პატივს სცემენ", – ამბობს ხაბიბის სპარინგ პარტნიორი, მაგომედზად ზაიდოვი.

ცნობილია, რომ ნურმაგომედოვს ფეხბურთიც ძალიან უყვარს. მისი ფავორიტი კლუბი კი მადრიდის რეალია. მან რამდენიმე თვის წინ, სოციალურ ქსელში ვიდეოც გაავრცელა, სადაც ჩანდა, რომ რუსული კლუბის ფეხბურთელებთან ერთად ფეხბურთს თამაშობდა. ფეხბურთელებს შორის გიორგი ჯიქია და ჯანო ანანიძეც იყვნენ.

"ფეხბურთის ყურება 90–იან წლებში დავიწყე. ბავშვობიდან ვგულშემატკივრობდი მადრიდის რეალს. იქ ნამდვილი ლეგენდები თამაშობდნენ. "სამეფო კლუბი" მსოფლიოში საუკეთესოა. ყოველთვის დიდი ინტერესით ვადევნებ თვალს ჩემპიონთა ლიგას, ევროპის ჩემპიონატსა და მსოფლიო ჩემპიონატს. როცა ამის საშუალება მეძლევა, მატჩებსაც ვესწრები.

საფეხბურთო ვარსკვლავებს პირადადაც ვხვდები და ერთმანეთზე არსებულ შთაბეჭდილებებს ვუზიარებთ. ფეხბურთის თამაში ისე კარგად არ გამომდის, როგორც ბრძოლა, თუმცა ურიგოდ არც ბურთთან ერთად გამოვიყურები", – ამბობს ნურმაგომედოვი.

ხაბიბ ნურმაგომედოვი – 29:0

ასევე იხილეთ

უახლესი ამბები