21 მარტს თბილისში სტარტი ძიუდოს სამდღიანმა გრანდ-სლემმა აიღო. ტრადიციულად, ტურნირის პირველ დღეს ასპარეზობა მამაკაცთა -60 და -66, ხოლო ქალთა -48, -52 და -57 კგ-მდე წონით კატეგორიებში იმართება.

საქართველოს ნაკრებიდან ოქროს მედლისთვის მეუღლეები თემურ ნოზაძე (-66 კგ.) და ეთერ ლიპარტელიანი (-57) იბრძოლებენ. მათ გარდა, პირველ საშეჯიბრო დღეს საპრიზო ადგილებისთვის სამი ქართველი ჯუდოკა იბრძოლებს. თორნიკე მაზიაშვილი (-60), ლაშა ნადირაძე (-66) და ნინო ლოლაძე (-57) ბრინჯაოს მოგებას შეეცდებიან.

-60 კგ-ში თორნიკე მაზიაშვილმა ნახევარფინალამდე უზბეკ, ისრაელელ და ნიდერლანდელ მოწინააღმდეგეებს დამაჯერებლად სძლია, მაგრამ ნახევარფინალში ბრაზილიელ მიშელ აუგუსტოსთან წააგო და ბრინჯაოსთვის შეხვედრაში კუბელ ჯონათან ჩარონს დაუპირისპირდება. ამ წონით კატეგორიაში ამირან დარბაისელმა, ნიკა ხუზარაუშვილმა და ჯაბა პაპინაშვილმა ასპარეზობა ადრევე დაასრულეს.

66 კგ-ში ქართული ნახევარფინალი შედგა, რომელშიც ერთმანეთს თემურ ნოზაძე და ლაშა ნადირაძე დაუპირისპირდნენ. თემურმა ლაშას იპონით აჯობა და ფინალში გავიდა, სადაც ნეიტრალური სახელით მოჭიდავე რუს აბრეკ ნაგუჩევთან ამ გრანდ-სლემის ოქროს მედლის მესამედ მოგების შანსი მიეცა, მაგრამ ორჯერ ვაზარი გაუშვა და ვერცხლის მედალს დასჯერდა. ლაშა ნადირაძემ ბრინჯაოს მედლისთვის ბრძოლა დათმო.

-57 კგ წონით კატეგორიაში, ეთერ ლიპარტელიანმა ფინალამდე გააღწია, ხოლო ნინო ლოლაძე კი ნახევარფინალში, ფრანგ მართა ფავაზთან დამარცხდა. ბრინჯაოს მედლისთვის ბრძოლაში ნინო გერმანელ პაულინა შტარკეს დაუპირისპირდა და იპონით დაამარცხა. ნინო ლოლაძემ საქართველოს დელეგაციას მეორე მედალი მოუტანა.

ნინო ლოლაძე თბილისის გრანდ-სლემის ბრინჯაოს მედლის მფლობელია

ნინო ლოლაძემ გერმანელი ჯუდოკა დაამარცხა

უახლესი ამბები