პორტუგალიაში მიმდინარე ახალგაზრდული მსოფლიო ჩემპიონატი ნაოსნობაში ალექსანდრე წივწივაძის ტრიუმფით დასრულდა.

ფინალურ შეჯიბრში, ქართველმა სპორტსმენმა კანოეთი 500 მეტრ დისტანციაზე გაცურვაში პირველობა არავის დაუთმო და ოქროს მედალს დაეუფლა.

გუშინ, 5 სექტემბერს, ალექსანდრემ ნახივარფინალურ გაცურვაში მეორე ადგილი დაიკავა. წივწივაძემ 500 მეტრიანი დისტანცია 2:09,89 წუთში დაფარა და რუმინელ ნიტუ კოსმინს თითქმის ერთი წამით ჩამორჩა.

ჩემპიონს Croco.ge დაუკავშირდა და მცირე კომენტარი ჩამოართვა:

„ბრწყინვალე ტურნირი იყო. ძალიან ბევრი ქვეყანა გამოდიოდა. დროშები, ჰიმნები - ეს ყველაფერი საოცარ გარემოს ჰქმნიდა.

ძალიან ძლიერი მოწინააღმდეგები მყავდა. მათ ორი თვის წინ ევროპის ჩემპიონატზე დავუპირისპირდი და გამიჭირდა გამარჯვება.

ტურნირზე ჩასვლის შემდეგ, მოვიწამლე და სიმართლე გითხრათ შედარები სუსტად ვიყავი ამიტომ საერთოდ არ ვფიქრობდი ამ შედეგზე.

წარმატება ნელ-ნელა მოდის. ამისთვის ყველაფერი კეთდება. მე, რუსთავში ვვარჯიშობ, სადაც ბაზას გვიშენებენ, რომელიც ძალიან მალე დასრულდება“, - თქვა მან.

შეგახსენებთ, რომ გუშინ, 200 მეტრ დისტანციაზე ვიცე-ჩემპიონის ტიტული მარიამ ქერდიკაშვილმა მოიპოვა, რომელმაც ფინალში მეორე ადგილი დაიკავა და ვერცხლის მედლის მფლობელი გახდა.

ალექსანდრე წივწივაძე: „ამ შედეგზე არ ვფიქრობდი, რადგან...“

ახალგაზრდული მსოფლიო ჩემპიონატი ნაოსნობაში ალექსანდრე წივწივაძის ტრიუმფით დასრულდა

უახლესი ამბები