პიტერ–სტეფ დუ ტოის ამჟამინდელ კლუბთან კონტრაქტის გაწყვეტა სურს
სპორტსმენმა გადაწყვეტილება შეცვალა

როგორც რამდენიმე კვირის წინ გაცნობეთ, პროფესიონალმა სამხრეთ აფრიკელმა მორაგბეებმა 21 დღიანი ვადა მიიღეს, რათა ამჟამინდელ კლუბებთან კონტრაქტები გაწყვიტონ და გაუმჯობესებული პირობების მქონე გუნდებს შეუერთდნენ.

ვრცელდებოდა ინფორმაცია, რომ 2019 წლის საუკეთესო მორაგბემ, პიტერ–სტეფ დუ ტოიმ ტოპ 14–ის ბინადარ მონპელიესგან მაცდური წინადადება მიიღო. ფრანგები სპრინგბოკსის და სტორმერსის მესამეხაზელს სამ წლიან კონტრაქტს სთავაზობენ და ყოველთვიურად ანაზღაურების სახით 100,000 ევროს გადახდას ჰპირდებიან, რაც ჯამში 3,6 მილიონი გახლავთ.

თავდაპირველად ვრცელდებოდა ინფორმაცია, რომ დუ ტოი ფრანგების შეთავაზებას არ განიხილავდა, თუმცა ახლა ირკვევა, რომ მორაგბემ სტორმერსს კონტრაქტის გაწყვეტის მოთხოვნით მიმართა.

მართალია, რომ მესამეხაზელს აფრიკულ გუნდთან კონტრაქტი ჯერაც აკავშირებს, თუმცა როგორც ჩანს, ის აპირებს, რომ 21 დღიანი ვადის მიწურულს, მიღებული შანსი გამოიყენოს. ივარაუდება, რომ პიტერ–სტეფ დუ ტოი ქართველი ლეგიონერების თანაგუნდელი გახდება და მონპელიეს მაისურს მოირგებს, თუმცა ამასთან დაკავშირებით თავად მორაგბეს ოფიციალური განცხადება არ გაუკეთებია.

გასული წლის საუკეთესო მორაგბე გადაწყვეტილების მიღებას არ ჩქარობდა. მან კონსულტაციები თავის აგენტთან გაიარა და საბოლოოდ კარიერის საზღვარგარეთ გაგრძელების სურვილიც გამოთქვა.

ასევე იხილეთ: ტოპ 14–ის ყველა დროის საუკეთესო XV გულშემატკივრების ვერსიით

პიტერ–სტეფ დუ ტოი მონპელიეში?!

ასევე იხილეთ

უახლესი ამბები