13 სექტემბერს, პადელის კლუბმა პადელბადემ, საქართველოს პადელის ეროვნული ფედერაციის რიგით მეექვსე ტურნირის საკვალიფიკაციო რაუნდს უმასპინძლა.

აღნიშნული ტურნირი 20 სექტემბერს ფინალური ეტაპის მატჩებით დასრულდება, რომელაც ექსპო ჯორჯია უმასპინძლებს.

საკვალიფიკაციოს შემდეგ ეტაპზე დავით ლაზარიშვილი, ნიკოლოზ ჯანჯღავა, გიორგი როსებაშვილი და ლუკა კუჭავა გავიდნენ.

აღნიშნულ ტურნირზე პადელბადეს კიდევ 9 მოთამაშე, 5 ბიჭი და 4 გოგონა ასპარეზობს, რომლებიც განთესილები არიან და ჩემპიონატის დასკვნით ეტაპზე ჩაერთვებიან.

croco.ge კლუბ პადელბადეს მენეჯერს, მწვრთნელსა და მოთამაშეს ესაუბრა:

რეზი მათითაშვილი (პადელბადეს მენეჯერი)

ამჟამად, პადელი მსოფლიოს ერთ-ერთი ყველაზე მზარდი სპორტია. პადელზე შეიძლება ითქვას, რომ ჩოგბურთის მსგავსია, მოედნის გარშემო შუშებიანი კედლებით. ის უფრო დინამიური და სოციალური სპორტია. პადელი თანაგუნდელთან უფრომ მეტ კომუნიკაციასა და სინქრონს და ასევე მოწინააღმდეგესთან საუბარსაც მოითხოვს.

საკმაოდ გასართობი სპორტია და დამწყებებისთვისაც მარტივი სათამაშოა. პადელი საქართველოში დაახლოებით 3 წლის წინ შემოვიდა. მისი პირველი მოედანი მთაწმინდაზე გაიხსნა და ამის შემდეგ, სულ უფრო პოპულარული გახდა. ამ სპორტის თამაში 10 წლიდან დაწყებული, 70 წლის ადამიანით დამთავრებული, ნებისმიერს შეუძლია ითამაშოს. ეს სპორტი ყველანაირ ასაკობრივ კატეგორიაში ჯდება.

კლუბი პადელბადე 2022 წლის ზამთარში დაარსდა. ლოკაცია არის თავისუფალი უნივერსიტეტის ტერიროტორია და მისი მთავარი წარმომადგენლები სტუდენტები არიან.

რაც შეეხება ბავშვებს, მეხუთე კლასიდან ზემოთ, უკვე გვყავს მოსწავლეები და წესით პადელის მომავალი თაობა უნდა წამოვიდეს.

ბოლო დროს, რაც უფრო მეტმა დაიწყო თამაში, ტურნირების სიხშირეც გაიზარდა. თვეში ერთხელ ტურნირები სტაბილურად ტარდება: იქნება ეს ფედერაციისა, თუ ლოკალური. ამჟამად, ფედერაციის ორგანიზებული ტურნირი მიმდინარეობს, რაც მოთამაშეებს აძლევს საშუალებას, რომ მეტი ქულა დაიწერონ და რეიტინგში წინ წაიწიონ. სავარაუდოა, რომ საქართველოს ჩემპიონატის სახე მომავალი წლიდან იქნება, რაც რეიტინგზე დაფუძნებული იქნება.

ანდრია ანთაძე (პადელბადეს მწვრთნელი)

წელიწადნახევრის წინ, მწვრთნელის გადამზადების კურსი გავიარე და მას შემდეგ, პადელის მწვრთნელი ვარ. პადელი იმით გამოირჩევა, რომ ასაკობრივი ზღვარი არ გააჩნია. მყავს, როგორც 10 წლის, ასევე 60 წლის მოსწავლეები. ყველა ასაკის მოთამაშეს შეუძლია ითამაშოს პადელი. სპორტული კუთხით დონის ასაწევად საჭიროა, რომ მეტმა ადამიანმა გადაწყვიტოს ხშირად თამაში და უპირველესად ვარჯიში. საჭიროა, რომ ბევრი ივარჯიშონ და ამ თამაშს მხოლოდ გართობის საშუალებად არ შეხედონ.

პადელის მოთამაშე უნდა გამოირჩეოდეს ამ სპორტისთვის საჭირო უნარებით და ამავე დროს აუცილებელია, რომ ის ფსიქოლოგიურად ძლიერი იყოს. თამაშების დროს, გადამწყვეტ მომენტში საჭიროა, რომ ის რაზეც ვარჯიშზე იმუშავე გამოიყენო და თუ ფსიქოლოგიურად ძლიერი არ ხარ, ამას ვერ მოახერხებ.

დავით ლაზარიშვილი (პადელბადეს მოთამაშე)

დაახლოებით 6-7 თვეა, რაც პადელში ჩავერთე. აქამდე აქტიურად ჩოგბურთს ვთამაშობდი. საქართველოში პადელის დონე დღითიდღე იმატებს. ეს სპორტი საკმაოდ ვითარდება. მაგალთად 6 თვის წინ და ახლა რომ მოთამაშეთა დონე შევაფასოთ, საგრძნობლად გაზრდილია.

ამ დროისთვის პროფესიონალური კუთხით ამ სპორტზე ნაკლებად ვფიქრობ, უფრო გასართობად ვთამაშობ, მაგრამ ყველაფერი შეიძლება მოხდეს.

რაც შეეხება თამაშის დროს ხმის გამოცემას, მაქსიმალურად გეხმარება, რომ დაიჭირო თამაშის რიტმი და იყო ჩართული. მაგ ხერხით მეტოქის ფსიქოლოგიაზე ვერ იმოქმედებ.

პადელბადე პადელის ეროვნული ფედერაციის ტურნირს მასპინძლობს

13 სექტემბერს საქართველოს პადელის ეროვნული ფედერაციის ტურნირი დაიწყო

უახლესი ამბები