მიმდინარე მსოფლიო ჩემპიონატზე, დღეს ასპარეზობაში ბერძნულ–რომაული სტილით მოჭიდავეთა ნაკრების სამი წევრი ჩაერთო. საქართველოს სახელით 63კგ წონით კატეგორიაში ლერი აბულაძემ იასპარეზა, რამაზ ზოიძემ 67კგ–ში, ხოლო ლაშა გობაძე 87კგ წონის წარმომადგენელი გახლდათ.

ნახევარფინალური ეტაპის საგზური კი აბულაძემ და ზოიძემ მოიპოვეს. აბულაძემ ასპარეზობა მერვედფინალიდან დაიწყო. მისი პირველი მეტოქე ყაზახეთის წარმომადგენელი სულთან ასეთული გახლდათ, რომელიც ქართველმა 5–4 დაამარცხა. შემდეგ ლერიმ იაპონელი კენსუკე შიმიძუს ასევე 5–4 მოუგო, ხოლო ნახევარფინალში უნგრელ ერიკ ტორბას შეხვდება.

რაც შეეხება რამაზ ზოიძეს, მან მერვედფინალში იტალიის სახელით მოასპარეზე ზაურ კაბალოევი 11–2 დაჯაბნა. მეოთხედფინალში კი სერბ სებასტიან ნარდს 8–1 მოუგო. ნახევარფინალში ზოიძე უკვე ირანელი მოჰამადრეზა აბდოლჰამიდის დამარცხებას შეეცდება.

ლაშა გობაძემ თავის პირველ შეხვედრაში აზერბაიჯანელ ისლამ აბასოვს 11–0 სძლია. მეოთხედფინალში სერბეთის სახელით მოასპარეზე ზურაბ დათუნაშვილს დაეჭიდა და 2–1 წააგო.

ნახევარფინალური შეხვედრები თბილისის დროით 19:00 საათზე დაიწყება.

აბულაძე და ზოიძე ნახევარფინალში იასპარეზებენ

ორი ქართველი ნახევარფინალში

ასევე იხილეთ

უახლესი ამბები