6 აგვისტოს ტოკიოს ოლიმპიურ თამაშებში თავისუფალ სტილით მოჭიდავეთაგან კიდევ ერთი ქართველი წარმომადგენელი, ელიზბარ ოდიკაძე ჩაერთო.

ოდიკაძემ მერვედფინალში მოჰამადჰუსეინ მოჰამადიანს 6-3 მოუგო და მეოთხედფინალში გავიდა, სადაც რუსეთის ოლიმპიური კომიტეტის წარმომადგენელს, ოლიმპიურ და ოთხგზის მსოფლიოსა და ევროპის ჩემპიონს, აბდულრაშიდ სადულაევს დაუპირისპირდა. სამწუხაროდ, ქართველი ფალავანი მეოთხედფინალურ შეხვედრაში ქულათა აშკარა უპირატესობით, 0-10 დამარცხდა. აღსანიშნავია, რომ სადულაევი ტურნირის ფავორიტადაც მიიჩნევა და მისი ფინალში გასვლის შემთხვევაში, ოდიკაძე ბრინჯაოს მედლისთვის ბრძოლას რეპეშაჟიდან გააგრძელებს.

შეგახსენებთ, რომ დღესვე ოლიმპიადის ფინალში გენო პეტრიაშვილი ოქროს მედლისთვის იჭიდავებს. პეტრიაშვილის მეტოქე კი ამერიკელი გეიბლ სტივენსონი იქნება. სტივენსონმა მეოთხედფინალში ლეგენდარული ტაჰა აკგული დაამარცხა, რაც ტურნირის ერთ-ერთი მთავარი სენსაცია გახლდათ.

ფინალური ბლოკი თბილისის დროით 13:15 საათზე დაიწყება. მედლები კი 14:30 საათიდან გათამაშდება.

ფოტო: თამარ ყულუმბეგაშვილი, საქართველოს ეროვნული ოლიმპიური კომიტეტი

ოდიკაძე მეოთხედფინალში დამარცხდა

უახლესი ამბები