ტოკიოს ოლიმპიური თამაშები დღეს უკვე ისტორიის საკუთრება უნდა ყოფილიყო, მაგრამ კორონავირუსის პანდემიის შედეგად, მულტისპორტულ სახეობათა ერთობლიობა ერთი წლის დაგვიანებით - 2021 წლის 23 ივლისს აიღებს სტარტს.

ტოკიო-2020-მდე დღეები რჩება, იქამდე კი გთავაზობთ 100 ფაქტს, რომელიც იაპონიას, XXXII ოლიმპიური თამაშების დედაქალაქ ტოკიოს და უშუალოდ თამაშებს ეხება. ერთგვარი ბლიც შემეცნებით სტრიქონები თამაშების თარიღიდან დაწყებული, იაპონიის კუნძულების რაოდენობით დასრულებულ ინფორმაციას გვამცნობს, რასაც ხუთ ნაწილად გთავაზობთ.

პირველად ისტორიაში ყველა 206 გუნდში სულ ცოტა ერთი ქალი და კაცი სპორტსმენი იქნება.
სიმაღლეზე ხტომაში ქალებში მსოფლიო რეკორდი - 2,09 მეტრი ეკუთვნის ბულგარელ სტეფკა კოსტადინოვას, რომელმაც ეს 1987 წლის რომის მსოფლიო ჩემპიონატზე შეძლო.
ოლიმპიურ და პარალიმპურ თამაშებს 43 არენა უმასპინძლებს.
მარათონში მსოფლიო რეკორდის მფლობელია კენიელი ელიუდ კიპჩოგე. კენიელმა სარეკორდო დროში - 2 საათში, 1 წუთსა და 39 წამში 2018 წლის ბერლინის მარათონზე გაირბინა.
ქალთა ფრენბურთში მოქმედი ჩემპიონი ჩინეთის ნაკრებია, რომელიც ტოკიოში მეოთხედ შეეცდება ჩემპიონობას. ჩინეთის ფრენბურთელთა ნაკრებმა პირველი ოქროს მედლები ლოს ანჯელესის (1984) ოლიმპიურ თამაშებზე მოიპოვა.
ფუძიამას მთა ჰონსიუს კუნძულზეა და იაპონიის უმაღლესი მთაა - 3,776.24 მ.
კოკუგიკანის დარბაზი, რომელიც ძველ ტოკიოში, სუმიდას რაიონში მდებარეობს და მეტწილად სუმოს მასპინძლობს, ამჯერად მოკრივეთა შეჯიბრებებს მიიღებს.
ოლიმპიური ცეცხლის ესტაფეტის მონაწილეთა უნიფორმები ნაწილობრივ გადამუშავებული პლასტმასის ბოთლებისგან არის დამზადებული.
ტოკიოს ოლიმპიური თამაშების გახსნას წინ უძღვის ასპარეზობები ფეხბურთში და ბეისბოლი/სოფტბოლში. ორივე სახეობაში შეჯიბრება 21 ივლისიდან აიღებს სტარტს.
ტოკიოს ოლიმპიური თამაშებისთვის 19 მხატვრის მიერ 20 ოფიციალური პლაკატი შეიქმნა.
აშშ-ის საკალათბურთო ნაკრებს 30 შესაძლებლობიდან 23 ოქროს მედალი აქვს მოპოვებული (15 კაცებში და 8 ქალებში).
ამერიკელი ალისონ ფელიქსი ერთადერთი ქალი მძლეოსანია, რომელსაც ექვსი ოლიმპიური ოქროს მედალი აქვს მოპოვებული.
1964 წლის ტოკიოს ოლიმპიურ თამაშებზე ნიპონ ბუდოკანის დარბაზში ძიუდოს, როგორც ოლიმპიური პროგრამის დებიუტი შედგა. ამჯერად, ამავე დარბაზში კარატეს ოლიმპიური ნათლობა შედგება.
იაპონია 6,852 კუნძულისგან შედგება. მათ შორის, დაახლოებით 430 დაუსახლებელია.
ხელბურთის ოლიმპიური დებიუტი 1936 წლის ბერლინის თამაშებზე შედგა. თუმცა, მაშინ ეს ღია ცის ქვეშ მოწყობილ მოედანზე მოხდა. დარბაზში მისი ოლიმპიური დებიუტი 1972 წლის მიუნხენის თამაშებზე შედგა.
ტოკიოს ოლიმპიური თამაშების გახსნის ცერემონიაზე ქვეყნები ორი მედროშით - ქალი და კაცით წარდგებიან (საქართველოდან მედროშეები ოლიმპიური ჩემპიონები, ნინო სალუქვაძე და ლაშა ტალახაძე იქნებიან).
თამაშების გახსნიდან მეორე დღეს - 24 ივლის, მედლები გათამაშდება სპორტის შვიდ სახეობაში: მშვილდოსნობა, საგზატკეცილო რბოლა (ველოსპორტი), ფარიკაობა, ძიუდო, ტყვიის სროლა, ტაეკვონდო და ძალოსნობა.
უზბეკი ტანმოვარჯიშე ოქსანა ჩუსოვიტინა მისთვის მერვე ოლიმპიურ თამაშებზე 45 წლისა იასპარეზებს.
პირველად თამაშების ისტორიაში ოლიმპიური ცეცხლის ესტაფეტისას წყალბადს იყენებენ.
იაპონიის ხუთი ძირითადი კუნძულია ჰოკაიდო, ჰონსიუ, კიუსიუ, შიკოკუ და ოკინავა.

გაგრძელება იქნება

100 რამ, რაც ტოკიოზე უნდა ვიცოდეთ (ნაწილი II)

ტოკიოს ოლიმპიური თამაშებამდე ორი დღე რჩება

უახლესი ამბები