დღეს, 14 აპრილს მოლდოვაში ძალოსანთა ევროპის ჩემპიონატზე საქართველოს ნაკრების რიგებიდან ორმა სპორტსმენმა იასპარეზა. თავდაპირველად საქმეში რამინ შამილიშვილი (55კგ) ვიხილეთ. მან აკვრასა და ორჭიდში ბრინჯაოს მედლები მოიპოვა. ქართველმა ძალოსანმა კონტინენტის პირველობის ატაცში ნაკრების მთავარი მწვრთნელის, გიორგი ასანიძის ხელმძღვანელობით 105 / 109 კგ დაძლია და მე-5 ადგილი დაიკავა.

შამილიშვილმა აკვრაში თავი 127 / 131 / 134 კგ. დაძლია და ბრინჯაოს მედლის მფლობელი გახდა. ძალოსანმა კიდევ ერთი ბრინჯაოს მედალი ორჭიდში მოგროვილი 243 კილოგრამით მოიპოვა. შედეგად რამინ შამილიშვილმა საქართველოს 2025 წლის ძალოსანთა ყულაბა ორი მედლით გახსნა.

ამის შემდეგ კი გოდერძი ბერდელიძემ (61კგ) იასპარეზა და ვიცე-ჩემპიონი გახდა. მან ატაცში ბრინჯაოს, აკვრასა და ორჭიდში კი ვერცხლის მედლები მოიპოვა! გოდერძიმ ატაცში 123 კგ. დაძლია და ბრინჯაოს მედლის მფლობელი გახდა, ხოლო აკვრაში დაძლეული 146 / 151 / 153 კილოგრამით ვერცხლის მედალის მფლობელი გახდა და ვიცე-ჩემპიონობა იზეიმა. იგივე შედეგი დააფიქსირა ორჭიდში მოგროვილი 276 კილოგრამითაც.

გოდერძი ბერდელიძე ევროპის ვიცე-ჩემპიონია!

ქართველი ძალოსნის წარმატება ევროპის ჩემპიონატზე

უახლესი ამბები