მოგეხსენებათ, ჩოგბურთის სეზონი დასასრულს უახლოვდება. საქართველოს პირველი ჩოგანი, ნიკოლოზ ბასილაშვილი წლის უკანასკნელ ტურნირზე, პარიზის 1000 ქულიან მასტერზე გამოვიდა. ჯონ მილმანის ბარიერის დაძლევის შემდეგ, მეორე რაუნდში ნიკას სამხრეთ აფრიკელი კევინ ანდერსონი დაუპირისპირდა.

სპორტსმენები უკანასკნელ ორ კვირაში მეორედ შეხვდნენ ერთმანეთს. მოგეხსენებათ, მსოფლიოს მეექვსე ჩოგანმა ბასილაშვილი ვენაშიც დაამარცხა და შემდეგ იმ ტურნირის მოგებაც მოახერხა. კევინი ქართველი ჩოგბურთელისთვის ძალიან უხერხული მეტოქეა. სამხრეთ აფრიკელს მსოფლიოში ერთ-ერთი საუკეთესო მოწოდება აქვს და მისი დამარცხება ყველას ძალიან უჭირს. ამასთან ერთად, ანდერსონი მშვიდი ხასიათითაც გამოირჩევა. როგორც არ უნდა მიმდინარეობდეს მატჩი, ის მუდმივად თავის სტილში თამაშობს და მისთვის საკუთარი თამაშის თავზე მოხვევა წარმოუდგენლად რთულია.

მიუხედავად ამისა, პირველი სეტის 3:6 დათმობის შემდეგ, ნიკოლოზმა თავის თავში საკმარისი ძალა მონახა იმისთვის, რომ მეორე სეტი ტაი-ბრეიკამდე მიეყვანა. იქ კი თამაში ქართველის სრული უპირატესობით წარიმართა და მისი გამარჯვებით 7:3 დასრულდა.

მესამე სეტი მეორეს მსგავსად წარიმართა. ვერცერთმა მოთამაშემ ვერ მოახერხა მეტოქის მოწოდების აღება და საქმე კვლავ ტაი-ბრეიკამდე მივიდა. ამ შემთხვევაში სამხრეთ აფრიკელის გამოცდილებამ გადამწყვეტი როლი ითამაშა. მსოფლიოს მეექვსე ჩოგანმა გადამწყვეტი სეტის ტაი-ბრეიკი მშვიდად, 7:3 მოიგო და ამით ნიკოლოზისთვის სეზონი დაასრულა. მოგეხსენებათ, ეს წელი ბასილაშვილის კარიერაში ყველაზე წარმატებული იყო.

ამჟამად ქართველი ჩოგბურთელი ATP რეიტინგის 21-ე პოზიციას იკავებს, თუმცა პარიზის ტურნირი ჯერ კიდევ მიმიდნარეობს. მისი დასრულების შემდეგ გავიგებთ, თუ რა პოზიციით დაასრულებს საქართველოს პირველი ჩოგანი სეზონს. შეგახსენებთ, რომ ნიკოლოზმა მიმდინარე სეზონში ორი 500 ქულიანი ATP ტურნირი მოიგო და მომავალ წელს კიდევ უფრო დიდი იმედებით ხვდება.

ბასილაშვილი ანდერსონთან მეორედ დამარცხდა

ასევე იხილეთ

უახლესი ამბები